所謂嘅Bahn，其實即係德文「鐵路」。作為強大嘅德國嘅首都嘅主要交通工具，S-Bahn 同埋U-Bahn 肩負起將柏林市民遊客安全運送到市內每個角落嘅重任！（無人guarantee過佢係「快」呀下…） ↗ 開啟原圖 Photo courtesy: bahn.com 唔好畀呢張路線圖嚇親，其實成個柏林集體運輸系統最複雜嘅係啲站嘅讀音（當然啦，我住咗10日都只係識讀10個以下站名… 有好幾個成日去嘅站我到依家都仲未識讀… e.g. Friedrichstraße ）！真心覺得香港地鐵＆輕鐵比Bahn更容易搭錯車。所以嘛，下次嚟到柏林，儘管搭bahn啦，唔使怕㗎。堅信自己唔過的話，都可以有mobile app（VBB: iOS／Android）幫到你。 首先要了解柏林公共交通收費模式。因為柏林只有兩個機構去營運公共交通工具，而佢哋又傾得掂數，所以呢，佢哋將柏林市同埋周邊地區劃成3個zone，上圖中間白色嘅area 係zone A，包住zone A淺灰色嘅係zone B，最外圍深灰色嘅係zone C。所有收費（包括鐵路、電車、巴士）都係base on 呢幾個區域或分的。（題外話：香港有港鐵九巴新巴城巴紅van綠van九百幾間公司去經營公共交通… 真係等到2047都唔會見到有機會行到類似system…） 作為良好公民，搭車當然要買飛啦~ 每個你有機會搭到公共交通工具嘅地方，裡面都一定有售票機的。一撳你就會後悔，因為就算畀你睇住英文interface，你都未必即刻知道應該買邊張飛（張飛：叫俺啥事？）。要買啱飛，其實唔難，以下係幾項最常用嘅車飛。 － AB區單程票(Einzeltickets, €2.60/€1.60)－一程過AB區內去邊都得。由打飛*一刻起計兩個鐘內有效。唔平的，但搭得安心。有一款平啲嘅飛，可以畀你搭最多3個站，不過都要 €1.50/€1.20。 － AB區全日票(Tageskarte, €6.70/€4.70)－同單程票有效範圍一樣，而且全日有效！ － AB區月票(Monatskarten, €78.00)－全月AB區有效，而且平日晚上8點後＆週末全日可以帶多最多3個小朋友搭車不另收費！ － AB區10點後月票(10-Uhr-Karte, €57.00)－平價版月票，平日早上10點後生效，而且無得帶小朋友。 － Berlin Welcome Card (48 hours: €18.50; 72 hours: €24.50; 5-day: 31.50)－呢張卡就巴閉喇… 基本上喺生效時間內，AB區公共交通工任搭，博物館／gallery／其他旅遊attraction／食肆有高達5折discount！呢張welcome card仲有幾個version，無論你係鍾意漫遊Potsdam，或者鍾意check in Museum Island 嘅博物館，都總有一張啱至識揀嘅你。由你到達柏林嘅一刻已經有得賣喇，認住佢個樣啦！ * 柏林所有交通工具都冇閘的，係一個trust system，當你買咗飛之後，要攝張飛（張飛：又點呀？！）入一個指定儀器，佢會mark 當時日子時間喺飛上面，代表車票開始生效。唔好信網上啲人話好容易逃票，我喺到10日裡面已經見過3次check 飛。諗住長住嘅朋友更加要小心，因為除咗即畀罰款之外，僱主仲可以check 到相關逃票紀錄，德國人重原則，你知道有咩下場啦… 柏林Bahn 其實好細心㗎。知道你一手湊大幾隻化骨龍唔易，所有6歲以下小童同埋手抱嘅小形狗狗，一律唔收費！一眾party goer 亦都要知道，星期五＆六晚 S-Bahn & U-Bahn 會通宵行駛的！ 