今日係復活節正式假期(紅日)既第一日! 在二月時侯我已經上網報名參加今次馬會主辦的同心同步同樂日嘉年華 記得上年錯過咗呢個活動，所以決定今年帶住佢哋兩個嚟彭福公園玩吓！ 【呀劍萬帥facebook專頁 http://www.facebook.com/kimfamilytraveltips】 今次活動嘅安排一早在網上就可以下載嚟睇，特別係馬術表演，每個時段都有唔同嘅表演項目 所以一定要計劃好整個行程，讓今日整個旅程都可以玩個痛快 由於整個活動準時10點鐘就開始，至於第一個馬術活動就喺11點開始 所以我哋一食完早餐就出動，我哋搭港鐵到九龍塘轉東鐵 我哋冇喺沙田落車轉免費穿梭巴士，反而直接在火炭落車步行過去馬場 其實行過去一D都唔遠，我哋喺C出口過對面御龍山，跟住指示行大概10分鐘就到馬場了 點擊圖片放大 只係得一條路所以唔駛驚會當失路！去到一條天橋跟住落就會見到馬場！ 嚟到馬場都只不過係9:50，仲有10分鐘先開始，哥哥見到門外呢4隻馬話好靚要同佢哋影相 相反妹妹就冇咩興趣！ 去到彭福公園個石碑前影番張相，但係個保安叔叔非常盡忠職責，堅守石碑唔敢行開太遠 我見呢個情景咁攪笑，所以就連大叔都影埋入鏡！ 果然咁早仲未係好多人！因為擔心下午會有太多人睇馬術表演，所以都係辛苦D早起嚟到唔駛同人逼！ 先拎番Print出嚟嘅入場證俾閘外哥哥Scan個QR code 核對好身份之後就可以去入閘處排隊進場 等咗5分鐘都冇就開始進場lu...職員姐姐會俾每個入場朋友一份場刊，頸繩同手帶 場刊夾住一套五張嘅遊戲券，每張$10！如果玩咗佢指定嘅攤位遊戲就可以拎到一個襟章 襟章就係勾喺入場所派嘅藍色頸繩上面！ 但係我今日嚟並非要儲襟章，嚟得呢度梗係俾小朋友睇吓馬，所以我整個朝早就放棄看台呢邊所有活動 嘩第一個入閘同景點影相先! 跟住行過去就見到今次大會預備嘅「舞動水滴」藝術裝置 每個吹氣水滴就好似不倒翁咁，裡面裝了一定重量染有顏色嘅液體 不過呢個都算係小型嘅，喺彭福公園嗰邊有個仲大仲多嘅水滴！ 簡單喺度同佢哋影張相就離開看台，向彭福公園前進lu 前面仲有個氣墊城，雖然佢哋好想玩，但係我盡量唔俾佢哋見到，直接帶佢哋去睇真馬馬！ 穿過行人隧道就嚟到彭福公園入口 離遠我哋就見到呢個超級大嘅大水滴，不過我就冇行過去影相lu！ 因為始終今日主菜係想俾小朋友睇馬術表演(好似講咗好多次！) 嚟到「同策駿馬園」嘅第一個景點啦，就係同雪特蘭小馬合照 10:30 開始的節目我哋早幾分鐘就到咗，可以排定隊先同佢哋影靚相，當時工作人員仲拖住小馬預備緊 點擊圖片放大 妹妹始終未夠膽摸摸小馬，唯有掂住哥哥當自己都有摸小馬啦！ 在場工作人員都好樂意幫大家合照！兩隻馬都好乖巧，工作人員話我知佢哋仲老過我，嗰刻我真係唔信，定係佢講緊老過哥哥同妹妹咋！ 不過見到咁多人排住隊同佢哋影相，我都登佢哋辛苦～ 所以我哋急急腳一同小馬影完就離開，去睇下一個表演！ 