好姊妹為答謝我結婚當日幫手, 特意邀請我出去食返餐, 知我中意食鐵板餐, book咗尖沙咀The ONE 19樓嘅「鐵板燒海賀」食Teppanyaki。 從門口步入鐵板燒區域, 原來呢度仲返有日式omakase, 而鐵板燒就設於環境較為開揚嘅區域。雖然今次未能安排坐鐵板位, 不過窗邊用餐區亦可欣賞到城市景兼遠望維港海景, 同樣滿足視覺享受。 全日供應「木犀套餐」HK$728/位 其中可自選主食二選一, 雖然看似款式不算多, 但對於LUNCH黎講, 絕對係食得飽。我地兩個人都揀咗不同款再share, 可以品嚐到每款菜式。前菜三點:前菜包含蟹籽蟹肉鱈魚乾、日式炸豆腐和熟蝦醋物。鱈魚乾鹹甜鬆脆, 蟹肉鮮甜, 蟹籽增加層次; 炸豆腐鬆軟, 熟蝦爽, 配上酸醋海帶, 好開胃。 紫菜蠔汁鮑魚:鮑魚煙韌彈牙, 易咬開, 配上濃郁甘香嘅紫菜蠔汁, 令鮑魚鮮味更突出。伴有經師傅安全處理過嘅鮑魚肝, 外層煎得微脆香口, 味道甘香回甘。 桃味噌銀鱈魚:鮮嫩銀鱈魚, 配上白桃同埋西京面豉打成嘅醬汁, 鹹甜中帶清爽果香。 大蝦佐蟹膏醬:大蝦厚肉爽口, 鮮甜又juicy, 附上蟹肉膏醬汁自行沾用調味, 令味道再提鮮。伴有脆卜卜多士, 伴蟹肉膏醬汁食, 配搭很不錯! 鵝肝和牛:和牛粒軟腍多汁, 牛香滿溢, 伴碟嘅黑松露汁令味道更為濃郁重口味, 配蒜片食, 平均了重口味同埋油膩感; 鵝肝外脆內軟, 入口即溶, 配上黑醋汁, 中和鵝肝膩感。 黑松露和牛炒飯:炒飯乾身不油, 粒粒分明, 不過味道偏淡, 黑松露味不出。 鰹蜆湯烏冬:烏冬爽滑彈牙, 鰹蜆湯清甜, 但其中一隻蜆有沙。 最後送上甜品---抹茶雪糕, 飲品coffee/tea, 估唔到可選Latte同埋chocolate, 合哂我地心水。 見時間尚早, 再order咗兩杯野飲慢慢閒聊,【Fruit Berry Punch】HK$108由多種莓類融合製成, 酸尾尾, 岩哂食到飽飽時消下滯。【Honey Moon】HK$108由番石榴、蜜糖、鳳梨汁調製而成, 而且帶有鳳梨蓉, 比較杰身, 果香味十足。 鐵板燒海賀尖沙咀彌敦道100號The ONE 19樓.其他平台:Instagram: https://www.instagram.com/keresawong.l.s/Facebook: https://www.facebook.com/keresawong/Blogspot: https://keresawongls.blogspot.hk/Ublog: https://blog.ulifestyle.com.hk/keresawongShe.com: https://blog.she.com/keresawong/小紅書: https://www.xiaohongshu.com/user/profile/5b230759e8ac2b524de93a5eESDlife: http://wow.esdlife.com/keresawongWeibo: http://weibo.com/keresawong