今日目的地係機場, 我哋唔係去外地, 只係嚟機場T2呢度既童夢城通識學園, 其實類似既都開咗幾間, 不過在香港佢算係一哥, 比較早落成的! 今次因為有朋友識人可以平價買童夢城既飛, 所以就同呀仔嚟玩吓, 本來我一向都對呢D角色扮演感覺麻麻地, 覺得好呃錢, 我未玩過台灣個babyboss, 所以冇得比較, 不過我去完之後都覺得還可以! 我哋book咗下晝10:00, 首先入咗場之後就拎到一本passport, 本passport係俾你每做完一個職業之後就會出糧, 可以拎到分, 分數可以換到禮物, 行到入去會見到好多唔同既職業workshop, 每3個職業附近都有一部預約機, 係俾參加者選擇想參與的職業及時段, 然後憑飛依時出席參與, 先到先得, 因為我哋去的時侯人不多, 所以很多選擇, 我哋第一個選擇的係機場警察, 起初呀仔都唔敢, 因為無其他人, 得佢一個小朋友, 但係最後佢都有入去! 得一個姐姐同佢一齊學做警察, 一開始就學操兵! 之後就學拎槍, 然後離開房間, 去附近周圍輯毒, 佢利用埋其他職業環境俾小朋友去搵毒品, 我覺得呢個做得幾好! 之後佢就想做消防員, 因為佢D時段都已經固定咗, 所以完咗一個職業, 等5分鐘度就即刻另一個職業開始, 所以你要係佢第1個職業未完既時侯就要去預約機度選擇定下一個模彷職業 因為佢實在太細粒所以D衫都太長...好好笑! 點擊圖片放大 呢D咪叫做冇咁大個頭唔好帶咁大頂帽囉! 最後可以去火災現場開水救火, 有得玩水佢就最開心啦! 不過個水喉太重, 佢都唔係控制得好好 第3個職業係做太空人呀! 其實平均1個職業都係玩35分鐘度, 所以3個鐘頭應該可以玩到5個職業度, 太空人就我哋睇唔到, 因為佢入咗去太空船之後就唔俾daddymammy入去, 隱約知道佢係太空船裡面有個mon睇到佢係地球出發, 發射上咗太空, 跟住行出去另一邊就去到月球表面, 個度我就見到佢啦, 當時仲有2-3個小朋友同時玩緊! 終於有番D同伴啦 點擊圖片放大 呢個好似係保標! 影張相就算 之後我估唔到佢想做護士, 佢死都唔肯做醫生, 唔知佢諗緊咩, 佢喺呢度要學照顧BB, 又係得佢一個, 個BB真係有重量架喎, 同真BB一樣咁重, 佢抱住個BB個樣幾辛苦, HAHA... 我哋不停叫佢唔好跌死個BB呀! 最後就係衝上雲霄啦, 仲有2個空姐陪tim...右邊個空姐超級開放熱情囉! 臨走前同門口架飛機頭影番張相先! Photo by CANON 5D Mark III, Len | EF 35mm f/1.4L USM 呀劍評分: 7分 呀劍評語: 3個鐘頭玩咗5個職業, 起初覺得3個鐘好耐, 但係玩落後時間都過得好快! 以我所知, 依家仲多咗好多其他職業, 有7-11, 有餐廳, 有明星, 有記者等等...都值得一去架! 我知香港有好多其他同類的, 不過呢度算係香港第一間做比較有規範的, 大家可以上網search呀, 如果覺得機場太遠, 其他好多廠廈都有做! 童夢城 簡介 童夢城通識學園是一個專門為兒童建置的心智教育場所，是一種嶄新的兒童教育方式；透過職業模擬遊戲中學習，體驗不同行業真實工作崗位而拓展視野，以培養團隊合作和正確的社會價值觀。 從此香港機場不單是國際航運的樞紐，也是最具教育性和公益性的主題學習樂園。 地址香港國際機場2號客運大樓6樓6P005 開放時間 平日 及 假期 上午場 09:30 – 14:00 下午場 15:00 – 19:00 票價 小童（3至16歲） 港幣 $320 (持殘疾人士登記証可獲半價優惠 - 港幣 $160) 成人（17歲或以上） 港幣 $160 (持殘疾人士登記証可獲半價優惠 - 港幣 $80) 長者（65歲或以上） 港幣 $80 (持殘疾人士登記証可獲半價優惠 - 港幣 $40) *0-2歲之幼童可免費入場，但必須家庭組合形式(包括最少一名3-16歲兒童及一位成人)，亦不能參與活動 *3-12歲之小童不予單獨入場，因安全問題，必須要有最少一位成人陪同購票入場 *3-16歲持有持殘疾人士登記証之小童不可單獨入場，因安全問題，必須要有最少一位成人陪同購票入場 *3-16歲之學童可於門票指定時間內參與園內所有活動 *13-16歲之學童可獨自購票入場 *17歲以上的成人則必須與3-16歲小童以組合形式入場，但成人不能參與活動 *價格及開放時間可隨時更改，請以網站公佈為準。 交通 機場快線或機場巴士 電話 35591028 網址http://dreamcometrue.com.hk 電郵 info@dreamcometrue.com.hk (以上資料更新至文章當日) ---------------------------------------------------------------- 網誌全文 http://kimfamilytravel.blogspot.hk fb專頁 https://www.facebook.com/kimfamilytraveltips ----------------------------------------------------------------
