對上一次嚟係三年前啦! 今日又有機會再到童夢城坃, 順便夜晚到機場接媽咪落機 三年前得哥哥(3歲)一個, 今年已經6歲陪埋妹妹(3歲)第一次嚟玩! 【呀劍萬帥facebook專頁 http://www.facebook.com/kimfamilytraveltips】 今日我哋瞓到黃朝百晏先起身! 因為我哋預約咗童夢城既下午場 童夢城既票價一D都唔平, 大人$160, 小童就$320 玩差唔多4個鐘頭! 上一次去過後我都未再嚟過, 因為今次媽咪去咗台灣做嘢, 而我哋又打算今晚去接佢機 同埋見到童夢城做緊復活節Promo, 只要喺佢個wallpost度Like & Share, 同埋Tag朋友就可以$16購買成人票, 足足慳番$144但係只限現場購票! 不過我冇用到呢個優惠, 因為山長水遠入到去又好驚現場購票要排隊及出現滿額情況, 所以我都係預早在網上購票 網上購票也可以享有免費乘搭機場快線優惠(青衣到機場即日來回價值$60), 所以我係蝕底咗$64 x2=$128, 的確係有少少後悔! 不過就買了個安心 另外呢日港鐵仲有復活節乘車優惠, 成人小童半價, 機鐵小童免費! 所以車費我哋幾乎唔駛錢! 我哋預早了點去, 因為想在那裡吃午餐同埋可以上機場展望台睇飛機! 我哋搭港鐵去到青衣站 出咗閘之後向左手邊再轉右上到U4換取免費機場快線證 喺我哋前面有一班大媽大叔, 我即刻跑上前快過佢哋去到服務台先換飛 第一次見呢張超薄飛, 好似張咭紙咁都可以Do到! 千祈唔好唔見咗呀 兩個小朋友都乖乖坐低等機鐵駛到! 佢哋都係第一次搭機鐵 一上到車哥哥話「咪同平時嗰D地鐵一樣」我心諗「你究竟有冇搭過地鐵架, 點會一樣呀」 點擊圖片放大 只係一個站, 真係好快...一邊欣賞沿途風景, 好似去緊郊外旅行咁! 係T2嗰邊門落車! 好快就到達T2客運大樓! 我哋時間充裕, 先去Food Court食個Lunch, 我哋叫咗泰國河同菠蘿炒飯, 仲有個Pepper Lunch食! 幾大碟幾好味! 食到飽一飽! 仲有得坐窗口位, 感覺好似真係去旅行咁 差唔多到3點, 我哋就上到童夢城, 預早一點到場登記選擇職業! 遇上復活節期間, 童夢城都有個特別既復活蛋工作坊! 點擊圖片放大 呢度都設有Locker, 大家可以將一袋二袋嘢先寄倉! 職員哥哥俾咗兩本護照佢哋, 先係飛機前面影番張相先! 仲有今日既職業場館開放時間表! 我差D都唔記得, 原來唔係每個職業每個時段都開 所以你要好好計劃小朋友那個時段選那個職業扮演! 通常大家一開始都會揀最鍾意嗰項職業如消防員或機師等, 但係有D冷門職業只係開一個時段, 如果你鍾意那些冷門職業咁就唔好為咗揀熱門職業已錯過咗 相比三年前, 呢度增設咗幾個新職業場館, 好似海關, 便利店, 機組人員逃生訓練等! 今次我哋冇揀太空人, 因為想試吓其他新行業! 但係如果第一次嚟的話, 太空人都係其中一個最熱門的職業 每個場館門外都有個登記站, 大家一入場可以預先選定頭兩個時段既職業, 其後第三個時段的職業要稍後第一個時段開始進行後才會打開讓人登記 登記後會有一張QRcode條碼貼紙, 俾你貼喺Passport內頁, 如果萬一你揀咗之後後悔, 就需要到門口Reception叫職員幫你取消! 所以要諗清楚呀! 第一個時段3:20先開始, 佢哋兩個第一時間見到消防車就衝上去坐扮開車! 芊芊就上咗救護車玩! 以我所知就未見過呢兩架車郁得, 如果真係可以開的話都幾得意! 過嚟望一望新增場館! 不過感覺都係唔及之前的職業好玩, 所以我都冇登記呢幾個新增職業! 呢個機組人員逃生訓練比較多時間講解, 唔係咁適合太細既小朋友, 最後其實都係玩瀡滑梯! 只係著住逃生衣影相又唔係太吸引 便利店職員都幾得意, 可以俾小朋友學執貨, 賣嘢俾人收錢等! 