今日好熱好熱好熱呀! 天文台又話落大雨(係...佢冇話幾時落, 結果係夜晚超大雨) 今日我同哥哥出發, 同行有嫲嫲同堂哥! 我哋去咗啓德郵輪碼頭, 即前身舊機場! 呢個改建後的碼頭, 真係超大! 1998 年搬機場。12年後 (2010年)開始動工變身做郵輪碼頭。再4年後(2014)變終入伙。 我哋約咗喺九龍灣地鐵站等, 跟住就搭的士入去! 落車啱啱好$50 如果第一次嚟好容易當失路, 當你搭升降機想去你要去既地方, 徧徧又唔知自己去咗邊 因為佢唔係層層都係互通, A Zone & B Zone係登船大堂, 所以除咗頂層及地下, N Zone係唔可以直接去過去S Zone 係咪唔知我講咩呢?! 由承豐道起的順序為N - A - B - S Zone 我建議第一次去的大家, 無論你搭咩車都好, 落車之後搭升降機到最頂層, 呢度係郵輪碼頭的露天花園廣場, 然後如果你想2樓購物區或啟德跑道公園, 咁就去S Zone升降機上落 想搭公共交通工具, 就去A 或 B Zone升降機落地下搭綠VAN, 的士, 巴士 自己揸了車，想去停車場, 就去S Zone落地下 好啦解釋完終於可以講吓我哋今日行程喇! 因為實在太熱, 我哋在頂層廣場來回行吓影吓相! 廣場一端有大草地(即係近S Zone, 地下係啓德跑道公園)! 呢一邊望過去見到舊跑道! 點擊圖片放大 +3 太熱頂唔順, 要飲多D水!! 跟住同佢去到這個叫嬉水廣場玩水, 好在不嬲出街都會同小朋友帶定多一套衫褲襪 點擊圖片放大 +14 玩到剩番佢一個, 叫極都唔肯走! 仲想玩多陣 (最後番到屋企就知死, 因為曬到條頸好痛) 點擊圖片放大 碼頭的另一端(即近S Zone)係餐廳同國旗區旗連二樓商場! 嗰個隋圓形成個天文氣像儀既嘢唔知係咩嚟架呢? Hysan不斷話佢好核, 唔想同佢影相! 跟住我哋落咗最地下, 你就會見到有指示去啓德跑道公園 行出去梗係同個招牌影張相先, 跟住Hysan就即刻跳咗上去個斜台上 起初我以為係硬地, 原來係鐵皮空心喎! 即刻攪到個保安員走過嚟叫佢落番嚟... 我諗好多人都試過咁, 因為個保安係唔知邊度好快咁行咗出嚟鬧 今日真係好天好到熱死人...唔知有冇34-5度 海邊對出有好多艘郵輪, 呢架土豪金係最靚!! 現場睇佢個船身真係好金... Hysan跟住同我係草地上面話要鬥執得多船枝! 跟住我話不如鬥執得多, 仲要鬥長! 結果我哋打和....^.^ 碼頭對出有D啓德舊機場既介紹, 原來我哋依家腳吓既地方就係跑道既開端啦! 呢度有少少嘢都保留番原址面貌! 點擊圖片放大 可能Hysan睇過我影跳躍既相, 所以話要影跳落嚟俾我影, 跳咗好幾次! 點擊圖片放大 +2 兩個攪攪震! 影張奇怪相... 之後我哋搭電梯上咗去2樓, 望番出去頭先架黃金船! 望上去就係頭先嗰兩支國旗! 原來落一層就係個商場, 呢度行入去就係俾遊客買嘢既地方 裡面全部都係賣化粧品 佢哋對化粧品就冇興趣, 反而對呢缸金魚就有, hahaa... 但係呢個櫃枱既職員就喺度望吓望吓咁, 見我哋唔係買嘢, 就好似歧視我哋咁, 當我影缸金魚嗰陣, 個職員就走過嚟想話我, 佢見我即閃開, 佢就冇再行過嚟, 沿住化粧櫃枱行出去外面, 係2樓連接住每個zone的通道! 點知原來香江茶室就係N Zone, 一頭一尾, 行咗我哋差唔多15-20分鐘! 在通道上影番落去啓德跑道公園! 沿路有好多展板介紹番啓德既演變! 通道左手邊影落去, 呢個地方話係未開發的區域, 預計2016年完成! 終於行到尾尾見到香江茶室 裡面都係食普通茶餐廳既嘢, 都幾好食, 價錢唔貴! 點擊圖片放大 下一站>>CLICK HERE! 【親子好去處】九龍灣 零碳天地 ZCB Photo by CANON 5D Mark III, Len | EF 35mm f/1.4L USM 呀劍評分: 7分 呀劍評語: 其實地方算OK，有好大個海景，超級大草地！如果可以再增設多D設施就好！因為真係專程入嚟，如果可以集中D喺哂一個地方玩哂就好，起碼都好似山頂廣場咁多D舖頭食肆同埋專題展覽節目咁就PERFECT！ 啟德郵輪碼頭簡介 啓德郵輪碼頭公園位於九龍啓德承豐道33號啓德郵輪碼頭頂層平台，公園佔地二萬三千平方米，設有多項靜態設施，包括中央草坪、觀景平台、水景花園及噴泉廣場等。 至於啓德跑道公園已於4月22日正式開放給大眾，公園暫時只開放了部分紀念啟德機場的設施，包括一條仿跑道的草地、「啟德歷史軸」及一個露天廣場。「啟德歷史軸」主要介紹啟德機場的歷史，而露天廣場女則張貼了一些關於啟德的舊照片。由於公園暫時只開放了大約兩成面積，仍有大部分設施有待完成，預計要等到2016年才可見全貌。 地址 九龍啓德承豐道33號 開放時間 每日上午七時至晚上十一時 交通 1. 專線小巴 : 86 每日由上午六時四十分至晚上十一時往返啓德郵輪碼頭及九龍灣（德福花園） 2. 九巴 : 5R 逢星期六、日及公眾假期由上午十一時至晚上七時循環線往返啓德郵輪碼頭至港鐵觀塘站，經港鐵牛頭角站。 * 碼頭亦設有的士站及停車場。 電話 2806 3155 傳真 2806 3379 電郵 ktctp@lcsd.gov.hk (以上資料更新至文章當日)
