啱啱上晝去完禮賓府 點可以唔去就對面馬路嘅動植物公園呀！ 雖然唔知今次係第N次去... 【呀劍萬帥facebook專頁 http://www.facebook.com/kimfamilytraveltips】 我哋離開禮賓府之後行5分鐘左右 上一站>>CLICK HERE! 【親子好去處】中環 香港禮賓府 Government House 就過到對面馬路嘅動植物公園 我哋先去竹園探吓嗰隻米奇老鼠像先 芊芊一見到佢就嗌「Micky呀」！ 真係唔知邊個設計，諗到整個火寨米奇喺度 點擊圖片放大 行番出嚟之後就直接上去噴水池平台花園 但係突然曬起上嚟 所以同噴水池影咗張相之後我哋就即刻去下一個景點 點擊圖片放大 本來打算今次直接行去睇大猩猩先 但係芊芊唔知點解話要行另一邊！ 佢一口氣就咗好多好多級樓梯 行到去個石像面前同佢影番張相 俾著哥哥以前細個如果見到大舊黑鼆鼆(音: 蚊蚊)嘅人像一定唔肯行埋去 終於見到第一隻動物啦 睇睇吓Hysan仲想畫畫 起碼我想快D去睇其他動物 所以想叫佢不如一陣坐低先畫 但係諗諗吓既然佢有咁嘅興趣我應該要支持佢 於是就咁坐喺一邊度等佢畫埋幅畫先再行 點擊圖片放大 +3 畫畫吓畫嘅途中發現地下上面有兩隻昆蟲喺度大戰 一隻蜜峰同青蜓喺度打交 但係佔盡優勢都係蜜峰，最後仲咬甩埋青蜓個頭 真係好恐怖！但係小朋友就睇得好開心 之後佢哋兩個仲同我玩起伏匿匿上嚟！ 真係咁都可以玩一餐！ 我哋之後沿路上去兒童遊樂場俾佢哋兩個放吓電 另外一個(芊芊)已經就嚟想瞓著！ 途中見到好多唔同種類嘅雀仔！ 呢隻真係又似雞又似雀...唔知係咪喺度孵緊蛋 今次我哋只經過溫室，冇入去睇！ 始終小朋友對動物鍾情多於植物 跟住行行吓見到呢度仲攪笑 我第一個印象就係覺得佢好似一個離家出走嘅金毛邊青 呢度仲得意，唔講唔望起初以為佢係假嘅 再仔細睇真先見到佢原來佢識得郁 我同Hysan一見到呢隻就即刻諗起荒失失奇兵 跟住哥哥仲不斷咁扭計話要養佢 我都唔知佢係真係唔明定係專登撒嬌 好！終於嚟到兒童遊樂場 兩個嘢即刻之前扭咩都唔記得哂 一支箭9秒9跑咗上去玩 上到嚟都算幾多人！不過空間都算大所以唔會太危險 唔算好特別都係瀡滑梯韆鞦，咁多年都冇變 Hysan最鍾意就梗係伏匿匿啦！ 圖中係剛俾佢發現咗 當佢合埋眼數1-10我就一直企咗喺佢前面 佢一數完就見到我所以引唔住笑 真係乜都可以玩一餐！ 明明係老人家嘅健身活動又可以走埋去玩兩吓 (相中後面個小朋友仲勁...咁都可以爬咗上去) 芊芊真係人如其名 佢最鍾意就係玩韆鞦 仲一跟叫我推佢大力D然後番過嚟踢我 跟住就笑到見牙唔見眼 點擊圖片放大 +2 玩完之後我哋就落番去平台花園的通道過去大猩猩那邊 通道兩旁圍上咗木條，同埋掛咗D展版喺度介紹動植物公園嘅歷史！ 一嚟到呢邊就梗係要睇吓馬騮仔同埋長臂猿先啦 點知佢哋無端端打起交上嚟 最細個隻勁百厭，一路追住隻大的打 最後大馬尸騮一於少理自己爬咗去好高嘅地方避開佢 點擊圖片放大 跟住隔離呢邊就係長臂猿！呢隻金毛係女仔(我老婆話的) 佢話原來佢哋一開始都係黑毛 跟住到大個D會變金毛，如果係女仔就繼續keep住金色 但係如果係男仔就大大吓會變番黑毛 真係咁攪笑！？ 