呢度有個廚房仔, 只有第四及五個時段有小廚師活動, 但係要額外俾$20材料費 最末段這個場地係俾人開Party攪Event用的 在便利店隔離有個賣紀念品, 職業制服等既地方! 不過今日咁多人, 我都唔係太見到有人會喺度買嘢 可能大家都覺得如果要買都唔駛喺度買! (至少我係咁諗...) 好啦! 開始第一個職業啦, 佢哋兩係行咗入去扮消防員! 哥哥先著起消防員衫 我只可以偷偷地喺門外面影入去, 因為每個職業都唔會俾家長喺場館入面影相(當然有原因啦) 佢哋會安排一段時間俾小朋友出一出嚟影相! 到妹妹上場喇! 佢著起消防裝真係好得意! 今日係復活節假第二日, 又加上1折優惠, 所以好多人! 其實幫小朋友著完衫之後都用咗好多時間(不過佢哋都相應加咗人手, 所以都可以做齊任務!) 呢個芊芊見到我喺塊玻璃度就扮鬼扮馬俾我影相 因為參加的小朋友好多, 所以佢分咗兩個年紀層去進行任務, 先安排比較大個的去救火, 妹妹就屬於較細個的, 先出嚟同消防車影相! 同妹妹影完之後我就即刻跑過去同哥哥影相 我見到消防隊長哥哥教佢哋右手握拳放到心口上唸口號「山水」....我諗緊咩叫「山水」 原來係閂水...........(滴汗) 原來係支水炮係聲控 之後到妹妹去救火! 我就影完妹妹再番去影哥哥! 其實水炮都唔夠力, 射唔到落假牆度! 如果佢真係可以射落去, 跟住睇住個火慢慢變細就像真D 點擊圖片放大 +3 兩個烈火雄心影番張相先! 我叫哥哥搭住妹妹膊頭, 點知妹妹都伸高隻手去搭住哥哥, 攪笑! 好喇, 跟住就番入去消防局排隊拎出糧喇! 每人會有$20人工 原來呢D虛擬貨幣到最後可以用$100去買一包飲品! 可能佢哋會諗咁辛苦做五個任務先得包嘢飲 第二個職業係時裝表演, 之前都未玩過! 因為哥哥當年仲係好怕醜, 所以冇扮過! 但係今次嚟佢居然主動話要上舞台扮明星, 真係出乎我意料之外, 真係有陣時攪唔清佢鍾意乜 姐姐先帶住小朋友上舞台度行一次, 話俾佢哋知有四個企位擺四個Pose, 其實到時佢哋都係上到台亂咁走位, 哈哈! 我喺外面等咗5-10分鐘度, 跟住聽到音樂响起, 嘩, 第一個走出嚟既係芊芊呀 好靚女呀, 我係佢頭號粉絲嚟架! 可唔可以簽個名 (唔好意思以下會見到好多張相, 實在忍唔住要放哂喺度) 妹妹一出嚟嗰陣好怕醜好尷尬, 因為有其他小朋友的媽咪都等緊佢哋囡囡出嚟, 所以佢上到台度見到好多人, 後尾慢慢開始放鬆落嚟就擺咗幾多唔同Pose 到哥哥上台啦! 佢一樣係咁怕醜, 不過已經好叻仔, 已經行前一步玩呢個職業! 然後我叫哥哥單手插袋, 但係佢搵咗好耐都見唔到個袋, 原來佢調轉咗條褲著! 連後台D職員姐姐都大笑自己烏龍! 點擊圖片放大 番後台調番轉條褲就同妹妹出過嚟! 跟住佢哋又齊齊入番去後台, 我以為冇哂嘢睇, 原來佢哋再換另一套出嚟 今次哥哥先出場, 著住白色西裝灰色帽! 但係襯黑色西褲覺得怪怪哋 哥哥開始進入狀態喇! 佢自己撓起雙手擺Pose啦! 妹妹出嚟啦, 呢個白雪公主造型好正呀, 今次出嚟已經唔似第一次咁驚, 繼續鬼鬼馬馬咁擺Pose 跟住我叫佢飛吻, 佢就剩係錫住隻手, 個吻飛唔到出嚟! 點擊圖片放大 好SWEET呀! 最後一個造型啦! 呢個Look有D似上海灘, 件西裝好似有D唔啱身 點擊圖片放大 芊芊又嚟啦! 越出場就越得戚, 今次直程跳住咁出場! 點擊圖片放大 +2 呢張相好攪笑, 因為我叫芊芊擺心型, 但係佢慢半拍, 之後我又叫佢扮小花, 所以變咗一半扮心一半扮花! 點擊圖片放大 +7 慢半拍的芊芊又喺人哋鞠哂躬之後先至鞠躬, 超可愛! 由於呢篇時裝表演太多相喇, 真係要分開上下兩集先得! 嘻嘻 嚟到下半場, 佢哋已經扮演咗兩個職業, 跟住落嚟仲有三份工要番! GO... 第三份工佢哋去做育嬰護士, 因為芊芊好鍾意湊BB, 所以呢個職業唔Miss得架 其實哥哥第一次嚟都玩過, 估唔到過咗三年咁大個, 都仲係鍾意玩BB 兩個都著起男女育嬰護士裝! 