從來都冇試過可以拎埋架單去第二度踩(因為我冇乍車) 今日二舅父一家帶我哋一齊去科學園踩單車High Tea... 起初諗住實好多人可能會有D危險! (因為未買頭盔護膝俾佢哋) 點知原來係自己太擔心 我哋朝早飲完茶就一齊上車向大埔科學院出發 大概20分鐘嘅路程我哋到咗科學院裡面 喺接近碼頭嘅地方落車 小朋友們梗係拎番佢哋各自嘅交通工具就去玩啦 今日真係好曬，都已經就踏入十月份，但係天氣仲係咁熱 不過都冇六七月份咁濕，所以雖然曬但係都還可以 再行前一點就係公廁 呢個公廁都幾綠化！ 再向前行就係碼頭喇 我哋就停留喺呢度等小朋友踩番夠本 跟住行到海邊見到有人喺度釣魚 所以小朋友又好奇咁行埋去睇 Hysan一路嘈住話希望有得試吓釣魚 當然都係抱住新屎坑的心態 睇佢到時真係有得釣魚嗰陣可以等魚上釣等幾耐 今日天氣好好，影住個海唔駛ps都已經好藍 兩個都喺度鬥快真係睇到都覺得好危險 Hysan一踩就成個人去到盡 真係驚佢遲早有一次就跌得好勁 芊芊都唔弱用盡腳力踩個scooter！ 踩到咁上下就要番啖水 點擊圖片放大 芊芊踩踩吓就企喺度望住人哋餵小朋友食嘢 好攪笑！一路望住都唔走，正一八卦妹 兩個追追下終於肯停落嚟喇！ 一齊望住大海真係好寫意好舒服....如果冇咁曬嘅話 跟住大家一齊分享吓水果 坐低休息吓！ 芊芊餵完哥哥食跟住再餵表哥食！ 跟住要做嘅梗係同陽光玩遊戲同大海影靚相啦 二舅父好勁，識得叫小朋友咁樣排 呢個影相陣勢好正影出嚟真係好齊整 跟住我哋就離碼頭打算去食個下午茶囉 其實頭先飲完茶冇耐真係未食得落 只係想飲啖汽水就真 起初以為呢度會好危險 因為有好多大人都喺度踩 但係原來大人的單車徑在海旁的側邊 小朋友就可以喺海旁邊踩(係護衛員準許的) 所以可以好放心咁俾小朋友喺呢度踩單車 仲有呢度有個急救站，如果踩單車整傷大家可以嚟呢度歇一歇 踩踩吓去到海旁大家又想喺度停一停坐低吹吹海風 呢種唔駛睇時間鍾意幾時踩幾時停低嘅感覺真係好 點擊圖片放大 +2 四個小朋友又一齊嚟影番張相！ 跟住入咗嚟大家樂食番個高質素下午茶 其實都係一樣炸雞肶豬扒包 但係喺呢個環境底下同埋一家人喺度食真係一種高級享受(我覺得) 之後我哋去咗出面的露天弧形廣場度繼續玩 舅父帶咗個足球仔嚟踢 佢真係犀利可以同d小朋友玩得咁開心 個個都追住佢嚟踢個波！ 女仔真係女仔，踢波好似唔係好啱芊芊 佢都係自己行埋一邊玩膠青蜓 但係點知.... 因為芊芊玩隻膠青蜓太近自己塊面 所以"界"到面豬燈！ 傻妹喊都冇喊仲繼續玩...真係冇佢乎 點擊圖片放大 d小朋友仲出動埋scooter去追舅父 真係誇張！ 最後玩到日落我哋就行番去頭先碼頭嗰度 上車番屋企食晚飯lu.... Photo by CANON 5D Mark III, Len | EF 24-70mm f/2.8L IS II USM 呀劍評分: 8分 呀劍評語: 科學園夠哂大，可以沿住海旁踩單車真係好舒服，不過如果唔係有舅父車我哋去，我諗我都未必去！ (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
