今日可憐的妹妹病咗, 原先計劃一起來演藝學院的開放日 結果只有我跟哥哥來了! 但係都玩得超滿足超開心! 我哋10點多就乘港鐵直接到達灣仔站C出口 只需步行10分鐘就到演藝學院 仲記得對上一次嚟都已經十幾年前lu... 呢一日未嚟之前我已經早早就在網上下載咗呢張節目表 因為喺整座演藝學院每個地方都有唔同類型既表演 所以要跟番唔同時間去睇你想睇既表演 我哋嚟到既時侯差唔多十點半 呢個時侯勁少人, 多數都係演藝學院既學生仲喺度準備緊! 入到裡面我哋已經預先決定咗第一個行程就係去睇人唱大戲 出到去平台花園發現有幾個攤位 今次除咗有唔同表演可以睇之外, 仲可以去指定既地方打咭儲印仔, 就可以換到禮品! 再繼續向前行就見到個舞台 我哋坐低睇咗一陣 因為起初以為唱大戲既人都會著哂戲服出嚟, 但係原來就咁企喺度唱 唔好話Hysan, 就連我都覺得悶啦...唔知係咪一定老咗先會愛上睇大戲呢? 之後沿路行番出去有一個創作面譜既攤位 Hysan就坐低咗慢慢畫, 咁我就可以再計劃一下下晝既節目行程 哥哥揀咗一個孫悟空面譜嚟畫, 但係唔知點解油油吓, 我覺得都幾恐怖! 依家仲日日放咗喺屋企, 真係行過唔記得望到驚嚇度都真係爆哂燈! 點擊圖片放大 由於個面譜上面既顏色仲未乾, 所以姐姐建議我哋放喺度曬乾下晝再過嚟攞! 畫完面譜我哋就沿住扶手電梯搭上去3樓演奏廳 因為有樂器表演, 當時個時段係表演緊管弦樂 沿路望番落去都可以多人起上嚟! 每一層都有好多唔同Department去展示同介紹佢哋既作品 呢個似係道具組! 好鍾意個進擊巨人頭 一路行見到有戲服部, 舞蹈部...佈景部等等 去到最尾撞到兩個姐姐著住民族服喺度派傳單 仲見哥哥咁怕醜主動問佢「可唔可以同我影番張相呀?!」 P.S. 之後到下晝我哋在另一個地方又再一次撞見左手邊呢個荷蘭造型姐姐 行到走廊盡頭見到一個一個既舞台佈置模型 真係做得好仔細好靚! 哥哥一路嘈住話要番屋企做番個...(滴汗) 點擊圖片放大 嚟到三樓演奏廳, 我哋等咗幾分鐘後就入去坐低(因為當時有表演正在進行中) 我哋睇咗幾個表演, 哥哥不斷大讚好好聽! 我哋聽咗Saxophone色士風, Clarinet單簧管等 因為呢度其實係唔俾人影相, 所以我偷偷哋影咗一張就算喇! 大約聽咗半個鐘頭, 我哋又落番去地下大堂欣賞其他節目 因為今日演藝學院既開放日唔單止喺本院有表演, 喺薄扶林既伯大尼學院都有其他節目 那裡都係Check-in打咭地點之一, 所以我哋希望搭到第一班專車上去 因為離開車時間尚有15分鐘, 所以我哋在附近行一行, 睇吓樂隊演奏! 轉個角仲有D油畫同掃描睇! 之後喺門口隔離又發現到一部影相打印機 只要你在演藝學院周圍影一張相然後用whatsapp send出去佢指定號碼度 就可以拎番兩張Polaroid size既相片! 我哋近近哋就係呢個backdrop做背景影咗張selfie 跟住一send去俾佢, print出嚟! 得咗...成個過程都唔駛1分鐘 我見仲有15分鐘先有車, 所以去咗黑盒劇場度睇吓有咩睇! 原來有中國戲劇武術睇! 佢哋都係一年級生既學生 所以表演既時侯都仲有少少爛Gag同失手...好青春呀! 點擊圖片放大 我好留心架, 佢哋表演既係「飛腿」「平腿」同埋「旋展」(以上只是同音,應該有錯別字!) 