輕輕鬆鬆遊中央圖書館! 一邊睇書仲可以入去玩具圖書館玩個夠 【呀劍萬帥facebook專頁 http://www.facebook.com/kimfamilytraveltips】 其實如果要嚟玩具圖書館玩就最好事先一星期前電話預約 職員會口頭上俾一個預約編號你, 不過唔記得都唔緊要, 可以當日到職員面前講番小朋友名字就可以, 職員會俾番張登記紙你 點解我知? 因為我就係唔記得咗個編號! 哈哈哈 無錯, 只需要預約時講低小朋友名字就可以(英文名同姓氏就可以) 因為我哋預早咗45分鐘到, 諗住入去玩之前, 都喺圖書館睇吓書休息吓! 你睇哥哥個樣就知佢扮緊書裡面隻大眼狸猴 話咁快就到4點, 我哋3點55分就拎住張登記紙去到門口等 基本上冇職員安排人排隊, 所以大家都係亂企, 不過都冇人會爭先有推撞 不過你唔好以為入先冇著數! 因為玩具圖書館裡面其實有個Counter可以向職員借取玩具玩 如果你遲入去, 你想要既玩具就會俾人借咗架啦! 所以我勸大家早少少去到近門口位置等侯 哥哥一入到去好心急即刻除鞋跑入去玩, 芊芊見哥哥咁心急佢都急起嚟, 哥哥就跑咗上去閣樓, 爬嚟爬去.....佢又問我「Daddy, 我可唔可以用四隻腳行呀?」 真係冇哂佢乎, 真係男同女既分別! 我出到去Counter見到有好多玩具借, 但係一同入嚟玩既家長好似好熟地頭咁, 所以好多好似火車路軌, 木製玩具等正嘢已經俾人借哂 媽咪叫我借一個BB俾芊芊玩, 唔知係咪真係女仔天生有母性 佢真係照顧得好好, 好錫個BB, 好鍾意玩! 我睇住佢湊個BB都好Warm 但係BB塊面已經俾人畫花哂, 成個魔鬼怪嬰咁, 都唔知點解芊芊會鍾意...哈哈!!! 佢餵奶餵得超好! 唔捨得佢第日嫁出去做咗媽咪個畫面浮哂出嚟 你睇芊芊照顧得個BB幾精神幾開心, 仲識得笑! 好在我都借到一個木製玩具俾哥哥, 佢都好鍾意, 砌出唔同軌道碌粒波子 跟住芊芊拎咗架百佳車(我哋係咁稱呼架手推車) 然後扮去超巿買嘢! 佢買咗好多夾餅同格仔餅放哂落百佳車度...仲將BB都放埋落去 起初芊芊好細心, 佢將BB放落百佳車度驚佢撞親個頭, 就拎埋個枕頭墊住 雖然好細心, 但係最後BB都變成咁! 場內環境都算大, 入嚟玩既名額剛剛好唔會太多人, 唔駛爭嘢玩! 點擊圖片放大 +4 佢每15分鐘都會有音樂提示你玩咗幾耐, 每一節45分鐘, 有15分鐘係清潔等下一場既朋友玩得乾淨又舒適! 玩之後我哋就離開圖書館去尖沙咀繼續玩啦! 下一站>>CLICK HERE! 【親子好去處】尖沙咀 玩具亭 Toys Stop @K11 x 林東鵬 Photo by iPhone 5s 呀劍評分: 7分 呀劍評語: 得閒放假又唔想去咁遠, 嚟呢度睇吓書, 同埋中間可以預約一節玩具圖書館真係幾唔錯架! 玩具圖書館 簡介 玩具圖書館位於香港中央圖書館二樓，是全港首間公共玩具圖書館，服務對象為八歲或以下的兒童及家長。館內共設四個主題遊戲區，分別為嬰孩遊戲區、模仿及想像遊戲區、創意遊戲區及智慧遊戲區，特別按不同年齡兒童的發展需要和遊戲模式而設計。 玩具圖書館分段開放，每節45分鐘，最多可容納40人。讀者可在使用服務前七日內親臨玩具圖書館或致電2921 0386 預約遊戲時段，每人每日可預約一節。讀者可瀏覽玩具圖書館的開放時間及使用時段了解詳情。 地址 香港銅鑼灣高士威道66 號 開放時間 星期一、二、四、五、六及日：上午十時至下午九時星期三：下午一時至下午九時公眾假期：上午十時至下午七時 電話 3150 1234 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
