新曆新年過後等到頸都長埋嘅復活節終於到啦! 第一炮我預備咗嘅節目 就係參加迪士尼舉行嘅花蛋節, 今次我一共分咗3集同大家分享裡面嘅精采活動 【呀劍萬帥facebook專頁 http://www.facebook.com/kimfamilytraveltips】 今次係我哋一家第2次嚟迪士尼樂園, 我冇特別同佢哋賣關子, 早一個禮拜前已經話咗俾佢哋知今日會去迪士尼玩, 佢哋超開心同埋期待咗呢一日好耐 我哋8點15出門口, 由深水埗出發到荔景再轉乘東涌線到欣澳站 轉埋上迪士尼線落埋車都只係9:15, 未計步行去地鐵站, 唔駛一個鐘就去到迪士尼lu! 仲有今日帶埋工人姐姐嘅好朋友嚟玩, 佢未嚟過迪士尼, 所以佢特別開心! 記得第一次入嚟因為驚執輸好快就去咗排隊入場 都冇好好咁欣賞吓門口呢個噴水池! 所以今日輕輕鬆鬆咁圍住噴水池行咗個圈 見到有D國內朋友跟住Daisy個動作影相(我其實好想影低但趕唔切) 真係青春即刻番哂嚟! 池邊一直有音樂伴住, 芊芊聽到都好開心咁跳哂舞! 我同佢一路轉圈一路亂影，影到呢張含情默默真係殺死人(我偏心，我認㗎！) 點擊圖片放大 好啦, 我哋終於入場啦! 上年八月嚟嘅時侯個安檢係設係入閘機 今日再嚟係先在門口處過安檢然後先到閘前排隊入場 (今年係迪士尼10週年, 估唔到仲有人唔知道唔俾帶飲/食品進場! 睇住有好多杯麵飲品被充供) 上年嚟嘅時侯唔記得喺呢個招牌位影相, 今次補番數! 今次花蛋節有好多唔同任務活動大人小朋友一齊參與 其中一個當然係喺樂園裡面搵番咁多隻復活蛋啦! 嚟到小鎮大街第一批搵到嘅旦蛋 就係Mickey, Minnie佢哋啦! 特別留意係得Donald Duck係調轉咗( ◑‿◑)ɔ 點擊圖片放大 +3 行前冇幾多就見到毛毛同大眼仔嘅旦蛋, 佢就連蛋嘅Size都會跟據番人物嘅大小而定 哥哥每次發現到旦蛋都特別開心, 仲好樂意叫我快D幫佢同旦蛋影相 一離開咗哥哥就即刻又叫住我快D快D再去搵旦蛋! 我同哥哥講「可以一邊玩一邊搵, 我話迪士尼好大未必可以搵得哂咁多隻蛋架!」 距離動畫藝術教室開班時間還有少少, 我哋就喺城堡前的花圃行行影影相 記得上一次夏天嚟都未見到呢個景點, 真係每一次嚟有唔同嘅感覺! 今日天氣雖然麻麻地, 冇藍天白雲, 但最緊要冇落雨, 同埋行起上嚟涼涼的都好舒服! 點擊圖片放大 +2 覺得自己好似去咗米奇妙妙屋咁! 因為所有人物都幾大隻, 如果可以坐埋喺隔離影相就好lu 哥哥又發現附近都擺放咗D普通旦蛋喺度, 妹妹行埋去即刻話粉紅色嗰粒旦蛋係Anna 我同媽咪即刻話「係喎....仲有藍色個蛋似Elsa喎!」 我諗真係小朋友先可以咁勢利, 由個Pattern圖案就聯想到迪士尼嘅人物角色 咁最遠黃色嗰粒係邊個呢? 大家諗唔諗到... 轉個頭諗住沿路行番去動畫藝術教室, 但係啱啱見到小鎮大街古董車 司機叔叔話就嚟開車啦! 所以我哋隨影幾張相就上車, 送我哋番去火車站附近啦! 落咗車之後我就叫哥哥搵吓呀樂同呀愁嘅旦蛋喺邊(因為我一早知道) 哈哈! 佢搵咗好耐都搵唔到≧◉◡◉≦ 其實就喺佢頭頂動畫藝術廊入口上面 呀愁係瞓咗喺度, 我即刻諗番動畫裡面呀愁唔想郁唔想行要呀樂拖住佢喺地上面行嗰一段 但係點解冇阿燥、阿憎和阿驚....同埋乒乓嘅(─‿‿─) 突然見到喺動畫藝術廊有Donald & Daisy同大家影相喎! 雖然唔係好多人, 但係芊芊唔肯過去...所以就變咗離遠咁影法 好啦我哋夠鐘入去藝術教室, 睇吓老師教小朋友畫乜嘢先! 