呢個哥哥一路睇唔肯走 跟住我同媽咪芊芊就入去隔離嘅教育中心望吓 由得佢自己一個繼續企喺度睇 (呢個哥哥成日都要同人唱反調，話走就要留多陣，話留多陣就嘈要走>.<) 入到嚟裡面見到好多豹皮標本 仲有一隻勁似真既1：1豹！ 點擊圖片放大 仲有好多骨嘅標本，見到魚，青蛙等嘅骨，都幾得意 跟住我哋行番出去見到有雪榚買 突然覺得又行得攰攰地，所以叫媽咪買番支甜筒食 芊芊拎住支甜筒即刻個樣都醒神哂！ 點擊圖片放大 妹妹好大方咁請哥哥食！哥哥就當然好驚死俾芊芊食哂 即刻有機會食就超大個口食一啖好大啖 食完芊芊都話「哥哥你咁大啖嘅？」 跟住到媽咪食.... 最快就到芊芊食最後一啖... 最後我哋嚟探一探巨型大猩猩！ 真係超大隻，但係佢一d都唔笨蕉，仲行動超靈活！ 喺個籠裡面爬嚟爬去完全冇失過手 好似洪金寶咁堅！ 點擊圖片放大 最後我哋打算去下一站香港公園 途徑平台花園見到有個外國人帶埋隻竉物盾臂龜嚟散步！ 即刻所有小朋友過去圍住佢嚟睇，又摸佢有個殻！ 芊芊又想摸又唔敢摸！ 哥哥就一路跟住行 個場面真係好攪笑！ 點擊圖片放大 +2 Photo by CANON 5D Mark III, Len | EF 24-70mm f/2.8L USM 跟跟吓隻龜都同主人走咗lu... 咁我哋就唯有出發去最後一站香港公園啦，不過要先醫醫個肚先 下一站>>CLICK HERE! 【飲飲食食】金鐘 L16 Cafe & Bar @香港公園 Hong Kong Park 呀劍評分: 7分 呀劍評語: 真係唔知第幾次嚟呢度lu...簡單講呢度一定唔會夠新界區農場咁天然，但係對於住巿區嘅一家大細嚟講，咁方便就可以見到動物，而且唔係一般你農場見到嘅豬牛羊馬喎！不過主要得猩猩馬騮同唔同鳥類，我就覺得如果可以再加多其他種類就好D！ 香港動植物公園 簡介 位於扯旗山的北面山坡，最高處海拔一百米，而最低處則為海拔六十二米。香港動植物公園佔地五.六公頃於1871年建成，當時名為植物公園，直至1975年正式易名為「香港動植物公園」，以反映對野生動物所作努力。其建築工程於1860年展開，並於1864年把第一期設施開放給市民使用。 開放時間 噴水池平台花園 上午5時至下午10時 溫室 / 教育及展覽中心 上午9時至下午4時30分 其他 上午6時至下午7時 入場費用： 全免 公園導賞團 公園免費提供以粵語講解的導賞團服務，由專人帶領遊人觀賞園內各項建設。每個導賞團約歷時兩小時，參加人數約為四十人。 詳情如下: 日期: 2015年9月6日至12月27日 (逢星期日) (2015年10月4日及12月6日除外) 時間: 上午10時30分至中午12時30分 集合地點: 香港動植物公園教育及展覽中心 地址 香港中環雅賓利道 交通 可達本公園的巴士路線： 從中環開出 3B, 12, 13 從金鐘開出 12A, 12M, 40M, 40P, 40 從銅鑼灣開出 23B 從北角開出 23 從樂富開出 103 或 港鐵中環站K出口穿過匯豐總行步行上山 網址 http://www.lcsd.gov.hk/tc/parks/hkzbg/index.html 電話 2530 0154 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