無端端兩個嘢又要喺度執樹枝同喺草地上跑嚟跑去 好在下個馬術障礙賽表演仲未開始，就俾佢哋玩一陣啦 到咗11:00馬術障礙賽表演開始啦，分別有4個騎師進行示範，佢哋每跨一個欄 場內觀眾即時尖叫歡呼，氣氛超好！ 點擊圖片放大 +3 最後MC都好好叫哂騎師帶埋馬過嚟觀眾群間同大家打個招呼！ 等大家頭先影唔到相嘅朋友可以近隔離接觸馬仔 不過今日天氣麻麻，喺度一路睇一路食風 欣賞完馬術障礙賽示範之後就行番去另一邊欣賞韻律馬術表演 途中見到工作人員護理好多匹馬仔 其實仲有一個活動好想參加，就係可以俾大人小朋友嘗試策騎小馬，不過今次係以抽獎形式進行，所以唔係人人都可以有呢個機會，包括我....這些機會不是我的 唯有嚟到呢邊欣賞韻律馬術啦！表演總共分為兩個，第一個係專業騎師策騎馬匹跟住音樂跳出舞步，另一場表演則由兩位年青女騎師操刀，睇佢哋個樣真係未夠秤㗎喎！但係聽講佢哋已經攞咗好多個世界級獎 點擊圖片放大 點擊圖片放大 點擊圖片放大 雖然短短咁好快介紹咗幾個精采馬術表演，但係都已經睇咗整整一個上晝，然後我哋本來打算坐低休息一陣食少少嘢 但係發現咗一個好得意嘅比賽遊戲喎！所以就拎出我哋嘅遊戲券俾佢哋兩個玩吓喇 一年一度馬會跟親子界既盛事「同心同步同樂日」於復活節假期第一天舉行 我哋上晝睇完馬術表演, 下晝繼續我哋既旅程啦! 我哋拎咗遊戲券出嚟排隊，呢個遊戲需要每人兩張券去玩，起初以為係吹氣甚麼之類嘅遊戲 原來遊戲名叫「彈彈馬兒賽」係扮緊一個吹氣馬場，每次只準4名參賽者入場，騎住脹卜卜馬仔鬥快跑到終點! 不過喺排緊隊之際我哋周圍行吓睇吓！排隊呢D嘢梗係叫工人姐姐代勞 呢隻假馬我記得上年都曾經出現過，哥哥拎起馬刷，扮同馬兒刷身似模似樣 其實呢隻馬如果唔留神睇都幾似真馬！不過另一面睇見到佢個樣就勁Cutie 係「彈彈馬兒賽」隔離正好係一個遊樂設施，大人排緊隊可以俾小朋友喺度玩吓瀡滑梯 點擊圖片放大 大約排隊15分鐘後就到我哋啦，哥哥當然要同妹妹一組啦，其實我已經留意緊排隊前後嘅細路，盡量搵D細個D嘅排喺佢哋前後，如果遇到D太大個嘅對手就一定輸硬 比賽即將開始.....所有馬匹準備妥當，1。。。2。。。3 跟住我哋就去附近搵個長枱木櫈坐低食嘢，我哋除咗食帶嚟嘅蛋榚麵包外，我都喺度買咗盒熱狗同油雞肶，每樣都係$28，價錢尚算合理 食完嘢我哋就沿途番去看台嗰邊玩遊戲贏襟章了 行行吓見到咁靚嘅炮仗花，哥哥叫我幫佢影番張相喎，等我下次帶部相機俾佢自己都影低自己鍾意嘅嘢先 穿過行人隧道返番去對面看台 呢度唔單止係有一D同馬有關係活動或遊戲！基本上都係鼓勵大家多做運動 所以第一個我哋玩嘅係打羽毛球入洞！哥哥本身好鍾意打羽毛球所以一見到就即刻話要玩 結果最後哥哥都好叻，10個波佢入到一個，得到一份小禮物 但係妹妹就...( 其實都幾難入) 跟住梗係叫哥哥幫吓妹妹啦！不過最後都係一個都唔入，工作人員真係小小獎勵都冇...(失望) 呢個都算係景點之一，好似上年都有呢一個位俾人影相！哥哥一行埋去有你無你就勁大力扯條繩，攪到俾在場工作人員話！