估唔到行到去教室門口都俾哥哥發現多一隻旦蛋, 今次係醫神呀! 變咗蛋之後佢好似Wall-E D朋友, 同埋有D似Gundam裡面一個角色, 大家估唔估到呢?! 因為我哋冇一早去門口排隊，周圍去呢度睇嗰度睇，所以差唔多係最後嗰幾個家庭入去 攪到哥哥同妹妹冇得坐埋一齊(其實我哋冇所謂) 我同哥哥是但搵到一個位就坐低，芊芊就同媽咪坐咗喺另一邊 不過原來喺我哋之後仲有好多人遲嚟，佢哋只好坐喺房門內最後的長櫈上 派發小朋友一個畫板，紙同一支炭筆就開始上堂了 老師坐低開始授課了，大家望住出面的Projector 老師一個一個步驟咁教小朋友畫Toy Story的勞蘇 其實老師坐位附近都放咗好多復古玩具做裝飾，令成間房都好有藝術氣氛！ 成個過程只係大約10分鐘，可能你會話「咁快！排隊都唔止用咗十分鐘啦」.... 不過其實好足夠完成圖畫，同埋小朋友冇咁好耐性 如果唔係全程老師一對一的話 相信之後開始會有小朋友離位或者好難控制秩序 呢度所有嘢都設計得好精緻好細心，就連書枱都係度身釘造，有三粒釘固定畫紙嘅位置 令小朋友都坐得舒服畫得開心！ 不過唯一一樣嘢係老師提提大家只係畫勞蘇個頭，所以我見到好多小朋友都畫到個頭好細 因為佢哋打算預留番一D位置嚟畫埋個身，點知...得個頭就畫完 芊芊都開始畫，但係佢好似唔係好知做咩hahaha....見到佢個樣好緊張好得意 所以即刻叫媽咪過嚟陪住芊芊一齊畫 不過勞蘇可能對芊芊嚟講冇咁熟悉，如果叫佢畫米奇老鼠會容易D 哥哥一路都好專心咁聽住老師講解！其實畫勞蘇個秘訣就係一定要畫到眼睛同鼻哥超大對比 畫到佢個鼻好似成龍咁大就似㗎啦！ 點擊圖片放大 +2 如果個鼻唔夠大就會變咗Teddy Bear..... 當然重要嘅唔係似唔似勞蘇，而係享受同咁多小朋友一齊畫畫嘅過程！ 短短10分鐘可以多D小朋友參與，家長又唔會覺得太耐，可以把握時間去下一個地方玩 無得嘆！離開藝術教室兩個即刻喺門口拎住自己幅畫影番張相做個紀錄先 "The First Drawing @Disney" 本來打算過隔離藝術廊搵醫神，但係見到米奇米妮喺度，即刻去同佢影番張相先(因為事先經叫姐姐幫手排緊隊) 明明記得早幾日喺網上睇Mickey Minnie唔係著呢套衫㗎！？又話有本土Style嘅！？ https://www.hongkongdisneyland.com/zh-hk/events/springtime-celebration/ 不過呢個十周年Look都好睇，同復活節都幾夾, 又Colorful影相影出嚟仲靚D㖭！ 排緊隊的兩邊附近都放咗D復活旦蛋，大家唔知又覺得個花紋似邊個迪士尼人物 我就覺得中間黃黃青青有朵向日葵個隻蛋似係Frozen Fever Anna條新裙！ 呢邊又有3隻蛋，但係唔好意思...陳生，你貴姓呀？我唔係好識你哋！ (番屋企之後起番你哋低)原來你哋叫Duffy Bear, Shellie May & Gelatoni 上次嚟咁多人同唔到你哋影相，今次終於夢想成真啦！ 好！繼續出發去完成下一個任務 今年復活節迪士尼除咗有花蛋節之外, 其實今年都係香港迪士尼嘅十周年 頭先去完動畫藝術教室之後, 我哋繼續呢個奇妙旅程囉....