今日我哋打算去游個水 我哋都揀咗去一個未去過嘅新海灘 但係知道沙灘上面有個地方可以去睇吓 - 就係「機場核心計劃展覽中心」喇！ 我哋如常番完教會 先喺屋企食個晏 休息一陣之後就出發去深井 喺的士影出去見到嘉頓廠房 (等佢哋大個D我就會同佢哋去 ^.^) 全程的士用咗$130由元朗去到機場核心計劃展覽中心 人哋叫呢度做「白屋」 好似話呢度前身係別墅有人住 之後俾政府買咗(聽人講好似象徵式用$1就買到) 依家評為三級歷史建築 呢張相係臨走既時侯影既! (因為當時芊芊喺的士瞓著咗) 呢度建築好靚! 感覺有少少似薄扶林伯大尼教堂 黑白格仔既樓梯好有復古味! 個招牌應該唔駛跟住復古卦 有少少殘咗D囉 入到去裡面係一個大圓型的空間 兩邊放有好多展板 介紹10項核心工程 有D掣喺個Panel度 撳落去就睇到該項計劃既路線 Hysan就梗係當佢係打機咁亂撳啦 >.< 如果整壞咗你就慘!!!!!!!! 我要順帶一提呢度既職員好好 因為見到老婆抱住一件瞓緊覺 我又一抽二褦(因為之後我哋打算落海灘游水) 所以職員叔叔俾我放低所有嘢喺佢哋個位度 到我哋要離開嗰陣先拎番 轉左入到嚟重點項目機場喇 呢度放咗個大大地既模型 最壯觀就係有呢隻大飛機掛咗喺頭頂 點擊圖片放大 實在太多文字 我哋都冇心機逐項同小朋友講解 我諗如果呢度可以多番D互動性質既設備會吸引D 點擊圖片放大 再行入去見到個青馬大橋既模型 呢度可以望番出去頭先門口一入嚟個圓型空間 點擊圖片放大 +4 個模型都幾靚 佢仲有仔細介紹番橋既構造 其實我本人覺得建築真係一樣好偉大既職業 都唔明點解人類可以起出咁大型既建設 點擊圖片放大 +2 繼續行其實兜番個圈出番去 隔離有個影院咁既地方 不過都冇開 我估係指定時間放映短片 點擊圖片放大 點知呢度變咗一個玩伏匿匿既地方 我同Hysan隔住圥玻璃 佢行去一邊我就行去另一邊! 當然我哋好斯文咁玩冇影響其他參觀既人啦 行番出去館外 即影院隔離 有條路行出去洗手間 你會見到有條樓梯 原來可以行上去天台 呢個時侯妹妹都瞓醒啦 上到嚟冇咩特別設施 不過望過去青馬大橋個VIEW真係好靚 好開揚好舒服! 點擊圖片放大 呢度有兩支望遠鏡可以俾人睇 但係天氣太熱 熱到支鏡都好熱.....隻眼放埋去都要好小心唔好掂到支鏡 之後我哋再落番去涼涼冷氣(主要目的) 就出發落去海美灣! 下一站>>CLICK HERE! 【親子好去處】荃灣 海美灣泳灘 Hoi Mei Beach Photo by CANON 5D Mark III, Len | EF 35mm f/1.4L USM 呀劍評分: 4分 呀劍評語: 超級細, 冇咩睇! 多文字圖片, 沒有互動設施, 裝修都沒有甚麼特別, 全部都係模型之類! 如果唔係順路可以唔駛專登去, 如果真係去反而係為咗去欣賞呢楝三級歷史建築! 機場核心計劃展覽中心 簡介 機場核心計劃展覽中心是一座別具風格的單層建築物，一般稱為「白樓」，現被評為評為三級歷史建築。 地址 汀九青山公路 401 號 開放時間 10時00分 - 17時00分(逢星期一休息) 費用 免費入場 交通 巴士乘搭234B、53 小巴 乘搭 96、96M 電話 2491 9202 / 2491 9227 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