(偷笑ing) 點擊圖片放大 +3 跟住過嚟玩呢架風帆擺個靚Pose影相就會有多一款襟章 妹妹呢個時侯開始嗌攰要人抱喇, 但係哥哥仲仍然好Ginki! 然後我哋上到樓上一層, 呢度有個「同測體適能」既活動, 但係要3張遊戲券! 不過都好, 可以俾哥哥試吓, 測試吓佢既體能有幾多分 佢總共有5個體能測試要做! 每做完一個工作人員會喺佢張評分咭上面寫上分數 而且喺入去之前我要留低個人資料連電郵俾工作人員, 原來會將哥哥既體能分數即時email給我 第一個活動係要測試哥哥既平衡力, 平時連單腳企都唔耐會跌既佢, 唔知可以維持到幾耐呢!? 第二個測試係鬥大力!! 用手握住力量測試儀, 睇吓佢有幾大力 第三個係測試佢腳踏既速度! 到第四個測試就係跳高啦, 先企係地上伸直隻手記低佢掂到既位置, 然後手再拎住張咭跳起貼在牆上的量度尺 比較番佢兩個位置既距離! 最後就係測試佢柔軟度, 伸直對腳坐喺地上, 然後手指尖伸直推向前 五個測試做完之後, 得到所有分數, 跟住就行去櫃枱前將成績咭換取一個新款襟章 成個過程唔駛排隊好順暢! 又幾好玩喎, 如果可以自己都好想試吓! 點擊圖片放大 +3 跟住見芊芊條頸繩上面少哥哥一個襟章, 而手上仲有兩張遊戲券, 所以就叫哥哥落番去看台地面玩多個遊戲, 幫妹妹拎多一個襟章 哥哥平時食飯都係鍾意用反手拎匙羹同叉, 所以佢一拎住塊乒乓波拍好自然都用反手, 咁啱塊拍又係反手拍! 最後我哋玩到差唔多3:00, 妹妹都開始有D攰, 所以就離開! 我哋冇特別再加錢買遊戲券, 哥哥見到甚他小朋友頸繩掛滿襟章又好羡慕, 所以我又要藉此機會好好灌輸佢「知足」同「慳錢」觀念喇! 哥哥臨走前去廁所發現隻馬都要我同佢影張相! Photo by CANON 5D Mark III, Len | EF 24-70mm f2.8L USM 呀劍評分: 8分 呀劍評語: 下半部份的同樂日, 有好多唔同種類既攤位遊戲, 但係都唔係我既主菜, 不過為成個活動都增加咗唔少氣氛! 馬會「同心同步同樂日」 簡介 馬會將於3月25至26日假沙田馬場及彭福公園舉辦「同心同步同樂日」。今年將以「體育精神」為主題，設有超過70項遊戲及活動，精彩內容包括近距離接觸馬匹、世界級運動員即場獻技、閤家歡互動遊戲等，讓廣大市民透過親身參與，同樂齊學，發揮體育精神。歡迎所有大小朋友與家人一起穿上運動裝身體力行，同度有趣又富意義的復活節！ 地址 沙田馬場及彭福公園 入場費 套票於2016年2月29日（星期一）上午9時起於活動網站發售。售完即止。每張套票售價為港幣60元，包括入場券一張（價值10元）及遊戲券五張（共值50元）。三歲或以下小童免費入場。 日期 2016年3月25日至26日（復活節期間） 時間 上午10:00至晚上7:00 網頁 http://campaign.hkjc.com/ch/2016-rht/index.aspx (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
