今日見有一點時間，來了一個超短線行山 亦因每一次帶仔女番學時都會話「不如搵日行上呢個山睇吓囉」 所以摘日不如撞日就今日帶住Hysan芊芊，仲有嫲嫲一齊上去呢個石硤尾山 現時整座石硤尾山都經過晨運客自行建路，是石硤尾村民的一個隱世樂園。 【呀劍萬帥facebook專頁 http://www.facebook.com/kimfamilytraveltips】 石硤尾山有好多個入口 我哋當然揀咗平時成日番學的巴域街入口 大家亦可以選擇喺警察體育遊樂會到西洋菜北街盡頭的入口 沿住山腳聖方濟各小學的入口上山 過了健康院就見到有條樓梯上山 起初仲擔心唔知呀芊可唔可以行到咁高 點知我真係睇小咗佢 全程冇講過要抱，佢跟住嫲嫲同埋哥哥一級一級咁行上去 行到半路芊有講過話「嘩好攰喎！」 但係佢都冇同我講想抱 可能加上佢見到哥哥行得咁快，所以一步步咁追上去 當時都差唔多日落 打算行到上去玩半個鐘頭度就落番嚟食晚飯！ 行行吓仲可以擰轉頭俾我影張相！ 超叻女... 一路咁行上去大概10-15分鐘度就會上到頂 你會見到個閘冇得入 但係你只要轉右繼續行就會見到呢個隱世樂園 點擊圖片放大 +2 上到嚟見到一大片草地被360度大樹圍住 沿住草地邊環繞一周 你會見到好多新奇趣怪嘅嘢！ 點擊圖片放大 我所指嘅就係呢D健身設施 全部都係俾老友記享用嘅器材 最特別嘅係全部都唔係政府整俾大家 而係巿民自己熱心自發做出嚟 所以大家會見到所有設施都會貼住張咭「注意安全！自負全責！」 唔單止有唔同嘅健身器材，仲有人會喺度晾衫！ 大家見到每一樣嘢都會有種好Warm嘅感覺 有嘅唔係專業設備，有嘅係人情味，就算做做吓扭親都抵...>.< 但係我試過吓又觀察過每一件器材都並非揸流撻！好專業 我哋搵咗個位Settle down先！ 同佢哋飲啖水之後就開始放電喇 我帶咗個波嚟同佢哋踢 又帶咗一架輕巧人力發動嘅飛機喺呢度放！ 點擊圖片放大 +2 仲有一定係萬能嘅吹Bubble啦，去到邊度都用得著！ 跟住佢哋兩隻嘢居然走去玩人哋d嘢 掹住2個吊環當自己吊威也咁 其實人哋老友記都唔係咁玩呢樣嘢！唔好整壞人哋d嘢呀 點擊圖片放大 最後梗係要影番張Album Cover 先可以走啦！ Photo by CANON 5D Mark III, Len | EF 24-70mm f/2.8L USM 呀劍評分: 9分 呀劍評語: 可以算係鬧巿中嘅大自然，在石硤尾太子這邊居然有行山路線，除咗大家都認識嘅嘉頓山之外，呢度真係好特別，行到山頂見到所有巿民自己發自熱心的設施，你更感覺得這個社會只要有愛有人情味，真係可以唔駛要無能政府！ 交通 港鐵石硤尾站G出口步行5分鐘到山腳位置(聖方濟各小學過健康院見樓梯) 或港鐵太子站a出口步行8分鐘至警察體育遊樂會到西洋菜北街盡頭的入口 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
