今日係端午節，我哋一早就約好咗大舅父要到長洲睇佢比賽！ 其實係近三年我哋每逢端午節嘅指定動作 今日因為呀芊發燒所以今年只有我同Hysan出發 我哋都冇特別話安排好幾點起身出門口， 因為始終係放假，都想輕鬆D 早上大舅父就話Wtsapp我知佢大概12點幾比賽 我哋10點幾就先落街食個早餐先 我哋去咗「開心小敍」， 呢間本來位於元朗雞地嗰邊既茶餐廳， 居然喺我樓下附近開咗分店， 佢哋最出名係豬扒煎蛋飯，不過我我哋嚟食早餐 就嗌咗個豬扒煎蛋通， 豬扒確實係好味，其他嘢就普通囉 點擊圖片放大 Photo by iPhone 5S 食完之後我哋就到西鐵站搭西鐵 去到南昌轉東涌線到香港站， 之後就沿天橋行到去5號碼頭搭船去長洲啦 行行吓Hysan話「Daddy你電腦個蘋果呀」 點擊圖片放大 +2 我冇特別睇過船期， 真係諗住去到碼頭先算， 我一去到係11:40，職員話快船12:00開， 我哋就Do咗入去先，因為好多人 點知未到12點，就可以上船，滿座就開船了 點擊圖片放大 在船上的Hysan好興奮，睇到大海大浪大船！ 今日天色真係不錯，仲好熱Tim 點擊圖片放大 +2 Hysan望住個海突然問我 Hysan「Daddy, 點解D浪係白色既?」 我「...」 我哋差唔多12:20就落船了 都有一年冇嚟過長洲, 今日好熱鬧, 但人唔算太多! (可能對香港人嚟講仲早) 點擊圖片放大 +6 有大大粒魚蛋呀! 不過用電煲十吓十吓既咖喱魚蛋CircleK都食到啦 等我一陣介紹你哋喺邊度食大大粒魚蛋啦 點擊圖片放大 +3 我哋第一時間去唐記搵大舅父先 因為佢哋呢隊獅藝龍既龍舟隊， 年年都會喺呢度打「櫈」！ 幸好大舅父仲未落場， 佢俾其他人玩先，自己要到2:40先比賽！ 點擊圖片放大 所以同舅父玩咗陣，睇吓其他隊伍比賽 跟住我哋就周圍行吓食吓嘢影吓相 點擊圖片放大 +3 沿途經過報到處, 放咗好多個獎杯喺度, 好壯觀呀! 呢個平面既戲棚牌好得意! 我哋行行吓，見到有間賣豆花的小店， 就先停下來補充吓體力先 見到佢有自家製「純鮮奶魚仔燒」， 於是買$20/4件支持吓 老細話佢哋呢部係全港唯一一部自動烤魚餅機 凍豆花$12碗， 不過唔係咁鍾意佢用膠碗， 一來冇咁有特色，二來好唔環保 我都明洗碗人工依家好貴... 點擊圖片放大 +6 之後見到一大棑檔廚房後吊住一隻隻雞, Hysan見到好攪笑! 叫我影低一陣俾舅父睇 去到後面公園仔, 又撞番大舅父喺度熱身喎 之後一邊行一邊見到好多特色小店 如果同老婆一齊就會逐間逐間慢慢行 跟住見到有間賣自製雪條既餐廳， 賣$8/支，可惜只賣剩椰子/蜜瓜/奶茶及咖啡味， 所以Hysan揀咗支椰子，我就揀咗支奶茶 佢係用不銹鋼器皿去急凍， 好似我哋細個自己用果汁整的雪條一樣 奶茶雪條有點甜，唔知可唔可以叫佢整多款係少甜既雪條呢！ 椰子味濃，真係超爽！天氣咁熱食番條止止熱都OK 點擊圖片放大 +4 最後一啖因為驚雪條跌, 所以大大啖放落口, 凍到彈起! 繼續向住沙灘方向行, 有其他特色小店, 如果冇Hysan喺度, 我諗我間間都會入去試吓 行行吓俾Hysan發現到有燕子! 喇喇喇, 嚟到呢間大大粒魚蛋啦! 