小編喺一個電影迷，自細就鍾意睇荷里活電影，曾經有唔少荷里活電影好似《哈利波特》、《福爾摩斯》、《占士邦》等都喺喺英國取景，今次小編利用咗9日8夜嘅時間喺倫敦、約克兩個地方搵電影鏡頭下鮮為人知嘅一面。 【Day 1】抵達倫敦希斯洛機場 喺去搵電影實景之前，首先要了解英國嘅交通，咁你先可以喺最短嘅時間去到最多嘅地標。 英國倫敦總共有五個機場，最主要嘅國際機場就喺倫敦希斯洛機場 (London Heathrow Airport, LHR)，亦都喺全世界最繁忙嘅機場之一。 要喺希斯洛機場出去倫敦市區，可以利用呢五種交通工具：高速火車(Heathrow Express)、火車(Heathrow Connect)、地鐵(Tube)、機場巴士(National Express)、的士(Taxi)，唔同嘅交通工具出去倫敦市區嘅收費同用嘅時間都好唔同，但基本上都喺15至60分鐘左右到市區。 由於小編book嘅Apartment喺Earls Court，只有地鐵同的士可以去到，所以梗喺揀最平嘅地鐵啦！倫敦地鐵嘅車費喺以Zone去劃分，而倫敦市區共分為9個Zone，希斯洛機場喺Zone 6，大部份嘅景點就集中喺Zone 1、2。同Zone內搭車會比跨區平，因為同Zone內無論搭去邊個車站車費都喺一樣，跨區越大搭得越遠車費就越貴，建議行程儘量安排同一日喺同一個Zone進行會比較划算。 除咗Zone會影響車費，Peak(星期一到五6:30~9:30; 16:00~19:00) 同Off-Peak(週末& 9:30~16:00; 19:00後) 嘅車費都會唔同，以Zone 1、2黎講，用Oyster Card俾錢，Peak喺₤2.9，Off-Peak先喺₤2.4；而Oyster Card每日有扣款上限(Cap)，9:30後搭嘅話最高扣₤6.8，之後就唔會再扣錢，所以一日內越搭得多就越著數。 (2018年車費) 剛才提到Oyster Card，到底喺咩黎？對第一次去倫敦玩嘅朋友可能唔喺好知喺乜同點用。其實喺倫敦搭地鐵，想慳車費，通常會考慮買「Oyster Card」或者「Travelcard」。「Oyster Card 」就好似「八達通」，可以用黎搭地鐵(Tube)、地上鐵(Overground)、國鐵(National Rail)、輕軌(DLR)、電車(Tram)等；如果要搭空中纜車(Emirate Air Line) 或者泰晤士河嘅水上巴士(River Services)，Oyster Card都有優惠。 想買Oyster card其實好簡單，可以喺倫敦地鐵站嘅自動售票機(Ticket Machines)、倫敦遊客中心(Visitor Centre)或者部分舖頭都有得買，買嘅時候要俾₤5按金(Activation Fee)，之後揀想增值(Top-up) 幾多就得。 Oyster card同餘額其實喺無期限，若然唔打算再用，可以考慮轉讓或者退卡，退卡可以喺買卡後48小時內去倫敦地鐵站或者Heathrow Airport各航廈嘅自動售票機辦理退卡手續就得，但要注意Oyster card內餘額要至少有₤10，先能夠退回₤5按金同餘額；若然餘額超過₤10，就要去倫敦遊客中心辦理。 用「Oyster Card 」就同「八達通」一樣，進出地鐵站要喺閘口「黃色圓形感應器(Yellow Card Reader)」上拍卡，聽到「嗶」一聲就OK。注意搭巴士(Bus)或者電車(Tram)只要上車拍一次卡就得。