芊芊心急要去望吓BB先 首先要聽吓姐姐講解一陣點樣照顧BB 其實每個BB都有一定重量, 記住三年前哥哥都抱唔起 好啦, 終於埋位啦! 總共有三個任務要去完成, 換片 > 餵奶 > 掃風 首先學吓點樣抱起BB先! 跟住要學吓點換片啦 呢個哥哥整蠱做怪係度睇人哋個BB有冇J, 原來咁多個BB真係有分男仔女仔! 兩個換唔掂喺度裝人哋, 最後都要姐姐過嚟幫手! 點擊圖片放大 +2 完成哂三項任務! 可以出嚟影番張相喇 跟住就入番去換衫預備第四項任務 排隊換衫既時侯我靜雞雞入咗去同佢哋影多張相...哈哈哈 其實佢哋兩個都開始攰! 五項職業成4粒鐘其實都幾長時間, 對於佢哋兩個嚟講算係比較長 第四項任務係做機師同空姐! 男女都可以, 女仔可以做機師, 男仔梗係做空少啦! 不過大部份人都係男仔去做機師, 女仔去做空姐! 有機會試吓調轉做先 同之前一樣, 場館裡面唔俾家長入去影相, 只可以喺門外面既電視機睇到裡面既情形! 換好哂衫之後, 所有小朋友會先出嚟飛機外面俾家長影相先 嘩咁今次哥哥著呢件機師衫終於啱身啦, 真係成個Cool 魔咁! 如果加埋幅黑超會更型吧 妹妹都出埋嚟啦! 不過兩個都開始攰, 笑唔郁lu... 所以我之後等佢哋入番去執行任務既時侯, 就去買咗D魚蛋燒賣等佢哋放工食 點擊圖片放大 哥哥要入番去機艙啦! 拜拜 芊芊都要上機啦! 拜拜.... 偷偷地影低芊芊番工的樣子! 終於賺咗唔少錢喇, 我去買咗$10五粒燒賣同$10五粒魚蛋俾佢哋食 休息一陣去個洗手間, 好快就到最後一份工啦 - 外科醫生! 最先換好衫既兩個出嚟影番張相! 影影吓手勢變咗葉問黃飛鴻..... 點擊圖片放大 +2 好嘢終於放工喇(其實連我都攰, 想快D去食嘢!!!!) 佢哋兩個拎住番工賺番嚟既錢去便利店買咗包飲品 我問佢哋兩個辛唔辛苦, 番咗咁耐工先得包嘢飲, 佢哋一齊答我「唔....辛....苦....!!!」(無言) 最後童夢城梗係唔會放過你啦, 頭先一開始咪講咗每個場館都禁止家長進入, 就係因為佢有獨家相賣俾你 一個小朋友5張照片, 一套$400 如買了這套相片可加$250買USB內含所有相片(如你有兄弟姐妹還一同來的朋友可以集合於一隻USB裡面) 溫馨提示: 如果下次再會去, 記住帶番張USB! 以下係童夢城攝影師幫佢哋兩個影既照片，你哋自己睇完再諗清楚到時俾唔俾錢買啦！ 點擊圖片放大 +18 Photo by CANON 5D Mark III, Len | EF 24-70mm f2.8L USM 呀劍評分: 8分 呀劍評語: 登記職業要有策略，由於每項職業非所有時段設有，所以最熱門的職業可留待較後時間玩(機師／消防員／太空人最為熱門)，因為如果一項職業人多的時侯，安排小朋友著衫、攝影師要逐個影相之後才開始，所以相對上實習的時間就會減少！ (呀劍推介最正影相位職業 － 空中服務員:即係空姐／機師／消防員／太空人／時裝演員／救護員／育嬰護士／外科醫生) 童夢城通識學園 簡介 童夢城通識學園是一個專門為兒童建置的心智教育場所，是一種嶄新的兒童教育方式；透過職業模擬遊戲中學習，體驗不同行業真實工作崗位而拓展視野，以培養團隊合作和正確的社會價值觀。 地址 香港國際機場2號客運大樓6樓6P005 入場費 小童（3至16歲） 港幣 $320 (持殘疾人士登記証可獲半價優惠 - 港幣 $160) 成人（17歲或以上） 港幣 $160 (持殘疾人士登記証可獲半價優惠 - 港幣 $80) 長者（65歲或以上） 港幣 $80 (持殘疾人士登記証可獲半價優惠 - 港幣 $40) 開放時間 上午場 09:30 – 14:00 下午場 15:00 – 19:00 網頁 http://www.dreamcometrue.com.hk/ (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
