人生偶爾要好好慰勞自己，提前預訂今晚嘆一頓富豪酒家聞名嘅阿翁鮑魚，體驗傳統星級粵菜嘅水準。 餐廳環境同一般平民酒樓好大分別，裝修沉穩大氣，氛圍高尚雅緻，不論朋友聚餐或者慶祝場合都好適合。 今次揀咗【阿翁鮑魚名菜宴（兩位起供應）】，選用 30 頭養殖吉品鮑，HK$980 / 位: 🍲紅燒砂鍋包翅湯底質地順滑，但味道偏向清淡，唔會過份重鹹。排翅份量相當足，一絲絲梳梳整整睇得見，真材實料，作為開頭湯羹好合適。 🦪養殖吉品鮑扣鵝掌（套餐重點）鮑魚果然質素、味道獨特, 30頭養殖吉品鮑炆得火候恰到好處，入口軟糯，配搭嘅鵝掌充滿膠質，燉到軟稔。加上自家調製香滑蠔油芡，配搭完美，每一口都充滿膠感。 🐟金銀黃皮老虎斑老虎斑厚切，肉質結實飽滿，食到魚肉本身嘅鮮甜同彈牙口感。一魚兩食，一邊保持魚鮮原味；另一邊係鹹蛋黃炸皮做法，外皮金黃微脆，不過鹹蛋黃風味比較突出，稍為蓋過了少少魚嘅鮮味。 🐔富豪脆皮炸子雞外皮炸得相當酥脆，肉質嫩、味道偏清淡，建議一定要點淮鹽一齊食，鹹香可以將雞嘅鮮味完全提昇，香而不油。 🥬方魚生炒芥蘭仔芥蘭仔炒得火候控制得好，保持住爽脆口感，帶住蔬菜本身嘅甘香。混入烘香嘅方魚乾一齊生炒，香口惹味。 🍚海蝦仁叉燒炒飯炒飯炒得夠乾身，每一粒米都粒粒分明，唔會黏成一舊。入面有鮮甜海蝦仁同香甜叉燒，材料豐富，入口層次感充足，就算食到後面都可以好好填飽個胃。 🍮蛋白生磨杏仁茶杏仁香氣非常濃厚，係真材實料生磨嘅風味，唔係香精味。入面有一大舊厚滑嘅蛋白，口感綿密滑溜，熱辣辣飲落，潤喉又解膩。 🍰精選甜美點兩款：西米糕、合桃酥尾點配咗兩款傳統中點。西米糕清甜；合桃酥酥鬆化口，不會過甜，為成個盛宴作一個舒服嘅完結。 富豪酒家尖沙咀彌敦道 132 號美麗華廣場 1 期食四方 4 樓 402 號舖.KERESAWONG.L.S'S PLATFORM:Instagram: https://www.instagram.com/keresawong.l.s/Facebook: https://www.facebook.com/keresawong/Threads: https://www.threads.com/@keresawong.l.sBlogspot: https://keresawongls.blogspot.hk/Ublog: https://blog.ulifestyle.com.hk/keresawongXHS: https://www.xiaohongshu.com/user/profile/5b230759e8ac2b524de93a5e