另外，現時倫敦嘅巴士唔再接受現金，所以有Oyster Card或者Travelcard在手，遊覽倫敦就無難度啦！ P.S. 倫敦地鐵經常會因施工問題而影響部分路段或者因罷工而停駛，唔想因為咁被人扣怨枉錢，建議出發前上官網Check下當日嘅行駛狀況。 【Day 2】多彿、坎特伯雷、里茲堡 & 格林威治一日遊 小編聽講唔少電影嘅題材都喺嚟自倫敦郊區，於是參加咗當地三個導賞團，睇下會唔會有咩收獲。今日呢個導賞團嘅第一站就喺由多佛開始。多佛(Dover)喺英國肯特郡嘅一個海港，多佛港亦喺最接近法國加萊港嘅一個港口，每逢週末或者假期當地人就會坐船即日來回法國Shopping，因此成為英國最繁忙嘅一個海港。 多佛擁有最繁忙嘅海港，同時佢獨特嘅地理位置亦喺戰時一個非常重要嘅軍事防禦要塞。若然你有一日嘅時間，建議行上去多佛最出名嘅多佛白崖(White Cliffs of Dover)同埋多佛城堡(Dover Castle) 。聽講上到去，可以欣賞到多佛海峽，仲可以睇到唔少戰時遺跡，而電影《Dunkirk》亦都有描寫到多佛白崖嘅歷史。今次小編未能夠登上到呢個場景，覺得好可惜！ 下一站嚟到坎特伯雷(Canterbury)，佢有個叫坎特伯雷大教堂(Canterbury Cathedral)喺英國最古老、最有名嘅基督教建築物之一，同時亦喺世界遺產。 終於嚟到戲肉里茲堡(Leeds Castle)，里茲堡嘅主人里伯恩爵士喺1278年將城堡送咗俾當時英格蘭嘅國王愛德華一世，從此就成為咗王室之物。之後嘅200年，前後住咗5位王后，直到1980年代先正式對外開放。呢度嘅一磚一瓦依然保留住昔日英國王室嘅華麗同氣派，值得一嚟！ 最後一站喺格林威治(Greenwich)，呢個地方有個皇家天文台，喺1675年英王查理二世設立，而佢喺1884年美國華盛頓召開嘅國際子午線會議上，被訂為標準零度經線，即本初子午線，去到1998年先改為博物館對外開放。可惜行程只喺去碼頭搭水上巴士橫渡泰晤士河返倫敦市中心，無緣參觀呢個聞名於世嘅天文台，下次要自己黎多次先得。 P.S. 泰晤士河(Thames River)喺英國第二長嘅河，亦喺全世界水面交通最繁忙嘅都市河流同地標。坐住水上巴士向泰晤士河前進沿途可以睇到唔少倫敦地標，好似大笨鐘、倫敦眼、千禧橋、倫敦塔、倫敦塔橋等。 【Day 3】溫莎堡、巨石陣 & 巴斯一日遊 今日另一個導賞團嘅第一站喺溫莎堡(Windsor Castle)，佢喺現今仲有英國王室居住嘅行政官邸。現任英女王伊利沙伯二世每年都有相當多嘅時間喺溫莎堡度過，咁啱前一日因為女王喺度而要關閉。 本來話大雨取消咗衛兵交接嘅儀式，咁啱走嘅時候儀式又恢復進行，Lucky Me！ 嚟到下一站巨石陣(Stonehenge)，巨石陣喺英國最有名嘅史前遺跡，整個巨石陣喺由環狀列石及環狀溝所組成，佢嘅建造起因同方法至今依然喺個不解之謎，非常神秘啊！有部分學者認為喺古代民族用巨石陣嚟記錄太陽嘅運行去分辨季節，亦有考古學家猜測最初可能喺古時嘅墓地，不過小編就認為其實喺UFO降落地球嘅停機坪，哈哈！唔知你又覺得喺啲咩呢? 最後一站嚟到巴斯，相傳古羅馬人喺呢個地方周圍修建咗好多奢華嘅浴池，而浴池嘅英文喺Bath，因此呢個地方就叫Bath，中文譯叫做巴斯。此外，喺公元一世紀，李爾王嘅父親BLADUD王子，因患咗痲瘋病，被放逐到鄉下，因為誤浸泥塘邊嘅溫泉水而醫返好；所以到咗布拉德繼位之後，便大興土木挖掘溫泉水仲起咗個浴場叫「國王的浴池」，亦即喺依家巴斯最出名嘅博物館 - 羅馬浴場(Roman Baths)，入到去博物館就好似置身喺電影《羅馬浴場》之中。 