錦上路真係經過好多次, 但係當我每次見到呢個跳蚤市場, 抱住「咪又係咁」既心態, 都冇諗過要行, 不過今日行入去有唔同既感覺, 都幾好行同埋幾舒服(不過只限少人既時侯), 同埋發現這間申請專利自家製的香港人品牌 - 「豆花譜」 上一站>>CLICK HERE! 【親子好去處】錦上路 跳蚤市場 呢度既豆花譜聲稱冇用石膏粉, 等咗5分鐘度, 豆花譜就送到我面前, 第一感覺係好大個碗, 我叫咗最貴既豆花譜配韓國蜂蜜 ($42), 上面淋咗D澳洲天然藍莓果醬 先講個豆花譜, 感覺似布甸, 入口即溶, 係口裡面黐立立, 唔係平時食豆腐花嗰種又凍又爽既感覺 比想像冇咁凍, 因為裡面沒有含水份, 所以用衡溫雪櫃雪到啱啱好! 蜂蜜唔會太甜, 入口喉嚨唔會太涸, 加埋個藍莓果醬, 淋上豆譜一齊食啱啱好 講到雪榚多士, 起初我未睇到實物既時侯就幻想應該呢件係雪榚做既, 然後扮係多士 點知上到枱, 原來真係多士嚟既, 哈哈, 自己諗多咗! 不過佢賣成$30, 唔會係就咁俾舊雪榚你咁簡單啦 製作需時, 所以大家要等耐少少, 大約10-15分鐘 呢個時侯呀芊仲未起身!!! 一味三份, 全部都係細細塊既方型多士, 一份係就咁2塊多士(係用嚟夾番藍莓同雪榚嗰份多士), 一份係配頭先個隻藍莓果醬, 最後個份當然就係配雪榚, 舊雪榚我揀咗綠茶味, 佢仲有朱古力同埋雲呢拿, 雪榚上面同樣落咗藍莓醬同埋落咗少少麥維他消化碎餅 老闆上枱既時侯會提借埋一支酒精洗手液 因為佢都係想你用手食 老闆仲自己親自過嚟教我應該點食 呢種熱誠真係冇得頂, 先將第一塊多士放雪榚上, 對齊後, 然後壓扁, 角要向上, 然後先可以食 好講究, 當然點食都唔重要, 個份人情味先至係最窩心 雪榚用特別製法(老闆話唔講得) 放咗好耐都唔會溶, 食入口又冇雪榚咁凍, 好Creamy, 綠茶味重! 最後老闆見同我傾得好投契, 仲送多我一杯靈芝咖啡 我以為杯咖啡會好重靈芝藥材味(其實我唔知靈芝係咩味) 但係其實飲落口主要都係咖啡味 老細話靈芝咖啡, 藥材同咖啡個比率係3:7 入口滑, 咖啡味香! 落一包糖真係夠哂 終於等到芊芊起身啦, 因為天氣太熱, 我幫佢換咗件衫 我早有準備帶咗Bubble嚟吹! 吹吹吓嗰陣有個媽咪走嚟問我係邊度買, 因為佢見我D Bubble好勁, 好好吹! 佢話呢度買嗰好唔掂, 咁大家記住如果要吹Bubble就自備啦! 又吹波又影相一腳踢 點擊圖片放大 Photo by CANON 5D Mark III, Len | EF 24-70mm f/2.8L II USM 豆花譜 Duo Hua Pul 呀劍評分: 7分 呀劍評語: 價錢尚可接受, 香港人品牌值得支持, 食風味人情, 雪榚多士及豆花譜夠創新! 靈芝咖啡味道OK 地址: 錦上路跳蚤市場 營業時間: 周六、日及公眾假期 查詢電話: 3540 3308 網址 https://www.facebook.com/duohuapul (以上資料更新至文章當日)