不過當你隻狗狗（雖然你永遠覺得佢cutie 可愛kawaii）唔係手抱size，就要另外買飛了。又如果你踩單車踩到攰想搭bahn，你都需要為你嘅單車買飛㗎。 大家可能會問，咁C區呢…？ 點解講咗咁耐都未提到C區？ 其實大家嚟柏林旅遊同埋基本生活，都好少會去到C區的（除非在working holiday 的你搵到份C區工…阿門）。不過千其唔好掉以輕心！因為旅遊勝地Potsdam 同埋Schönefeld Airport (SXF)機場都係座落C區的，買月票嘅朋友記得補飛，你都唔想未出發去玩，先交罰款啦~ （講真，呢到查飛嘅staff 係無制服無樣睇而且無先兆的） 講完收費就講下兩條Bahn喇。S-Bahn 同埋U-Bahn 係柏林成個公共交通系統嘅骨幹，兩者之間有唔少交錯嘅車站，乘客可以隨意挑選自己鍾意嘅路線，安全到達目的地（無人guarantee 過佢係「快」呀下…）。叫得你揀，除咗因為人哋真係有得畀你揀之外，仲有好多考慮因素的。 仲有咩因素？Umm…… 例如個站靚唔靚啦。阿先生，麻煩你放低你個沙煲咁大嘅拳頭，聽埋我講先好無？ 話說由19世紀開始，日耳曼人已經係歐洲經濟發展嘅龍頭。鐵路對城市化同埋軍事動員都有重要幫助，日耳曼人當然投重本落去興建啦！去到1860年代，日耳曼人都仲未統一成為一個國家，鐵路網絡就已經連接晒大多數日耳曼城市同埋工業重鎮。德意志帝國成立之後，作為首都嘅柏林更加大興土木，經過一輪又一輪發展之後（唔sure有無迫遷，wikipedia無提我就當無啦…），U-Bahn 同 S-Bahn 相繼於20世紀初開始投入服務。 講咁耐，我都只係想講畀大家知一個字：舊！ 舊有舊嘅好。如果大家係搭火車入柏林的話，第一個接觸嘅bahnhof 應該係Hauptbahnhof（中央車站），可以接駁S-Bahn 到柏林唔同地方。沿住S-Bahn一路走，你會發覺，差唔多個個站都係歷史建築，但睇落又不失摩登霸氣。建築藝術呢家嘢，我識條毛咩，所以都係share 張相畀大家睇睇： ↗ 開啟原圖 呢到係Berlin-Friedrichstraße 站月台，樓底非常高，月台之間只有幾條鋼柱，而且同大部份S-Bahn車站一樣都係位於戶外，視野感覺都非常開揚舒服（無錯，到冬天我應該會後悔…）。戶外嘛，即係電話嘅connection 會非常好（無人guarantee 過佢係「快」呀下…），上網或者講電話都一流。月台中間仲會有kiosk 畀你去買下小食又或者唱下散紙買車飛（呢到嘅售票機有偏食問題，唔係咩紙幣都收的）。班次display十分之詳細，會list out 呢班車會經過嘅幾個站名，畀你make sure唔會搭錯車或者誤認end station（！）。 講開呢個Berlin-Friedrichstraße站，不得不提佢嘅巴閉歷史。話說1961年，東德政府興建柏林圍牆，將西方國家管理嘅西柏林團團圍住，鐵路網都因而一分為二。當中東柏林有大部份U-Bahn站都停止運作，成為傳說中嘅Geisterbahnhöfe （ghost station）。而Friedrichstraße 就係唯一一個畀人轉車嘅車站，裡面有一間東德政府開嘅「免稅店」，專門賣物資畀被圍困嘅西柏林市民去賺錢…！東德政府亦唔準所有公務員搭會經過西柏林嘅路線，otherwise 秘密警察會嚟叫你講啲秘密畀佢聽… 睇到呢到，有無朋友好似我咁，腦海裡面浮現特務電影情節呢？ 言歸正傳，呢排S-Bahn陸續安排維修，有時有啲站會直程閂門，train service 亦會受影響，到時要搭班次十分頻密（無人guarantee 過佢係「快」呀下…）嘅shuttle bus往返受影響嘅車站。