睇咗15分鐘我哋就急急腳行番出去學院門口搭上第一班專車上去伯大尼 (當我哋下晝番落嚟既時侯已經見到超長人龍....) 呢個開放日真係太多嘢睇! 下次再同大家介紹下晝行程節目 離開演藝學院我哋搭專車上到伯大尼校園 繼續欣賞開放日既節目, 下晝既旅程出發lu! 我哋搭住架專車上到嚟伯大尼大概用咗15分鐘時間 落車點近惠康劇院, 我哋就直接先行入去 因為距離歌劇表演開始仲有15分鐘, 所以我哋就搵個地方坐低食少少嘢(預備咗D蛋榚) 可能部份朋友都知道呢度前身就係牛奶公司牛棚 所以呢度都有兩隻牛雕塑放喺度 然後職員安排大家在某處排隊入場 因為演員在內rehersal超時10-15分鐘 原本1:15開始的表演, 結果差唔多到1:30先可以入場! 哥哥見到地毯上面有D腳印就跟住踩玩一玩! 跟住又走到去屏風後展板後面匿埋想嚇我...真係冇佢咁好氣 我哋選擇咗坐第二排, 因為驚第一行會太過前 之後發現原來都差唔多, 攪到影相仲要避開人頭... 一開始就做咗幾段懷舊浪漫愛情短劇 哥哥一聽到演員對白講「I LOVE YOU」, 即刻瞌住耳仔唔聽 真係笑死我! 我諗哥哥開始大個仔, 識得尷尬! 去到呢段個男仔捉住女仔對手示愛 哥哥更加頂唔住....我同佢講Daddy都係咁同媽咪同佢哋表達愛, 唔需要怕醜! 之後開始有D solo既演出同歌舞表演! 哥哥就即時放鬆哂! D歌好好聽...而且跳得好好睇! 點擊圖片放大 +4 去到尾聲大家一齊合唱<<Singing in the Rain>>! 最後一齊謝幕! 每一次睇舞台劇或歌劇, 去到謝幕我都會有少少感動...因為真係睇見每一個人都好努力同埋投入演出 離開惠康劇院我哋行上斜路去到上面的伯大尼教堂睇A Cappella, 即係無伴奏合唱 呢個教堂係18世紀時建, 係香港法定古蹟嚟架! 裡面唔算大, 坐得唔多人! 但係真係好靚好宏偉! 對上一次嚟影相都差唔多有十年多 大家其實平時都可以到網上買飛參觀同報名導賞團! 呢個表演我覺得差少少, 唔係因為佢哋唱得唔好 因為佢哋都係清唱, 人多又開住度門! 聲音不夠集中, 其實我都唔係太聽到佢哋唱咩 同埋佢哋多數都係選擇咗D流行曲嚟唱(可能咁啱我去呢個時段係咁) 之後我哋見專車未到, 我哋就行去伯大尼博物館度逛一逛! 哥哥對其他嘢都冇興趣, 唯獨係對住呢個伯大尼模型情大獨種! 呢個相信係廚房(唔好意思我冇詳細去睇介紹), 哥哥喺度扮砌菜煮飯 話咁快我哋就搭番車落去演藝學院, 睇吓仲有咩睇同玩! 我哋先去番頭先平台花園拎番個面譜! 嘩....哥哥帶咗上去之後真係幾恐怖, 似個變態殺手多D 最後我哋冇特別既節目計劃要去, 就跟住我哋未打咭的地方行去 去到1樓這個打咭既地方, 原來係舞台及製作藝術學院 由呢幾度牆合併出嚟既"welcome"字已經覺得好特別! (等咗好耐先至冇哂人可以影到呢張相) 沿路行入去兩邊都放滿不同既畫! 嘩......好大好大呀呢個地方, 以為自己去咗電視城(雖然我未去過) 點擊圖片放大 呢度放咗好多唔同既畫, 好似去咗個藝術館咁 起初都會覺得佢哋D畫咁樣周圍放, 唔知驚唔驚俾人整污糟! 不過入到嚟參觀既朋友全部都好斯文好守規矩 就算想影相, 都會好有禮貌咁叫你借一借, 又或者同你想影相既時侯, 自己會避開鏡頭! 到呢度就係造道具既地方! 有個小小的工作坊, 可以俾每個入場既朋友試吓雕刻製作 呢度有個DIY木馬! 