超推介呢間連鎖主打串燒嘅「李小太燒烤」, 平日晚六點幾晚飯時段, 門口總會見到唔少人等位, 而今日我地五點幾左右, 全店都仲有兩三張吉檯, 可以順利安排入座。 餐廳地方簡潔, 每張檯檯面都放有一個小小鐵盤, 串燒上檯會直接放於鐵盤之上, 下層有火興住, 有助keep住串燒溫度。 經常北上用餐嘅朋友都知, 點評/美團長期有優惠, 除咗套餐, 亦可以買劵支付, 打折咁食, 就最為化算。今次我決定散叫, 原因係想點餐廳招牌砂鍋粥同埋多款串燒, 最後用咗點評嘅 RMB48買RMB50嘅現金劵使用。 【海蝦瑤柱砂鍋粥】RMB69望入廚房, 已見火候十足, 砂鍋粥熱滾滾上檯, 約有3-4人份量, 沒有大細size之分, 但依然覺得兩個人黎到都必定要點來試試! 首先香港絕對唔會用到呢個價錢食到咁大煲海鮮粥, 而且係非常足料又好味。 砂鍋粥粥底綿滑得有如杰身忌廉湯, 蝦肉盡吸粥底, 海鮮精華充分融入米飯中,每粒米都吸滿海鮮醇厚鮮味, 自行加入莞茜, 多一份莞茜香, 更為美味。 【鹽烤羅氏蝦】RMB12/隻另外必點就係鹽烤羅氏蝦!!!羅氏蝦直接從魚缸中撈起, 即撈即烤, 絕對新鮮, 表面灑上了鹽粒, 令蝦嘅鮮味更提升同突出, 蝦頭中有蝦膏, 蝦肉脤卜卜好爽彈, 口感同味道同樣大讚!! 【雞脆骨】RMB19/四串脆骨香脆可口, 加咗少少辣粉, 辣辣地幾惹味。 【雞腎】RMB13/四串雞腎口感好爽, 雖然偏小, 但一d都唔乾身, keep到些少原本肉汁, 同時灑上辣粉作調味。 【烤蒜蓉生蠔】RMB12/隻大大隻肥美生蠔, 加咗大量蒜蓉, 些少辣椒粒, 微辣惹味, 又能食出蠔嘅鮮甜。 【烤蒜蓉東菇】RMB10/兩串東菇唔會烤得太乾, 咬落去都仲keep到原本嘅水份, 每隻菇上都加咗大量蒜蓉、些少辣椒粒, 蒜香味美。 【烤香腸】RMB6/串可自選蜜糖/辣, 雖然香腸表面𠝹開了, 皮唔會好脆, 香腸味道鹹甜, 表面有少少辣粉, 味道還好, 但不是必食之一。 【炭烤雞全翼】RMB10/串雞全翼表面但點油光, 但入口又唔覺好油, 表面幾香口, 內裡肉質軟嫩有肉汁, 我揀咗小辣, 辣辣地又幾正。 .李小太·烧烤(皇庭广场店)福田街道福华三路皇庭国商购物广场L2-3營業時間: 11:00至次日02:00交通: 會展中心站D出口其他平台:Instagram: https://www.instagram.com/keresawong.l.s/Facebook: https://www.facebook.com/keresawong/Blogspot: https://keresawongls.blogspot.hk/Ublog: https://blog.ulifestyle.com.hk/keresawongShe.com: https://blog.she.com/keresawong/小紅書: https://www.xiaohongshu.com/user/profile/5b230759e8ac2b524de93a5eESDlife: http://wow.esdlife.com/keresawongWeibo: http://weibo.com/keresawong