(賣廣告咁) 話說我哋啱啱喺動畫藝術教室畫完勞蘇同埋搵咗十周年Look嘅Mickey & Minnie之後 我哋就過隔離動畫藝術廊搵醫神Baymax影相 今次迪士尼花蛋節都細心地為小朋友安排咗兩個最多粉絲嘅角色Baymax & Sofia 醫神梗係男仔至愛, Sofia就當然為我哋嘅小公主而設啦 門口見到條人龍唔係好長, 都係得3-4個家庭, 所以就急急腳去排隊 點知入咗門口之後先發現原來裡面係打蛇餅(╥﹏╥) 裡面擺放住好多迪士尼童話角色嘅模型, 好似有《小鹿斑比》, 《小飛象》, 《灰姑娘》同《雪姑七友》 唔講唔知道原來《小鹿斑比》動畫係一位華人畫師黃齊耀所創作 呢套動畫跟往常的迪士尼出品不同，除了是由華人畫師操刀 更重要想帶出的訊息是，人類對大自然帶來的傷害 打打吓塊蛇餅5分鐘去到睇到《雪姑七友》嘅介紹 我成日覺得《小魚仙》嘅女巫烏蘇拉如果係搵魯芬扮, 咁《雪姑七友》呢個惡毒王后可以搵邊個藝人扮呢? (夏蕙E都幾好喎!) 排到去最頭幾個, 就快到我哋同醫神影相, 呢度有個大廚窗放咗Classic Version 嘅 Mickey Mouse 相比起依家米奇妙妙屋嘅3D版Mickey, 我都係較鍾意最復古味濃嘅Classic Mickey 最後去到龍頭先會見到呢個白雪公主模型! 其實排咗10-15分鐘度, 話耐又唔算好耐! 芊芊見到咁大隻醫神都係唔敢行埋去, 要媽咪抱住先肯影! 我諗迪士尼咁多個人物, 扮演醫神嘅呢位人兄應該最舒服, 因為佢行都行唔到, 只可以企喺度, 所以唔知佢如果要離開嗰陣要點走? 仲有最特別嘅係醫神對眼識得眨架! 好得意! (後面其實放住醫神個紅色頭盔, 但係我問迪士尼哥哥, 佢哋話唔可以拎起帶) 影完之後過嚟呢邊都仲有一個小小嘅展區, 呢度貼咗幾張Poster 嘩...迪士尼下一套係"ROBO RAMEN", 係咪真架! 好吸引喎 (不過我估係假嘅, 因為我Google唔到) 呢一邊大部份都係擺放住所有關於《反斗奇兵Toys Story》嘅展品 中間呢個咁大嘅模型, 用Stop Motion嘅方式展示, 唔知會唔會有特別嘅影法有唔同效果呢? 牆上面掛咗一大幅《Toys Story》嘅手稿 我無意中留意到呢個類似巴斯嘅物體! 睇嚟佢似係巴斯光年嘅第一稿! 你哋覺得平時睇開嗰個巴斯型仔D, 定係依家紅色隊服呢隻靚D...? 展區兩邊廚窗就放咗《超人特工隊 Incredible》同埋《反斗車王 Cars》嘅模型 離開咗動畫藝術廊之後, 我哋就直接上去小鎮大街火車站搭火車去Fantasy Land喇! 人唔多, 只係等咗一班車嘅時間大約10分鐘, 就上到車! 上次嚟就喺幻想世界Fantasy Land 搭過嚟, 今次我哋就由小鎮大街搭過去(兩邊沿途風景係唔同架) 其實都差唔多1點, 不過我哋唔駛食嘢住, 因為小朋友未肚餓(大人好肚餓囉)同埋又唔想同人迫 所以我哋一落車就諗吓玩咩先, 玩夠先至去食嘢, 仲有大把位坐㖭 佢哋一落到嚟見到有咁大隻小飛象就好開心仲爬上去同佢影相 所以我哋一落車就諗吓玩咩先, 玩夠先至去食嘢, 仲有大把位坐㖭 佢哋一落到嚟見到有咁大隻小飛象就好開心仲爬上去同佢影相 今次主力都係去玩上一次未玩過嘅遊樂設施 我選擇先去「小熊維尼歷險之旅」拎咗Fast Pass先 園內只有這個同埋「飛越大空山Space Mountain」 轉個頭又搵到幾個《Winnie The Pooh》花蛋啦! 講開又講知唔知佢個名點嚟? 聽個名Winnie有陣時都會以為係女仔 但係其實佢係男仔嚟嘅, 原來"Winnie"係作家參考的小熊嘅家鄉"Winnipeg" "The Pooh"嘅由來先攪笑, 有一個講法話係因為佢成日拎住蜜糖有蜜蜂"嬲"住佢個鼻, 所以成日要"Pooh"走佢! 