【Day 4】白金漢宮 & 西敏區域 白金漢宮(Buckingham Palace)喺英國王室位於倫敦嘅主要寢宮同辦公室，亦喺國家慶典同王室歡迎禮舉行嘅行場地之一，同時都喺一個重要嘅旅遊景點。打算搭地鐵去嘅朋友，可以喺Green Park落車行大概10分鐘就到。小編提提大家預早一至兩個鐘去霸位，否則就搵唔到靚位睇衛兵交接儀式。儀式並唔喺每日進行，最好預先上網查閱交接時間表。 睇完衛兵交接之後，可以沿住St. Jame’s Park一路散步去西敏市。每年嘅三月尾四月頭開始踏入英國嘅春天，公園裡面嘅櫻花都陸續開放，拍得住日本咁靚呀！ 行到公園出口旁邊有個Horse Guards Parade，仲可以同衛兵Selfie架，記得唔好錯過！ 去到西敏市，小編覺得肚餓就去咗Charing Cross Station附近間Pub叫Sherlock Holmes。鍾意《福爾摩斯》嘅朋友可以入去參觀下，二樓有間Display Room可以影相，之後就食番個Fish & Chips，再歎番杯Sherlock Holmes Beer，想像同福爾摩斯摸住酒杯底研究案情，是咪一大樂事呢？！ 而Charing Cross Station另一個地標就喺呢個特拉法加廣場(Trafalgar Square)，廣場嘅標誌物「納爾遜紀念柱」，喺為咗紀念英國海軍上將霍雷肖·納爾遜喺特拉法加戰役中獲勝而建造，柱頂嘅銅像就喺將軍啦。 呢個廣場曾經喺BBC版本嘅《新世紀福爾摩斯》第一季嘅第二集《銀行家之死》出現過，當時福爾摩斯正正就喺呢度同華生有過一段對話。喺《福爾摩斯》Fans嘅小編又點可以唔影番張相留念呢？！ 另外，特拉法加廣場前面嘅國家美術館(National Gallery)都頗有歷史，佢喺1824年成立，相信至今已經收集超過2,000件由13世紀至19世紀嘅繪畫作品，小編誠意推介鍾意藝術嘅朋友入場參觀，入場費喺全免，只喺特別展覽先會收費，大概兩個鐘左右就可以行哂，所以無理由唔入去見識一下masterpiece架！欣賞美術品之餘，記得要同呢個美術館影番張相呀，因為佢喺《James Bond - Skyfall》出現過。 西敏寺(Westminster Abbey)可以話喺倫敦必去嘅地方之一，佢不單只喺世界文化遺產，同時喺大多數重要婚禮、洗禮同葬禮嘅地方，好似黛安娜王妃嘅葬禮都喺喺度舉行。除咗同英國王室有淵源之外，西敏寺仲安葬咗超過3000個偉人，其中有達爾文、牛頓、霍金等。如果想參觀西敏寺內部，喺需要收費，若然唔想俾入場費，可以上官網check下有邊日喺免費開放。無論入唔入場，至少都要喺外面Selfie一下呢個咁偉大嘅建築物。 跟住就行去離西敏寺附近無幾遠嘅大笨鐘(Big Ben)同國會大廈(Houses of Parliament)，國會大廈喺英國國會（包括上議院同下議院）嘅所在地。佢喺1987年都被列為世界文化遺產，而西北方嘅鐘樓就喺著名嘅大笨鐘。可惜大笨鐘由2017年8月宣布進行為期4年嘅維修，小編去到嘅時候唔單止聽唔到鐘聲，就連外牆都已經拆清光啦，So Sad！ 喺大笨鐘同國會大廈嘅對面就喺倫敦眼(London Eye)，又叫千禧之輪（Millennium Wheel），喺英國為慶祝2000年嘅來臨而興建，原定5年後拆卸；由於極受英國人同遊客歡迎，當地市議會（Lambeth Council）就決定長期保留倫敦眼；而可口可樂英國分公司就喺2015年1月起開始贊助其營運，於是改名為可口可樂倫敦眼。