今日終於嚟見識一吓呢個3D館！傳聞入場費只係$20(後尾先知原來係小朋友價) 而且上次去完山頂個3D館之後都覺得幾好玩，所以今次嚟MegaBox玩多次 【呀劍萬帥facebook專頁 http://www.facebook.com/kimfamilytraveltips】 我哋一口氣上咗幾條電梯就嚟到九樓 喺門口已經見到有幾架掘泥車 原來都係呢個恐龍館嘅遊戲之一 唔好理咁多，見到好少人排隊即刻排咗先 然後我再去門口買飛 買飛可以買成人或小童，就咁入場星期一至五(大人都係$40，小朋友就$20) 星期六及日(大人$60，小朋友$20) 但係如果你想買Package嘅話就有埋Coins可以玩場內遊戲 $100 (成人＋小童＋5 Coins) 如果就咁買Coins就十蚊個(買10送1) 我買咗兩個套票所以有10個代幣 因為芊芊未識玩個掘泥車，所以只係俾哥哥玩，但係已經用咗4個代幣lu 好在芊芊冇扭計話我又要玩...佢似乎對掘泥車一D都冇興趣 點擊圖片放大 +2 主要嘅任務係要掘出恐龍骨同恐龍蛋 不過小朋友都係掘吓掘吓玩沙Only 入到去場館都唔算太多人 我哋即刻埋位開始影相 不過呢度嘅場景都比較多全崩位 而且燈光好差，大家都睇到地下好明顯同牆上嘅光暗唔同 最完美嘅3D場景係燈光都可以做到牆同地下連成一線 只要燈光打得唔好，牆腳線太分明影出嚟就唔會靚唔夠似 咁多個場景我覺得呢個算係唔錯 影落去都幾似真係坐咗喺架車度！ 到呢隻龍兩個都希望可以坐上去 所以輪流坐上去都影番一張 呢條尾其實都爛咗少少 D人真係好冇公德... 點擊圖片放大 +2 估唔到佢哋都唔駛點講就自己識得埋位 而且仲扮得好似，手放嘅位置都好準！ 另一邊都放咗兩隻蛋 佢哋又走咗入去影多次 呢張好似當日喺山頂廣場個3D館影嗰張 不過呢度冇咗條繩(原來Day1係有條繩縛咗係隻恐龍角度) 呢張又係好啱位，你哋兩個真係好叻！ 芊芊呢張你做咩突然冇哂表情 原來佢俾周公急Call開始好眼瞓 呢個位置有一個職員姐姐專幫大家影相 影完之後可以拎番張飛去櫃位買番 但係都歡迎大家俾部機佢幫你影 其實場景唔算好多，數埋都係10個多D 之後身上仲有6個代幣，2個俾咗芊芊去跳充氣床 點擊圖片放大 4個就俾哥哥去玩恐龍電動車 電動車都比較多人玩，都差唔多等咗20分鐘 喺上去電動車之前同放喺附近嘅恐龍影吓相先 電動車每一節係玩4-5分鐘，都係工作人員人肉計時 點擊圖片放大 +2 其實個場真係做得好求其，個轉彎位好窄！ 側邊只係用D地盤用嘅網隔開排隊嘅人 有幾個圈有小朋友撞牆，就一架一架喺後面撞埋過 因為小朋友又唔識得熄咗架車先，所以一路撞上去差D就撞去排隊嘅朋友度，其實真係幾危險 點擊圖片放大 最後玩完電動車之後我哋就出番去搵媽咪同芊芊 沿途見到冇人玩我哋又上去影番幾張相 跟住又去IKEA度食番個下午茶先！ 點擊圖片放大 玩完之後好肚餓呀！撞啱樓下有IKEA就去IKEA餐廳睇吓今期有咩平嘢食先！ 下一站>>CLICK HERE! 【親子餐廳】IKEA @MegaBox Photo by CANON 5D Mark III, Len | EF 24-70mm f/2.8L USM 呀劍評分: 7分 呀劍評語: 講3D館佢唔係最靚唔算最特別，但係至在夠平，簡單嚟講佢係一個大集會嘅3D館，驚你剩係玩3D唔過癮，仲要加埋其他用代幣玩嘅遊戲，由3D場景到其他配套遊戲質素都好差，所以平價先係佢主打賣點(但係佢已經由起初大小同價$20變到依家貴咗幾倍，但仍然平過其他！都算係咁)對於一般家庭放假嚟玩吓行街都係唔錯嘅選擇。但係我個人比較喜歡專業少少嘅3D館 註：最重要係佢官網吹到自己有好多樣設施，其實全部都係冰山一角仔，特別係兒童攀石牆，其實只係其中一個場景側邊有4粒嘢就叫做攀石牆，唔係啦卦！ 3D魔幻館 簡介 3D魔幻館座落於九龍灣MegaBox 9樓，佔地逾7000多呎，是香港咱間以不同動漫卡通及電影背景為主題的3D體驗館，除了各個3D場景，館內更劃分了五個不同區域，分別加入五種以恐龍為主題的遊戲，包括兒童探索區、恐龍化石區、充氣樂園，恐龍電動車及兒童攀石牆 地址 九龍灣宏照道 38 號 MegaBox 9/F － 3D 魔幻館 開放時間 10月17日－12月15日 星期一至日：上午10時至晚上10時 費用 星期一至星期五 成人 $40 小童 $20 優惠套票 $100 包括1張成人票，1張小童票及8個遊戲代幣 （ 星期六，星期日及公眾假期 成人 $60 小童 $20 優惠套票 $100 包括1張成人票，1張小童票及6個遊戲代幣 交通 九龍灣港鐵站A出口轉乘MegaBox穿梭巴士 網址 http://3dhk.com.hk/ 電話 2458 6032 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