話時話點解冇跳跳虎!!! 不過我最唔明係點電視配音要搵把曾志偉聲去演譯, 同埋大家有冇發覺, 其實Winnie The Pooh同Mickey Mouse係同一把聲! 之後見到Sofia喺度同小朋友影緊相, 我哋諗住行埋去排隊, 點知Disney姐姐話已經截咗龍 所以唯有等下一場啦, 不過喺隔離有個10周年大舞台, 可以上去影番張相頂住先! 呢個整古做怪嘅呀芊匿埋喺Mickey Mouse隻手後面, 伸個頭出嚟跟住又縮番入去整蠱我 不過Daddy影相工夫勁難我唔到嘅! 行吓行吓哥哥又發現咗另外幾隻花蛋啦, 係灰姑娘呀! 點擊圖片放大 +3 喺我哋影緊相嘅時侯, 兩個工人姐姐已經幫我哋排緊隊玩咖排杯(Disney叫佢做旋轉杯喎) 不過都唔駛10分鐘已經差唔多到我哋啦! 因為媽咪好怕轉轉轉會頭暈, 所以佢唔敢玩喺外面等我哋! 我同呀芊一隻杯, 佢揀咗隻粉紅色嘅杯上去坐低, 呀芊起初有D緊張 當我喺杯外面想同佢影番張相, 佢就跟住我落番杯驚自己一個人坐喺杯裡面 哥哥就同工人姐姐一D都唔驚玩得好開心! 佢成個過程由開始好緊張咁撳住張櫈, 到之後開始試吓轉中間個控制幹, 最後兩隻手放鬆哂捱住杯邊, 真係好攪笑! 咖啡杯一停咗落嚟, 芊芊就即刻話「我想玩多一次」...哈哈哈 番出嚟見到有個咖啡杯佢哋兩個就行入去, 芊芊以為呢個都識得轉笑死我 離開咗咖啡杯, 我哋就望望個節目時間表, 因為我哋打算睇迪士尼魔法書房 點知啱啱趕唔切呢一場, 要再等下一場! 同埋嚟到先知原來下晝包咗場, 所以嚟緊嗰場係今日最後一場 跟住媽咪犠牲自己去排隊叫我帶佢哋去小小世界 因為上次去過小朋友同我都好鍾意, 所以今次Encore多次(主要係知道唔駛點排隊, 玩完出嚟啱啱好) 上次驚唔夠位拍唔哂小小世界, 今次原汁原味足本送上! 睇完小小世界我哋就即刻行去迪士尼魔法書房搵媽咪, 因為係最後一場所以超多人 企咗喺度足足20分鐘, 先開始入場! 入到去盡量搵咗個位坐低, 雖然有D遠, 但係小朋友都睇得好開心 Mickey Mouse出場啦! 個故事就係講Mickey唔小心打開咗本書 跟住小白Snowman唔知喺邊頁跌咗出嚟, 所以Mickey個任務就係要成功帶番小白去番佢自己嗰頁故事! 當然佢都要專登去錯幾版, 先至有其他表演睇!拍底咗兩段我覺得好好睇既片段分享! 我哋拎嗰張Fast Pass係去到2:35, 我哋睇完魔法書房差唔多2:20 行到過去啱啱好! 再等多大約5分鐘我哋就上到車開始呢個旅程啦! 我哋俾哥哥照顧一下妹妹, 兩個坐前頭! 當然裡面都冇咩好驚嘅嘢, 只不過我覺得全程好似唔太長, 同埋好多地方都太黑! 好快就到達終點lu...佢哋兩個都睇得好興奮! 點擊圖片放大 迪士尼有樣嘢我幾欣賞! 就係每個園區嘅遊樂設施, 喺離開時唔會迫你要穿過紀念品店先走到 一個早上3個幾鐘已經玩咗好多嘢, 差唔多2:30都係時侯去開餐啦! 醫飽個肚我哋就繼續下晝個花蛋節旅程 仲可以同公主病嘅公主Sofia一齊合照啦! 我專登叫人俾多碗芝士粉，因為知道芊芊無論食乜嘢都鍾意落芝士粉 哥哥好快食完就跟住捉住我，叫我快D同佢去搵花蛋！ 途中又遇到有人派貼紙，唔執輸嘅佢梗係又去拎咗幾張啦！ 頭先我哋一齊影相個10週年大舞台，原來台嘅背面都咁靚，可以襯埋城堡影番張相！ 其實呢個都係一個唔錯嘅影相位，可能好多人都會錯過！ 