倫敦眼曾經贏過超過85項獎項，喺依家英國最受歡迎嘅收費地標，小編比較慳家無坐到上去，只喺遠遠咁影咗張相。 P.S. 其實西敏寺、大笨鐘、國會大廈同埋倫敦眼喺BBC版本《新世紀福爾摩斯》嘅經典片頭，由於大笨鐘依家骨包皮唔靚仔，所以放棄實景拍攝了XD 【Day 5】大英博物館 &倫敦南岸 大英博物館(The British Museum)喺一座英國倫敦嘅綜合博物館，同時都喺世界上規模最大、最有名嘅博物館之一。目前博物館內擁有嘅收藏品超過800萬件，最吸引小編嘅地方就喺埃及區，呢度除咗可以睇到埃及法老嗰棺材之外，仲有唔同Size嘅「木乃伊」，真喺大開眼界。呢間博物館嘅收藏認真豐富，令人眼花繚亂，建議預留半日時間參觀，費用方面都喺全免架！只要喺Tottenham Court Road地鐵站行5分鐘就到，非常方便。 聖保羅大教堂(St Paul's Cathedral)喺英國國內最重要嘅教堂，曾經查爾斯王子同戴安娜王妃嘅世紀婚禮以及威廉王子同凱特王妃嘅婚禮都喺度舉行。呢個教堂同西敏寺一樣，入裡面參觀喺要收費嘅。只要搭地鐵喺St Paul's站落車行5分鐘就到。 由聖保羅大教堂向南行就喺千禧橋(Millennium Bridge)，喺一座橫跨倫敦泰晤士河嘅鋼桁懸索橋，佢喺2000年6月10日先正式開放俾人行。呢條橋曾經喺電影《哈利波特與混血王子的背叛》中出現，當時千禧橋喺食死人嘅攻擊下倒塌咗。仲有千禧橋都曾經喺2014年上映嘅Marvel電影《銀河守護隊1》裡面出現過，唔知大家有無印象呢？！ 另外，喺橋上面可以睇到另一個出名嘅建築 - 碎片大廈(The Shard)，個樣好似一件未完成嘅作品，設計嘅嘢小編真喺識條鐵咩。其實佢仲有另一個名叫摘星塔，因為喺英國最高嘅建築物，上到搭頂估計可以摘到天上嘅星星掛。 到咗橋呢一面嘅泰特現代美術館(Tate Modern)，對現代藝術有興趣嘅朋友不妨入去行下，同國家美術館一樣都喺免費入場(特別展覽除外)，小編就睇咗呢期嘅特別展 – Picasso 1932，第一次睇得明抽象派大使畢加索嘅作品 XD 行完美術館沿住岸邊行大概30分鐘就到倫敦塔(Tower of London)同倫敦塔橋(Tower Bridge)，如果唔想行，可以喺泰特現代美術館附近嘅Blackfriars地鐵站搭去Tower Hill站行5-10分鐘就到。 首先同大家介紹下倫敦塔嘅來歷，佢喺位於倫敦市中心、泰晤士河北岸嘅一座城堡，佢名義上喺英國王室嘅宮殿，但實際上曾經用作軍事要塞，甚至用作關押上級囚犯嘅監獄。依家嘅倫敦塔成為咗旅遊地標，只要買張入場券就可以參觀塔橋嘅建造歷史同埋俯瞰到整個泰晤士河嘅美景。 倫敦塔橋成日被人同倫敦橋（London Bridge）混淆，個首耳熟能詳嘅童謠《London Bridge Is Falling Down》其實喺指倫敦塔橋。倫敦塔橋會因水上交通而作出升降，至今平均每年約升降500次。雖然依家比以前嘅升降量少咗好多，但水上交通依然喺比公路交通享有優先權。 P.S. 倫敦通行證(London Pass)喺一張可以遊覽超過60 個倫敦景點、享受 20 多種優惠折扣嘅Pass，仲可以喺指定熱門景點享受快速通關。好似小編呢兩日嘅景點London Pass大部分都cover到，但小編計過最划算喺買1 Day Pass一日內去哂西敏寺、聖保羅大教堂、倫敦塔、倫敦塔橋展覽室、泰晤士河遊覽船先值回票價。