真係城巿綠洲！喺樂富呢個地方居然可以搵到一個大草坪 玩完又可以行幾步落番去樂富廣場High番個Tea 今次真係要推介俾大家！ 【呀劍萬帥facebook專頁 http://www.facebook.com/kimfamilytraveltips】 水庫草坪真係買少見少，因為好多都俾政府封咗 但係今日去呢個樂富海水配水庫草坪就仲去到！ 我哋今早起身慢吞吞咁起身再落街食個早餐 約咗朋友喺樂富圖書館門口等！ 由港鐵站行出嚟轉左向樂富廣場上斜咁行 行到盡頭就會見到有條樓梯 樓梯轉彎位就會見到呢個咁大嘅指示牌 上到去接埋D朋友仔就沿住聯合道對面嘅富安街直上山 沿途見到右手邊有一條樓梯，仲插住好多塊警告牌喺度，有電電好驚！ 行山必備/指定動作：執樹枝！ 哥哥好開心周圍跑跑跳跳！ 點擊圖片放大 行到呢個位置會見到水庫入口 但係有鐵閘封咗！喺呢個時侯以為咁黑仔連呢度都俾政府封埋 但係我喺facebook見到有人11月先嚟過！ 不過大家唔駛驚...原來只要轉左繼續行就可以去到 喺呢個時侯提提各位右手邊有個公廁，大家如果人有3急就去咗先 轉左再行前兩步就會見到呢個水庫閘1960(老過我呀) 再行前2分鐘就會見到一個大轉彎位同埋有條小斜路行落去 原來係一個小涼亭，涼亭俾樹包圍，我哋都去到時都見有兩個人喺度瞓緊覺 轉埋呢個彎行上去就見到大草坪啦 呢度個正確名稱叫做「樂富配水庫休憩花園」 嘩Waaaaa！真係好大喎 以我估計差唔多有三分二個正規球場咁大 今日1月1號正直冬天，但係見到草坪嘅草都好靚！ 最重要係我成日講嗰樣「最緊要少人！」 喺我連舖地下都未預備嘅時侯 就即刻掉個足球出嚟俾佢哋玩，唔好阻住我哋Set場！ 呢個草坪最特別地方係中間分出3條磚路 哥哥之後就走去爬樹！同朋友仔執樹枝，呢度仲有幾棵樹斬咗可以玩梅花樁 點擊圖片放大 我哋喺大樹下舖咗地墊野餐！ 媽咪朋友送咗D小禮物俾小朋友一齊玩 芊芊見到有條已死甲蟲跟住執支樹枝去「了」佢 媽咪們晒冷！喺呢D時侯通常女人都會將平時唔會做俾老公食嘅嘢做出嚟同大家分享 小朋友就最開心不過！唔駛做，又食又拎！ 總括我帶住兩隻嘢周圍去咁多地方 最開心笑得最真實就係在大自然遊玩！ 即使去甚麼甚麼嘉年華之類活動，當玩完機動遊戲之後停落嚟 歡笑都跟住一齊停落嚟，留低嘅就只有倦意同埋扭計 點擊圖片放大 +3 相反每次嚟到大自然，佢哋一來可以自動波自己去玩去探索 二來唔會見到佢哋話攰 第三一定唔會出現嘅情形 －扭買玩具扭玩呢樣嗰樣！ 點擊圖片放大 呀芊你實在太靚我只有放哂咁多張相！ 點擊圖片放大 +3 哥哥同呀芊喺度玩掟飛標！(芊芊你做歪口歪面) 呢個係咩姿勢呢？少林功夫定醉拳 喺呢度最麻煩一樣嘢就係去廁所 小朋友輪住話去廁所，我要帶佢哋去完一個又一個 2016第一日梗係要嚟番張全家幅！ 喺呢度可以望到過去隔離，我估係水庫天台卦！ 除咗周圍跑就只有周圍跑！一個大地方任佢哋跑走跳...一個字「爽」 點擊圖片放大 +2 跟住仲拎住部相機影螞蟻，搵小昆蟲！ 唔知佢哋喺度講乜？芊芊好似鬧緊哥哥咁 連我都瞓咗喺草地度倒轉同佢哋影相，加埋今日咁好嘅天氣真係好舒服！ 玩到三點幾我哋就準備落番山 上山落山都只係十五分鐘 落番嚟樂富廣場就去茶木High番個Tea 下一站>>CLICK HERE! 【飲飲食食】樂富 樂富廣場 茶木‧台式休閒餐廳 TeaWood Taiwanese Cafe & Restaurant 全部都好好味！！！！！ 點擊圖片放大 +4 Photo by CANON 5D Mark III, Len | EF 24-70mm f/2.8L USM 呀劍評分: 9分 呀劍評語: 唯一唔方便嘅地方都係去廁所，每次都要行差唔多5-10分鐘來回 樂富配水庫休憩花園 簡介 樂富配水庫休憩花園位於廣播道附近，擁有一片自然草地。連接樂富公園, 花園可供遊人散步休憩。公園内的山坡上亦有塊小墓碑。 地址 香港九龍樂富富安街 開放時間 早上七時至下午六時 免費 交通 港鐵「樂富站」B2出口，沿指示牌步行約15分鐘。 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