我哋家小姐仲喺度慢慢品嚐緊佢午餐嘅時侯，我就叫佢先過嚟同Sofia影番張相先 因為Sofia就喺我哋食緊嘢嘅地方隔離，排隊都近D！ 但係哥哥就好緊張，見到Sofia即刻好怕醜好唔自在... 因為呢個嘢一見到靚女就會好想匿埋 其實我想話俾佢聽，裡面嗰個唔一定係女仔嚟㗎，不過廢事破壞佢嘅美夢 Sofia真係好細心，其實一路見住有人行前同佢影相，都唔知自己要擺咩姿勢同Sofia影相，只係識得同佢近距離揮手或者想握手！ 但係Sofia就陪住佢哋，擺埋Pose叫佢哋一齊做，等大家都冇咁尷尬！ 佢見到呢個哥哥咁怕醜，一於上前抱住佢...哥哥即時面紅到出煙 喺附近我哋又搵到花蛋啦！我諗咗好耐究竟佢哋係咩角色 諗諗吓終於發現佢哋係維尼裡面個對袋鼠母子 之前見唔到嘅跳跳虎原來喺上面 嘩...仲有呢個超細粒嘅小仙子，原來匿埋咗喺城堡嘅上面，真係一唔留神都搵佢唔到 之後撞到一個職員哥哥，佢問Hysan小仙子花蛋喺邊度，已經一早搵到嘅哥哥當然呢個時侯懶醒話俾人知喺邊啦 職員哥哥見佢咁醒就獎佢貼紙，但係我哋見到小飛象貼紙第一個自然反應「又係呢張？」 跟住佢見到我哋已經有，就非常細心叫我哋喺度等一陣，然後自己跑去搵同事問吓有冇其他款式嘅貼紙 等咗2分鐘度佢就跑番嚟搵我哋，送咗呢幾張小仙子貼紙俾我哋，哥哥即刻好開心！ (通常有新嘢都會特別開心，之後已經放埋喺袋度唔記得咗...) 呢一邊又搵到一隻小白Snowman花蛋！ 之後我哋就過隔離米奇幻想曲玩，第一次我哋嚟嗰陣唔夠時間玩錯過咗，今日咁少人就入去睇吓 入去門口就見到上面又有一隻魔術師花蛋啦 兩個嘢帶上3D眼鏡整蠱做怪，話時話其實呢次係佢哋第一次睇3D電影！唔知佢哋會咩感受呢，尤其係芊芊唔知會唔會睇到頭暈呢？ 入咗場準備開始啦！ 芊芊周不時除低眼鏡然後望吓發現點解咁多個影嘅？ 之後去到有一幕有好多水花噴出同埋有香味嘅蛋榚，佢哋都好開心！事後問番哥哥佢以為D水係上面滴落嚟... 跟住又有一幕有好多寶石喺度飛嚟飛去，芊芊就搵隻手仔去捉佢，但係捉極都捉唔到！ 見到阿拉丁喺側邊飛過，芊芊又同佢哋Say Hi！仲想上去坐張墊，真係超可愛！ 其實每次見到佢哋嘅第一次接觸些新事物嘅反應，都會覺得佢哋好純真好簡單，相反大人好多時侯都太執著諗嘢太複雜了 離開咗米奇幻想曲之後我哋就行去前少少嘅童話園林！外面睇以為只係一個公園仔唔值得入去，但係... 我哋見唔駛排隊就索性入去行個圈出番嚟啦 一入到去就見到長髮公主個城堡模型，其實園裡面每一個模型都做得好精緻好靚！ 當中有好幾個主題模型前仲有個手掣可以俾遊客控制，有少少互動效果㖭！ 大家睇吓我影嘅每一個童話故事模型！ 點擊圖片放大 +10 穿過童話園林我哋又走番出去搵花蛋，喺明日世界入口近許願洞就見到小矮人嘅花蛋 嚟到探險世界, 嘩...Nemo 同 Dora 差D見唔到！ 今次到哥哥眼利，佢發現到丁滿彭彭嘅花蛋！ 點擊圖片放大 +2 去番城堡嗰邊又俾我哋遇到Elsa，見到冇咩人排隊所以叫哥哥同佢影番張相！不過妹妹就唔肯同佢影，因為妹妹話唔想要真人，要假人....(即係好似Sofia同Mickey嗰D佢先肯影) 差唔多到5:00，最後嚟到明日世界 芊芊一入到去見到太空飛碟就話想玩！於是我同芊芊就排隊玩 芊芊好開心就坐咗上去飛碟度準備起飛啦 因為哥哥唔想玩，所以呢個時侯媽咪同哥哥就去周圍搵花蛋 等我同芊芊玩完之後我哋就走去睇6:00開始嘅獅子王慶典 起初入到場都唔係好知究竟睇咩？喺度諗唔通會有獅子走出嚟，好似馬戲團咁...但係又冇嘢圍住，如果真係有獅子出嚟咪好危險？ 