Hysan 成日嘈住話要去釣魚 今日就達成佢個願望同埋舅父一齊去玩吓啦 不過佢哋咁冇耐性一定冇可能喺碼頭度等魚上釣 所以我哋今次去咗天水圍一家新開的釣魚場「幸福山莊」 我哋今日去完教會番屋企附近食個麥記午餐 跟住舅父就開車嚟接我哋 我哋用咗大概半個鐘頭就去到天水圍 不過條路都幾偏僻 去到天月路側有條路叫輞井圍轉入去就到 點擊圖片放大 呢度唔算太大 有一個弧形帳篷 裡面係供燒烤既朋友喺度BBQ 另外行條短樓梯上去就係釣蝦場! 因為釣蝦比較多人所以要留名排隊 不過都唔駛太耐, 大概半個鐘就有得玩! 行番出嚟釣魚場呢邊 有兩行浮台可以行出去海中心垂釣 一條係有欄杆另一條就冇 所以有小朋友的各位最好帶佢哋行出去有圍欄嗰邊 企喺浮台望番過去燒烤場的角度 今日好似變咗冬天咁 再加上嚟到呢度真係好大風 要同兩個小寶貝著番件外套先(呢排睇得多「爸爸去那兒」) 跟住我就去搵負責人問吓點收費 每位釣魚收費$80 按金$200, 租支竿$20, 魚餌另收費($9-18) 釣蝦$30／小時，包所有工具 佢哋魚餌全部都係一包包合成的, 只要用水開好似麵粉咁搓搓吓就用得 但係真係人手太唔夠啦, 所以我等咗好耐好耐佢先幫我Set到支魚竿 無錯呢度係仲可以燒嘢食! 不過食物選擇唔多, 同多都係D普通嘢! 最主要其實都係俾人釣魚釣蝦上嚟食啫! 開始釣魚啦! Hysan 拎住支魚竿真係似模似樣喎! 不過因為個職員開俾我哋既魚餌太濕 所以一路都包唔住個鈎釣唔到! 點擊圖片放大 +3 好多魚仔過嚟食！反而海中心一路都釣唔到大魚 芊芊剩係幫手將D魚餌掉落個海度餵魚 大家都釣唔到魚開始呆呆哋！ 小朋友以為一放魚餌落海魚就會即刻上釣 喺佢哋個觀念應該係同磁石釣魚玩具一樣 兩個冇嘢做就做吓怪樣俾我影相 芊芊一d都唔怕污糟繼續玩魚餌 佢當係泥膠咁玩! 跟住我哋發現唔係好對路 所以我哋轉番上岸邊嗰度釣 而且又安全d 但係估唔到原來岸邊仲.... ......仲多魚呀 轉眼間就釣到第一條魚啦！ 起初都係我幫Hysan拉條魚上嚟 到後來完全係佢自己扯佢上嚟 佢覺得自己好叻叻同埋好滿足 拎條魚俾表弟睇 表弟好驚驚唔敢掂條魚！ 相反芊芊一d都唔 驚 用手拍打佢！覺得超好玩 條魚好慘豬.... 點擊圖片放大 +2 有一次成功之後 Hysan好有信心繼續坐低再釣 之後大大細細都釣咗4-5條 其中一次好好笑 見到Hysan魚芉好似俾條大魚扯住行 舅母就拎定個大網諗住俾我哋裝住條魚 點知Hysan一扯上嚟係條勁細嘅魚毛，仲細過佢隻手仔 笑到我哋肚都「戀」埋！ 差唔多入夜，BBQ帳幕亮起燈後都幾靚！ 大家都差唔多執嘢走 但係Hysan都好想堅持釣埋最後一次！ 不過等咗好耐最後都冇，我估連舊魚餌都浸到冇哂味！但係佢今日都好開心 最後我哋冇要到d魚，因為一斤要$15，同埋我哋都係享受釣魚過程 點擊圖片放大 最後去釣蝦場度參觀吓 望吓人哋釣蝦！ 最後落咗去紅磡食晚飯！我哋叫咗條魚食 仲呃小朋友話係頭先我哋釣嗰條 佢哋都信....好攪笑！得我個仔問「我都唔見你哋有拎條魚俾㕑師？」 Photo by CANON 5D Mark III, Len | EF 24-70mm f/2.8L USM 呀劍評分: 7分 呀劍評語: 這裡有兩行釣魚浮台可以到達塘中心垂釣頗有特色，不過其他配套尚未算足夠, 只有釣魚及釣蝦, 燒烤選擇很少(始終唔係主力), 如果再加多少少兒童遊樂設施會比較好! 不過釣魚方式及場地很適合一家大細小朋友去! 幸福山莊釣魚場 簡介 一個釣魚人為了台釣而設計的釣魚塘利用浮台解決用魚塘圍邊的釣位不公平一個能達到競技魚量的密度希望香港台釣可以得以發展 地址 天水圍天月路輞井圍 營業時間 0800-2400，而蝦池的營業時間為1000-2400 收費 釣魚$80 凡持學生證，可獲半價，即$50 (正價$100的一半) 器材，魚餌等可自備或在本山莊租用。 器材租用: 魚竿 $20 太陽傘$20 魚餌$9-18 膠盤，魚護，膠櫈會免費租用。 釣蝦每小時30元 (包括蝦竿及餌) 釣到的蝦另外收費 每斤98元 我們會免費提供爐給你燒蝦 或給我們幫你泡制胡椒蝦或檸檬蝦 只需$30加工費 星期一至四 燒烤$98一位 6-11歲$58 6歲以下小童免費 星期五至日及公眾假期 燒烤$138一位 6-11歲$88 6歲以下小童免費 交通 天恆輕鐵站及附近的巴士然後步行直入輞井圍 (因為其實沒有交通工具可直接到達) 電話 6142 2917 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
