正所謂「偷得浮生半日閒」今日嚟個半日遊, 先去錦鏽花園散吓步然後再去牛潭尾少布站食個下午茶! 大家都知我鼓勵小朋友接觸多d大自然(我並非完全唔去商場, but少D囉) 可能大家都會覺得吓吓去都好大工程，舟車勞頓，仲要好似我咁帶住個唔夠2歲既B去, 無可能啦！ 我承認如果住係香港九龍的朋友仔真係時間上要耐少少， 但係新界仔就真係可以長有長去，短有短去的TRIP， 好似今次等我介紹吓我去既呢2個地方啦！ 今朝照常去咗教會主日，完既時侯都已經1點，我以前多數都會諗，去食埋個晏都差唔多三點啦，仲可以去得邊！？ 我個日到就嚟1點都仲未諗到可以去咩短TRIP，（耶穌，原諒我聚會個陣唔專心！） 跟住突然諗到係錦鏽花園好似有天鵝睇架喎，因為小朋友未見過，所以可以值得一去， 全靠我以前同過我女朋友去，即係依家既老婆，所以有少少印象！ 落咗教會過條馬路，已經有錦鏽花園既Shuttle Bus，因為我哋去教會前係麥記食咗個好飽既早餐，所以我哋即劇上車， 決定去完睇鵝先再去食TEA，15分鐘度就落車啦，一落車行兩步入到錦鏽花園個範圍， 點擊圖片放大 +2 見到個水塘就已經見到好多雀仔同埋鵝！超興奮！ 咁啱撞正職員餵佢哋食嘢！職員將一桶一桶的飼料拋到水上浮起來俾鵝食， 最奇景係我見到d鵝佢哋食飽之後，佢哋就夾d飼料放係口度然後餵水裡面既魚.....太神奇了！ Shutter Speed | 1/2000 s Aperture | f/6.3 ISO/Film | 100 點擊圖片放大 +3 因為呢度唔係農場，所以唔會有飼料俾你買去餵佢哋， 跟住Hysan好開心咁見到湖邊既草照拔出掉落去俾佢哋食， 佢見到d鵝食就以為佢哋真係食，不斷繼續掉， 當然班鵝係唔知咩嚟伸個頭去試食啫！冇幾耐阿芊都醒埋lu 後邊唯一一隻白色既天鵝！ 之後我哋逗留咗20﹣30分鐘度，去到錦鏽花園裡商場去買d嘢飲同SNACK，因為天氣實在太熱！ 其實今日係打風前夕，正常人真係番去屋企算數，但係我覺得就算係落哂雨都係對小朋友係一個經歴， 其實只要大人唔覺得麻煩，其實都係一件好事， 當然唔係叫你明明在室內明知打風落雨都仲出去玩啦！ 跟住我哋打咗架的，跳咗2吓錶就去到下一站叫做「小布站」佢係一間3層歐式白色茶座， 老細係單車愛好者，所以佢地下用嚟做生意，樓上用嚟招呼單車人！ 咁啱有個朋友book咗1樓聚餐，我哋地下同1樓都兩邊走！ Shutter Speed | 1/100 s Aperture | f/1.8 ISO/Film | 600 呀哥食飽之後佢就上咗去1樓同其他小朋友玩了，耳根清靜！ 得番我地同芊芊係地下嘆TEA，呢度個環境真係好舒服， 不過個侍應就有d慢動作同埋好似小小小警察咁問完你食咩， 跟住又番轉頭問多2次，收咗錢又問頭先收咗錢未，加減數都計咗超耐， 我只係將個情況講俾大家知，可能有咩特別情況我唔知，可能老細有愛心俾機會佢哋請佢哋做嘢都唔定，所以唔亂講或歧視佢！ 呢度嘢食都係普通好少少嘢，食環境！都係＄40﹣50一碟意粉, $40碗餐蛋麵之類啦！ 食嘢唔係重點！簡簡單單容易去好過係屋企發牛豆！ 因為佢哋平時工人湊所以連樓下公園都冇乜得去，都係番放學，同工人落下百佳行個圈咁咋！ 所以我希望一到假日可以帶佢哋去接觸唔同既地方，睇吓動物！ 佢哋就好滿足了，最後上去接哥哥走同幫佢影吓後面好靚仔既單車！ 跟住將要走既時侯天已經好陰，有少少雨粉打落塊面度，跟住就搭小巴離開(其實最後去到元朗落車行咗一半未到屋企就超大雨lu....) Photo by CANON 5D Mark III, Len | EF 35mm f/1.4L USM 呀劍評分: 8分 呀劍評語: 獨立睇個地方唔會咁高分，我俾8分係因為配合埋其實環境因素，短短時間去到睇天鵝，又能湖邊散步，再去到小布站悠閒地TEA！所以先咁高，如果以全日嚟計，在錦鏽花園玩半個鐘已經冇嘢玩㗎喇！ 呀劍貼士: 錦鏽花園商場有洗手間，如果換片可以去裡面！話哂都係住宅咩都有唔駛擔心，如果下晝唔去小布站可以配合其他地方，就算係錦鏽花園飲個茶，或去pacific coffee嘆杯咖啡都仲得！小布站就真係獨立一楝屋周圍冇咩嘢，地方乾淨，出面有個露天地方可以讓小朋友有少少走動！ 錦鏽花園湖畔簡介 就係一個屋苑，冇咩好講！ 地址 新界元朗錦綉花園 交通 在元朗安信街乘穿梭巴士NR93至錦綉花園巴士總站落車 電話 2471 1301 (總辦事處) 網址 http://cn.fairviewpark.hk/ ----------------------------------------------------------------------------------------------------------------- 小布站簡介 一個小布迷必到地方,舒適嘅環境,清新嘅空氣,為你同你的小布作補給點我地唔係一間普通單車鋪,我地係一間～單車。咖啡。休閒店～歡迎所有單車車友 地址 元朗牛潭尾路20號 (葡萄園對面) 交通 元朗搭專線小巴37﹣來往元朗 (福康街)及攸潭美 (鄉公所)，當然後我錦鏽花園去打的就對了 電話 2486 2210 網址 Openrice http://www.openrice.com/restaurant/sr2.htm?shopid=183380 Facebook專頁 https://www.facebook.com/pages/%E5%B0%8F%E5%B8%83%E7%AB%99-Brompton-Station/753571874714129 (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