其實喺長洲你會見到好多檔賣緊， 但係呢檔先至係最正宗的！ 所以千祈唔好去錯檔， 不過我哋飽飽哋, 晏D先番嚟幫襯你! 如果唔係十番熟佢, 我真係想食吓粽應吓節! 嚟到呢度又有一間豆花刨冰, 下次要試試! 向沙灘方向行, 無端端有個好藝術既地方! 跟住再向住沙灘方向行， 當然唔少得係嚟食扭扭薯片啦， 好似嚟到長洲唔食佢唔似嚟過， 不過自己食過咁多次反而想試新嘢 所以買咗一支大薯棒再加多一支大蝦棒 都係各$20！ 不過大蝦棒就有點失望， 佢其實都係炸蝦，一隻點上沙律醬，另一隻就點上泰式甜酸醬， 冇咩特別，而且炸蝦皮仲唔夠脆！好似擺咗好耐咁 點擊圖片放大 +2 每次嚟長洲都會入去睇但係唔買嘢既「棉花公司」同埋「賣藝」 經過長洲戲院, 見到佢圍哂板, 我諗係咪就嚟會拆呢? 之後睇時間都差唔多到大舅父上場， 我哋就行內街番去唐記 跟住發現一間店nitti-gritti 係我之前喺巿集認識過的， 所以入去打個招呼， 裡面賣既嘢都好有特色， 有部份物品係購至土耳其等其他國家！ 所以唔會咁容易喺其他店舖見到㗎！ 最近Hysan架單車撞爛咗個呤噹！ 咁啱見到佢哋又有得賣 $58雖然有點貴 但係都懶得去單車舖配， 所以就買咗，等Hysan可以自己維修！ 點擊圖片放大 +8 行行吓又想食冰菠蘿， 不過見到有個仲吸引，係小冰西瓜！ 我哋番到去現場，見到大舅父要落場了！ 準備要開始了，我同Hysan坐在碼頭邊， 要為舅父打打氣！ 賽事開始了... 結果我就唔提了...因為被封口唔講得，總之冇嬴到啦！ 雖然輸咗，不過唔緊要！大家至在開開心心過一個端午節 所以最後嚟張大合照！ 這樣也可以讓Hysan學習，比賽輸咗都冇所謂 俾佢知道「志在參興」既道理 跟住我哋就成班一齊去東灣沙灘玩， 中間經過頭先既大大粒魚蛋 我就買咗一串再加一串龍蝦搭芝士丸食 真係好好食呀！皮脆肉厚！芝士丸爆出嚟好香，龍蝦丸落足料 總共承惠$25 點擊圖片放大 +2 去到沙灘，Hysan玩得好開心， 俾大舅父掉落水，嗌哂救命！笑死我 成班龍舟隊落哂水飲啤酒，好開心！ 點擊圖片放大 +2 玩玩吓水, 同舅父走咗去摸蜆! 仲有好多靚姐姐陪Hysan玩 我都行埋一二邊等佢慢慢玩！ 一個浪準備打落去Hysan塊面度! Photo by CANON 5D Mark III, Len | EF 24-70mm f/2.8L II USM 差唔多5:30我哋就番去碼頭 買咗麥記買咗個魚柳飽餐， 邊食邊等6:00快船！好精彩既一日 番到屋企Hysan行行吓都同我講「Daddy, 我今日好開心！」 呀劍評分: 9分 呀劍評語: 去離島本身就已經係一件開心事，雖然去到都係行吓食吓，但係當你去咗一個島上面個心情係唔同咗D，今日天氣非常熱，但係有得睇大舅父爬龍舟，又有得周圍行食吓嘢！最後落埋水，係幾爽既！長洲東灣泳灘幾乾淨, 只係太多人, 如果你唔驚鯊魚, 可以行遠少少非防鯊網範圍游水, 最後我哋番埋屋企食埋粽當晚餐仲更加一流，最緊要係應哂節嘛！ (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