所以記得留意站內告示啊。 咁U-Bahn呢？ Okay，睇相先： ↗ 開啟原圖 U-Bahn有啲似香港嘅地鐵（我係死唔叫佢做港鐵，吹咩？），大部份站都係underground，所以會叫U-Bahn （同時echo 返戰時德國好出名嘅U-boat－即係潛水艇）。而呢啲地下鐵站，郁啲都有過百年歷史，有唔少就係base on之前提到嘅ghost station 重新營運，好多時候佢哋都represent咗舊都有舊嘅差。 幻想一下：行落車站時陰風陣陣，昏暗嘅燈光，火車由遠到近嘅尖音，成日都無乜人嘅月台，收得超差嘅電話network，有時仲有陣陣獨特人體體液氣味…… 每樣因素都令你想9秒9跳上車廂然後極速逃走！ 老老實實我就唔明點解會有人會join U-Bahn tunnel tour喇… 呢班仁兄應該都係由上車一刻起已經後悔…… 我同月台一眾花生撚影相時，心裡面都有衷心祝福，希望佢哋可以平安出返地面……阿門。 ↗ 開啟原圖 不過咁，U-Bahn的確將柏林好多唔同嘅小區連起，而且站與站之間唔算太遠，梗有個exit 喺左近。路線之間有好多轉車站，唔使兜嚟兜去，實在係方便之選。 同S-Bahn 唔同，S-Bahn 係由DB（即係德國鐵路公司）營運，而U-Bahn 同埋電車＆巴士都係由BVG（即係柏林交通公司）營運，由各個details 位你就會見到兩者之間嘅不同。 實際上，你大多數時間都需要S-Bahn U-Bahn互相搭配先可以去到目的地。識得揀，轉電車或者巴士有時會更方便。用VBB app (VBB: iOS／Android) 就可以search到各個前往目的地嘅搭法、班次、同埋所須時間，誠意推介畀初到柏林嘅朋友！ 無論你呢個ride 係搭S-Bahn 定U-Bahn，又無論呢條線你搭過幾多次，你都要小心留意架車嘅終點站…！ 有好多時候，架bahn唔會行晒成條線的，去到中間某個站就會返轉頭或者入廠……！一見到所有人落車，你就要小心了。有朋友就試過獨自一人跟車入咗車廠…… （放心，佢成功返到出嚟） ↗ 開啟原圖 其實入車廠又有乜好怕喎。At least 唔少Berlin party goer 都有類似經歷：每逢星期五同埋週末，bahn會通宵服務，只不過班次（再）疏落啲。於是有唔少人就會選擇買多兩支啤酒一路飲一路等。結果星期一早上總會見到啲醉貓一隻兩隻依然醉死車廂之內，坐bahn無限loop。 車廂裡面仲不時有其他見聞。最常見嘅除咗突然check 飛嘅便衣staff之外，仲會成日見到一啲失業人士（有時會帶埋佢哋隻狗），左手拎住份報紙，右手拎住個紙杯，一上車就會對全車人一輪咀咁講嘢，然後就會有人畀錢佢…… 未學德文嘅我當然唔知佢講乜，有朋友話呢個係報館／鐵路公司嘅CSR programme，免費畀啲報紙佢哋，上車讀畀人聽（！）然後賺返少少去糊口。 我覺得要去了解一個城市，公共交通會係一個好好嘅地方。喺呢到你會見到呢個城市嘅規劃、發展，又可以由其他乘客嘅行為動作，了解佢哋嘅價值觀。 係香港，你無聽過地鐵會閂一個站去做維修或者翻新工程，睇落好似好照顧乘客，但係有好多小毛病根本無法根治，結果咪日_日都有事故囉。 柏林Alexanderplatz 係個重要嘅轉車站，每條線都天南地北，你要行一大段路又上又落先去轉得到車，唔似喺金鐘站咁跑50米就可以轉到線。初嚟到時都相當唔慣，因為我仲係用緊香港人嘅value judgement 去judge 呢個行為。久而久之，你會發覺，慢活係呢個城市嘅DNA：提早出門口，等車，轉車，再等車，行十九幾級樓梯上返地面，呢啲都係柏林生活嘅一部份。 成日去旅行嘅你，一定有好多搭地鐵遇到嘅趣事。留言同大家分享啦！