原來係一個歌舞劇表演，但係佢嘅機動大象同長頸鹿嘅造型都似，像真度好高！ 不過獅子王森巴同其他角色變咗係真人演出，感覺有D怪怪哋 終於等到獅子王爸爸出場啦，我同媽咪都研究咗好耐，唔知道究竟隻獅子上半身裡面係真人扮定係全隻都係機動.... 點擊圖片放大 見到丁滿同埋彭彭就最開心！佢哋一唱首歌就會記得套卡通片 因為我工人姐姐鍾意史迪仔，所以之後我哋就行番去明日世界度睇史迪仔，而呢一場剛好係廣東話版 其實我聽好多朋友講，佢哋嚟迪士尼都入過嚟睇史迪仔，佢哋話覺得應該好無聊 我哋等咗約10分鐘度，之後入到去一個小空間好似迷你影院咁 最初我同大家一樣以為應該好悶，只係睇住熒光幕裡面有隻史迪仔 但係跟住發現佢原來係Real Time同大家對話 而且扮史迪仔呢個仔仲要好有急才，因為佢要同現場朋友對話同埋要夠攪笑 如果佢一日做咁多場其實都難再咁辛苦，仲要有英文普通話版，唔知佢會點玩法呢？ 雖然史迪仔對話未必喺迪士尼咁Hit，但係起碼佢肯定係每次嚟都有唔同嘢發生嘅一個設施！ 巴斯光年星際歷險出面隻大巴斯光年唔見咗lu... 只係剩番一個背景可以影相！本來諗住離開樂園，但係發現巴斯光年星際歷險冇人排隊所以又直入玩一轉 大矇嘅我一邊玩一邊影相，玩完之後唔記得咗睇吓自己幾多分 最後我哋睇埋晚間巡遊就真係離開樂園lu... Photo by CANON 5D Mark III, Len | EF 24-70mm f/2.8L USM 呀劍評分: 10分 呀劍評語: 芊芊最開心係可以同Sofia影相，真係好了解遊客識得擺埋Pose教人影相！玩過史迪仔對話覺得好新奇得意！全日玩得超級滿足 迪士尼花蛋節 簡介 春日來臨，朝氣蓬勃；藉着這個生機萌發的春日，首次呈獻以迪士尼花蛋為主題的春日慶祝活動。整個樂園遍佈色彩斑斕、設計獨特的花蛋，誠邀所有賓客投入這個耳目一新的花蛋世界，迎接生氣勃勃的Happily Ever After春日！你可額外選購多項全新推出的「星級體驗」，在這個「迪士尼花蛋節」，增添春日假期的樂趣。 https://www.hongkongdisneyland.com/zh-hk/events/springtime-celebration/ 地址 香港迪士尼樂園，佢自己就已經係地址 樂園開放及節目演出時間表 https://www.hongkongdisneyland.com/zh-hk/calendars/day/ 費用 樂園門票 https://www.hongkongdisneyland.com/zh-hk/tickets/ https://hongkongdisneylandtickets.disney.go.com/disney/zh_HK/ParkTickets/OneDay?Adult=0&Child=0&Senior=0 奇妙處處通 https://www.hongkongdisneyland.com/zh-hk/magic-access/ 交通 港鐵 https://www.hongkongdisneyland.com/zh-hk/guest-services/mtr-disneyland-resort-line/ 電話 https://www.hongkongdisneyland.com/zh-hk/help/phone/ (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