其實咁玩都幾攰，所以小編無考慮過買，只喺喺外面影下相，證明自己曾經「到此一遊」，窮遊就喺要慳到盡 XD 【Day 6】科茲窩& 史特拉福 今日喺小編參加最後嘅一個導賞團，首先喺去位於牛津以西嘅科茲窩(Cotswolds)，佢喺一個充滿濃厚而純正英國風味嘅小鎮，因此被稱為歐洲三大最靚嘅田園地域之一，呢個名銜可謂實至名歸，小編置身其中，好似去咗童話故事嘅感覺，真喺好鬼靚！ 下一站嚟到史特拉福(Stratford)英國出名嘅劇作家威廉莎士比亞(William Shakespeare)嘅故鄉，首先喺去參觀莎士比亞嘅太太Anne Hathaway成長嘅屋企Anne Hathaway's Cottage，從裡面嘅一磚一瓦、一杯一碟、一針一線可以想像到500年前農民家庭嘅環境喺點。 點擊圖片放大 輪到去了解莎士比亞成長嘅地方Shakespeare's Birthplace，呢度喺莎士比亞同八兄弟姐妹一齊長大嘅屋，亦喺曾經同太太Anne婚後住到離世嘅地方。呢個地方仲不時有職員著住戲服演譯莎翁嘅劇目，不過小編淨喺識《羅密歐與茱麗葉》，所以唔喺好知佢地演緊邊套打邊套，哈哈XD。 點擊圖片放大 +2 最後就喺去莎士比亞細個讀書嘅學校Shakespeare's School Room親身體驗舊時嘅學習環境。莎翁年代一星期要上六日正式堂，星期日仲要返教堂上禮拜堂添，同依家香港小學生一樣咁悽涼；另外古時 喺有體罰日，亦喺老師最期待嘅日子(不過唔知真定假，可能喺職員想搞氣氛作出嚟) ，不過小編也經歷過體罰嘅年代，唔小心暴露咗小編嘅年齡添 XD 總括，三個導賞團嚟講，小編就最鍾意今日呢個。除咗可以見識到充滿純正英國風味嘅小鎮，另外仲可以欣賞到莎士比亞年代嘅獨特建築設計，再加埋有互動體驗，真心要同大家推介呢兩個地方。 P.S. 其實想去倫敦郊區嘅景點，好似牛津(Oxford)、劍橋(Cambridge)、溫莎(Windsor)、巴斯(Bath)，甚至蘇格蘭嘅愛丁堡(Edinburgh)，都可以搭英國國鐵(National Rail)或者長途巴士。若然大家想慳水慳力慳時間，學小編參加當地嘅導賞團都算喺個唔錯嘅選擇。Golden Tours算喺當地一間規模頗大而且價錢合理嘅旅行社，佢唔單止有多種形式兼語言嘅導賞團，仲有代購熱門景點同體驗活動嘅優惠門票添。 【Day 7】跟住電影遊倫敦 小編自從睇咗電影《柏靈頓2 - 柏靈頓熊熊出任務》就覺得呢隻熊熊好搞鬼，所以就想嚟了解一下故事嘅起源。 原來柏靈頓熊熊就喺喺Paddington國鐵站認識咗布朗一家，從此開始咗倫敦嘅生活… 探完柏靈頓熊熊就要去搵我嘅偶像《福爾摩斯》，自少就喺佢超級Fans嘅小編，由小說到電影仲有英國BBC電視台推出嘅「新世紀福爾摩斯 - 電視劇」都keep住有追。今次難得嚟到倫敦，當然要朝聖，偶像我嚟啦！！！ 由Paddington站搭地鐵去Baker Street站，就會見到福爾摩斯歡迎你! 一出咗車站就有個Sherlock Holmes – The Great Detective嘅雕像正搜尋疑犯中… 見到杜莎夫人蠟像館向後行多一條街就到貝克街221B嘅福爾摩斯博物館 千祈唔好傻奸奸喺度排隊，要先行去入口旁邊嘅「福爾摩斯紀念品店」買咗入場劵先再返去排隊。福爾摩斯博物館喺仿柯南道爾小說嘅場景去重現公寓221B，裡頭當然採用咗小說背景維多利亞時期嘅建築同裝修，因此每一忽都喺值得影相留念嘅地方，不枉小編足足喺暴雨下排咗一個鐘。