有個學生哥哥邀請Hysan可以坐上去, 仲好有細心見到哥哥手上拎住面譜所以幫佢拎住先 之後仲教哥哥要腳踩住隻木馬以免危險 玩完仲扶番佢落地下! 超有愛心 (一般人都會嚴小朋友麻煩, 想佢快D玩完就趕佢走) 最後一個打咭地點我哋嚟到服裝部! 呢度真係放咗好多衣車同布料! 仲有一個好大既服裝間 今朝一早見到個姐姐喺度教人製作鈕扣! 我同哥哥都排隊一人做一粒, 當然我做嗰粒就係送俾妹妹啦! 姐姐先叫我哋揀一塊鍾意既布料, 然後逐個步驟教我哋製作 點擊圖片放大 Yeah! 製作完成 最後我哋到大約4:00就離開了, 在外面天橋附近都設有一個小舞台 一班年青Band友喺度演唱多首流行曲!! 我哋行上天橋睇咗一陣就真的離開了! 因為中午只係食咗個蛋榚, 所以哥哥好肚餓! 我哋就啦啦聲去搵個地方醫醫肚! 總結今日演藝學院呢個開放日, 實在係「讚」! Photo by CANON 5D Mark III, Len | EF 24-70mm f2.8L USM, iPhone 5s 呀劍評分: 9分 呀劍評語: 一早流出時間表給公眾, 可以預早安排每個時段的節目! 即使沒有預備的大家, 基上行到每一個場地房間, 都會有不同種類節目正在進行, 實在太充實! 而且每個學生都很有禮貌, 讓所有到場的朋友都逛得很舒服! 香港演藝學院開放日2016 簡介 香港演藝學院開放日2016共準備了多項由戲曲學院、舞蹈學院、戲劇學院、電影電視學院、音樂學院和舞台及製作藝術學院精心呈獻的精彩節目，包括各類表演、公開課、大師班、示範、導賞團及工作坊讓市民親身體驗表現藝術的樂趣，讓小朋友和家長亦樂在其中。 地址 香港灣仔告士打道1號 開放日期 2016年3月6日 時間 上午10時至下午5時 費用 免費入場 --------------------------------------------------------------------------------------------------------------------- 伯大尼校園 簡介 伯大尼於1875年由巴黎外方傳教會建成。立法會於2003年3月，批准香港演藝學院為伯大尼及隔鄰的牛奶公司牛棚進行復修工程，改建作為古蹟校園。 地址 香港薄扶林道139號 入場方法 公眾須預先在快達票售票網購買法國巴黎銀行伯大尼博物館入場券，憑入場券可免費享有約半小時的免費伯大尼導賞團服務（若導賞團所參觀之地點有婚禮或其他活動舉行將不會開放） 每小時入場人數約為50人，請預先訂購入場券。 票務資料及購票方法 每人港幣25元，十人以上購買同一時段可享八折優惠 – 每人港幣20元（大小同價），票價用作資助古蹟營運。 門票現已在香港演藝學院、香港會議展覽中心、藝穗會、亞洲國際博覽館及通利琴行之快達票售票處發售。 網上訂票 快達票網站 hkticketing.com 購票熱線 3128 8288 交通資訊 場內只設極少量以八達通收費之公眾車位（主要供殘疾人士使用），請儘量乘搭公共交通工具前往，私家車請以八達通進入落客區。 巴士路線：4, 7, A10, 37A, 37B, 40, 40M, 43X, 46X, M49, 71, 90B, 91, 970, 970X 專線小巴路線：22, 22S, 23, 31, 36。 (以上資料更新至文章當日)
