睇黎呢度真係變左韓國食記 篇篇都係食食食 依家已經肥到肥腫不分,泡菜男都已經無眼睇我 今次要介紹既就係呢間位於弘大既小店찰스숯불김밥 入面出名芝士年糕同紫菜包飯 雖然舖頭細細,但之前都有電視台訪問佢地 佢地稱之為學生食堂 點解有呢個稱號,因為又平又大件又抵食 話說上次四月去既時候 小kimbap既好朋友血拼得太開心,用到身無分文 就提議不如試下呢間平民學生食堂 當時我心諗紫菜包飯同芝士年糕呢啲咁普通既野度度都有得食,都唔明點解要特登過黎食 不過我不嬲都係捨命陪君子既人 所以食就食啦 一食難忘,所以今次又捉泡菜男陪我再食過 呢度啲紫菜包飯可以稱之為King size 比出面嗰啲超碼大一倍以上,超級無敵足料 芝士年糕仲正,啲芝士唔係芝士碎咁簡單 而係起碼有幾塊芝士以上,多到我係咁玩拉絲 食到最尾一啖年糕都仲有芝士食到落口 芝士迷必試!!! 不過溫馨小提示,呢個炒年糕係辣既,唔食得辣唔好叫呀 點擊圖片放大 찰스숯불김밥 地址: 서울특별시 마포구 동교로 187 (동교동 201-6) 營業時間: 平日9am-9pm 週末9am-8pm 弘大入口站1號出口往左轉,直行兩個街口過馬路便到達