此外，福爾摩斯博物館一共有「福爾摩斯房間」、「華生房間」、「哈德遜夫人房間」、「客廳」、「小說相關劇情展示房」等五間房可以參觀。而呢嗰客廳就喺福爾摩斯同華生研究案情嘅地方，枱上有煙斗、獵帽、放大鏡等道具可以用嚟影相，但其他物品就唔好掂呀。 點擊圖片放大 +2 P.S. 如果想了解更多有關BBC版本嘅福爾摩斯拍攝地點，歡迎瀏覽以下網頁：http://www.sherlockology.com/locations 若然喜歡《哈利波特》嘅朋友，絕對不要錯過位於倫敦近郊嘅哈利波特影城，聽講呢度可以搵齊八部電影用過嘅場景、魔法道具、服飾、人臉模型等，場內仲有美術設計嘅草稿、特效組製作出嚟嘅魔法效果機器等等。可惜小編訂唔到飛無得去，咁唯有自己去搵《哈利波特》嘅其他實景。 身為《哈利波特》書迷兼電影迷嘅小編，絕對唔能夠錯過倫敦國王十字車站 (King’s Cross Station)嘅九又四分之三月台，原來呢度喺小說作者J·K·羅琳 (J. K. Rowling) 父母初認識相戀嘅車站，因此成為咗哈利波特故事嘅起源。每年嘅九月一日，所有霍格華茲嘅學生都要穿過呢嗰月台，搭霍格華茲特快列車前往魔法學園。 小編專誠嚟到無理由唔影番張相留念架！ 其實國王十字車站隔壁仲有另一個《哈利波特》場景，就喺St Pancras International嘅外觀。佢喺電影第二集《哈利波特 - 消失的密室》榮恩開住佢老豆架「Ford Anglia」起飛嘅地點。 嚟到今日最後一個地方皮卡迪利圓環(Piccadilly Circus)喺倫敦嘅購物區，以圓環為中心，沿攝政街(Regent Street)開始就喺倫敦購物區嘅起點。如果想搵平價品牌，可以去牛津街(Oxford Street)；如果想搵世界名牌精品，就要去龐德街(Bond Street)；而酒吧、音樂劇院、電影院就喺蘇豪區(Soho) ；蘇豪區南邊就喺中國城(Chinatown) 。 其實皮卡迪利圓環除咗喺購物中心之外，佢仲喺BBC版本《新世紀福爾摩斯》每集片頭曲閃過嘅地標。同埋亦喺電影《哈利波特》第七集《死神的聖物》中三位主角一同衝過West End差啲被巴士撞到嘅地點。 P.S. 皮卡迪利圓環嘅Leicester Square有間Palace Threatre依家上映緊《Harry Potter and the Cursed Child》嘅舞台劇，有興趣嘅朋友可以去以下網頁查詢同訂票：https://www.harrypottertheplay.com/uk/ticket-information/ 【Day 8 】前往約克 之前都講過想去倫敦範圍外嘅景點，除咗跟導賞團，其實可以考慮搭快速嘅英國國鐵(National Rail)。英國國鐵同日本地鐵好似，都喺由唔同嘅火車公司去營運唔同嘅路線，而每個火車站都有自己嘅路線。由於小編要去約克(York)探個七年無見嘅老朋友，所以要搭地鐵去倫敦國王十字車站 (King’s Cross Station) 再轉國鐵。 英國嘅火車飛喺越早訂就越平，通常可以利用「National Rail」查詢所有車飛嘅營運公司，再經連結去所屬嘅官網購買。英國嘅火車飛會有預售早鳥票(Advance)、離峰票(Off-Peak)同尖峰票(Anytime)三種。今次小編就揀咗買預售早鳥票，因為喺最平，不過早鳥票只提供俾長途路線，好似倫敦去溫莎就無早鳥票；而早鳥票喺採用單程票(Single Ticket)發售，所以必須喺買飛前決定好出發/回程日期、時間；若需退票、換票喺要額外加收手續費。 