先說明一下為何會去四國,原因完全出於偶然。話說某天網上睇咗NYTimes選出52個2015年要去旅行嘅地方,排35位就有個地方叫Dogo Onsen,相片係一座好似宮崎駿千與千尋中大浴場嘅建築。原來就係四國松山市嘅道後溫泉本館,Times選佢嘅原因係道後溫泉本館今年120週年,係日本最古老嘅溫泉,就係咁偶然,我地就決定今年四月去四國。(NYTimes剛update咗, 將Dogo Onsen改為Shikoku,即係全個四國 http://www.nytimes.com/interactive/2015/01/11/travel/52-places-to-go-in-2015.html) 道後溫泉本館 by KennyKooPhotography 四月正是櫻花季節,本身就係一個期間限定嘅活動,而今次近畿加四國之旅嘅行程中,充滿咗好多期間限定嘅節目,有D係一早計畫好,有D係去到先知道,趁仲記憶猶新,用文字同相片為自己記錄下來,又可以同大家分享一下。 Day 1 2015/4/10 披星戴月趕夜櫻 #京都 #東寺lightup 飛機delay咗半個幾鐘,晚上6點過D先到達關西機場,7點攞車出發去京都,GPS計算車程2個小時多DD,好趕下,趕乜?其實京都到咗櫻花盛開嘅兩三個星期,好多著名賞櫻名所都會有夜間特別開放嘅安排(今年差不多所有寺廟嘅夜櫻特別開放都係4月12日last day,其實我地係去睇水尾),而出發前我mark咗3個目標,清水寺係must go,計畫咗第二晚去,而第一晚我就計畫咗去東寺或者平安神宮。因為大部分賞夜櫻嘅地方都收8:00至8:30,包括平安神宮,只有東寺收得最晏,收9:30,順理成章,要趕去東寺。 租車公司姐姐提我停車場出左去之後就轉右U turn行對面線去京都,行咗幾十米,GPS上都見到下個路口轉...咦?係唔係依家見到哩個?Okay...係miss咗,出車第一個路口就miss咗(之後發現今次哩個GPS係奉旨lag後,整個行程中俾佢玩死咗幾次)算!等佢re-route下個路口轉...下?2km後轉U turn?正當頭痕之際,前面出現一個收費站,咁即係要俾錢行2公里錯路之後再俾多次錢返黎原位?我同收費站大叔講我要去京都,佢話哩條路去唔到架!點算,睇黎今晚都係直接返酒店... 大叔有辦法!佢幫我打開中間路肩鐵欄,俾我U turn去對面線出口收費亭走,所以唔好話日本人古板,都不知幾識變通! 收費站大叔隨機應變, 俾我U turn折返去對面線, 出口大閘打開(似乎哩個收費站正常情況下係有出無入), 眼前嘅大直路就係通往第一個目的地 - 京都 2個小時嘅京阪神飛馳,竟然真係係9:00過少少到達東寺。一進入市內,就開始落起雨,落車時雨細而密,但無損我地賞櫻嘅興致。大名鼎鼎嘅不二櫻同五重塔就在眼前,只得半個鐘頭,走馬看花之餘,亦不停瘋狂影相。雖然4月10日已經過咗滿開而進入落花階段,但係夜晚嘅燈光下,樹葉都好似櫻花! 東寺名桜一本: 不二桜就在眼前 Photo by KennyKooPhotography Photo by KennyKooPhotography 其實都好大雨 係夜晚嘅燈光下,樹葉都好似櫻花 Photo by KennyKooPhotography 離開東寺時,我地架車係停車場入面最後一架,車場管理員都等梗我地收工呢!真係唔好意思。 雖然落機後出車遇上少少枝節,但我地總算meet到第一個行程目標,運氣不錯,正所謂好事成雙,去到酒店check in,竟然有得upgrade,淨係個浴室已經大過晒之後每晚酒店嘅房size! Hyatt Regency Kyoto by KennyKooPhotography