買飛嘅過程唔算複雜，Step by Step就OK，最後揀「車站取票(Ticket on Depature at the station)」。有樣嘢要注意嘅喺買飛時唔會知邊個月台上車架，可能要到搭車前10分鐘先公佈，所以要不時昅住車站個告示版，一公佈之後就高速衝向閘口去所屬嘅月台上車就得。 坐咗2個鐘火車終於嚟到約克啦！放低行李，朋友仔個老公就揸車帶我哋去參觀塞爾比教堂(Selby Abbey)(連佢哋住咗約克咁耐都未嚟過架)。表面上只喺一間小鎮教堂，其實佢喺周杰倫同昆凌當年舉辦世紀婚禮嘅地方，小編有幸到此一遊，相信羨煞唔少周董Fans。 【Day 9】約克半日遊 & 旅程結束 嚟到旅程嘅最後一日，由於時間有限，朋友仔就帶小編遊覽約克市中心。第一個景點喺約克城牆(York City Walls)喺環繞約克嘅古城牆，全長約2.75英里(含中斷部分)，環繞面積約263英畝。 呢座城牆喺英國相當有代表性嘅中世紀城牆，佢喺西元71年由羅馬人建造，之後俾維京人侵略後，城牆就損毀咗；其後由丹麥人重建，依家成為咗英國一級保護嘅建築物。 之後由城牆行大概5分鐘就到約克大教堂(York Minster)，佢喺歐洲北部第二大嘅哥德式教堂。教堂嘅平面呈十字形，八角形嘅禮堂與北翼、中央塔同西面嘅兩座塔樓連接而成。南北兩翼都佈滿聞名於世嘅彩繪玻璃窗，最有名喺北面嘅「五姐妹窗」，莊嚴宏偉；而南翼就設置咗色彩豐富嘅「玫瑰窗」，裝飾華麗。 除左喺倫敦、牛津、愛丁堡可以搵到《哈利波特》嘅電影實景，估唔到喺約克The Shambles呢條街都可以搵到「Diagon Alley」，仲有賣《哈利波特》產品嘅舖頭，舖頭入面嘅裝飾都喺彷照電影咁架，What a surprise！ 點擊圖片放大 +2 由The Shambles行大概10分鐘就到約克城堡(Clifford's Tower) ，佢喺過去嘅九個世紀好multi-functional，曾經被作為城堡、監獄、法院等用途，有時又會被稱為「幸福之塔」。不過朋友仔話只喺得番個圈入面無乜野睇架喎，所以小編同熊仔喺外面影張「到此一遊」就算。 又到咗手信時間，朋友仔介紹我去York's Chocolate Story，喺呢度除咗有各式各樣嘅朱古力買，佢仲可以好似電影《朱古力掌門人》咁睇住每一粒朱古力嘅誕生，同時可以自己「落手」製作自己嘅朱古力留念架。呢度嘅朱古力口味好多又唔算甜，搞到小編忍唔住買咗幾包做手信。 食完個Lunch帶住依依不捨嘅心情同朋友仔道別，然後出返去希斯洛機場搭飛機返香港lu~ 總結：呢9日8夜嘅快閃英倫之旅，令我見識唔少歐洲嘅美景同建築，亦了解多咗歐洲嘅文化同生活態度。如果大家喺初次踏足英國而Budget有限，除咗要提早訂機票、酒店同火車飛，亦可以主攻免費入場嘅博物館同古蹟，而London Pass可視乎個人需要去購買。 另外，英國喺個高消費又要俾Tips嘅國家，建議儘量買Take Away或者去超市買餸自己煮，好似Tesco / M&S有時會有驚喜筍貨。(注意營業時間會因週末、假日縮短甚至休息) 至於治安方面，英國算比其他歐洲地方OK，但都要注意扒手同乞丐衣，佢哋大多數出沒喺交通工具上、車站附近、人多嘅景點。真喺唔好彩遇到乞錢黨、進取型慈善募捐黨，唔理三七二十一，快鬼啲離開現場，仲有唔好一個女人夜晚喺僻靜嘅街到遊蕩，好危險架。 完成咗呢編攻略，小編又喺時候計劃下次嘅旅程啦~
