Min 13oC, Max 27oC, Mostly Sunny, Warm 是日溫差一再擴大, 單日14度, 明日溫差最大, 有15度... 原本今日應該係去Barossa Valley嘅酒莊一天團, 不過朋友出發前又臨時改變主意, 轉o黎袋鼠島... 出發前係網上搜尋咗數個Day Tour, 最後發現只有Sealink係最平, 其他Agency如Grayline都要貴AU$2, 估計Sealink係獨市的, 其他Agency只是代售... 其實都幾驚朋友臨飛又再改變主意, 皆因個Day Tour一定要預先付款, 如果我比晒錢之後佢先又話要改, 我真係血本無歸... Kangaroo Island Highlights Day Tour 團費貴得驚人!!! 大人AU$258 (約HK$2050) 小童AU$168 (約HK$1350), 1天本地團的費用, 夠參加坐飛機來回住3晚酒店的4天台灣團!!! 都只係講緊坐Cruise來回, 如果Cruise往飛機返, 大人更要AU$424 (約HK$3400) 小童AU$352 (約HK$2800), 係咪聽吓都想暈先... 不過咁, 袋鼠島有5個香港島咁大, 只有600個市民, 團費之所以貴, 係因為保育經費非常龐大... 尋晚10PM已經瞓, 不過瞓得唔係幾腍... 今朝06:10AM已經係酒店門外等候... 有個外籍Aunt話我地架巴士已經走咗!!! 唔係呀嘛?!! 我地已經早咗10分鐘出o黎o架啦喎!!! 驚到半死, 走去問酒店接待員, 佢好肯定咁話巴士06:20AM會來... 出去酒店門口等多一陣, 架巴士到啦, 車身冇Logo的... 去到中央巴士站, 見到另一架車身印有Kangaroo Island Logo的巴士, 相信頭先外籍Aunt所講走咗的巴士應該係呢一架... 06:45AM 從Adelaide Central Bus Station出發... 係時候唱首歌先... ♫去旅行... ♪搭車又搭船... ♪好暈呀... ♪快食保X丸... ♫ 09:00AM 到達Cape Jervis, 坐(飛機以外)唯一的公共交通工具Sealink雙體船去袋鼠島的Penneshaw... 船上超凍, 我地要著薄羽絨外套... 我地當咗小學秋季旅行咁, 帶埋尋晚係Woolworths買的麵包及香蕉上船當早餐食, 麵包好好味, 香蕉最後都冇食到... 由於袋鼠島位置偏遠, 與世隔離, 包括許多害蟲和疾病, 為了保護袋鼠島, 請注意, 遊客是不可以將以下物品帶到島上: - 1) 蜜蜂, 蜜蜂處理設備和蜂蜜製品 2) 薯仔 3) 狐狸, 兔子和雜草 10:00AM 搭車又搭船4個鐘後, 正式展開旅程?!! No!!! 只係另一程巴士的開始... 下船時真的有點混亂, 幸好有位黑人女士見到我的迷路樣, 與我搭訕, 指示巴士在旅客中心背部, Thank you... 執相時先發現Honey落船時影咗張相, 原來指示非常清晰, 建築物左邊好大個箭咀指去右邊架旅遊巴度, 唯一解釋係當時人太多... 登車時, 工作人員同我講留咗位比我地, 係左手邊, 我仲誤會好似旅行團咁全架車劃晒位, 原來唔係, 原來全架車只有我地一組人有Reserved Seats, 嘩!!! 好尊貴呀!!! 我估因為全車得1個小朋友, 所以留咗3排都幾前的位置比我地, 上落車超方便!!! 好貼心呀!!! On the way司機兼導遊Robert叫我地望吓樹林中的枯草叢中, 有一大堆袋鼠, 說時遲那時快, 急忙中舉起相機, 一切已太遲... 相機都未開著, 已離袋鼠而去... 之後整日都冇見過Lu... 打破咗之前網友所講嘅"袋鼠島冇袋鼠"嘅謠傳... 沿路不時見到路旁有完整的袋鼠骸骨, 相信死了很久... 剛才坐船船身兩邊浪吓浪吓, 加上係袋鼠島大部分都係泥路, 車身非常之CHOK, 我出發前食咗暈浪丸所以好好瞓, 可憐小朋友亳無準備加上年紀尚小, 開始覺得唔舒服, 扭計要落車, 好彩扭咗半個鐘, 都未嘔出o黎... 妹妹, 比10個叻你~ 11:30AM 又坐多個半鐘巴士, 到達Seal Bay Conservation Park... 由朝早06:20AM開始坐車坐船坐車, 咩都未做過就已經冇咗5粒鐘... 海豹灣自然保護公園遊客中心內擺放了各種在海豹灣附近找到的海洋生物的皮革或骨骼, 讓遊客觸摸, 感受一下海洋生物的各種形態, 包括海獅的主要食物墨魚, 被食剩吐出來的骨(白色一大片)... Beach Walk只可以係Seal Bay中心的導遊帶領之下進行... 另有不需導遊帶領的Broadwalk可供選擇... 一行數十人向著Seal Bay一步一步邁進... 第一樣見到的... 嘩!!! Kawaii)))))) 好可愛嘅海獅BB呀!!! OMG!!! 想殺死人咩?!! 生得咁鬼可愛!!! 仲得意過卡通公仔呀!!! 海獅BB見到咁多人, 表現得非常好奇, 望吓左又望吓右, 不停眨動佢嘅Blink Blink眼, 噢!!! 我比佢電到暈喇, 開始腳步浮浮... 仲學人咪起對眼放生電, 問你死未~ SeaLion Baby使出的「超強十萬伏特」電眼, Angela Baby都冇得揮... 繼續向前行, 海邊大風到呢... 雙手舉起相機, 對手都比風吹郁幾cm, 誇唔誇先... 一落到沙灘, 竟然有隻海獅企停停係樓梯底度等我, 當時係零距離, 我只要伸直隻手就可以觸摸到佢, 當然我知道唔可以咁做, 我舉起相機, 企係佢身旁的管理員好細聲咁講咗2次"Too Close", 我唯有無聲地退後幾步, 先舉起相機影低咁歷史性的一刻... 之後管理員解釋返, 海獅會突然高速衝落海, 我地企得太近的話, 會有危險, 係我地會有危險, 唔係海獅... 我地要同海獅保持一定的距離, 只可以企成一條直線近距離觀察... 隔成十幾個身位都算近距離?!! 哈哈, 算最近o架啦, 我已經非常非常滿足!!! 人生至此, 夫復何求?!! Ken & Merry與海獅ABC合照... 點解佢地唔係叫海豬呢?!! 你睇佢地幾懶... 哈哈, 其實呢, 佢地已經出海搵食3日3夜, 所以返上沙灘後要好好休息, 養足體力再出海繼續為口奔馳... 大家要靜靜地觀賞, 切勿打擾... 點擊圖片放大 +3 根據遊客中心的資訊, Seal Bay有1000多隻野生澳洲灰海獅聚居, 係最稀有的海獅之一, 全世界只剩14700隻, 大約有12500隻係南澳沿海生活, 其餘2200隻就係西澳海岸線棲息... 大多數海獅一生都會係Seal Bay生活, 繁殖, 直至死亡... 每年6月為交配期, 每產3隻幼海獅, 只有1隻可以存活, 壯健的海獅壽命可長達20年以上, 以捕食魷魚、章魚、鱗魚及甲殼類海洋生物為主... 在沙灘上逗留了15分鐘左右, 便要依依不捨地返回觀賞台, 除鞋一睇, 成對鞋都係沙!!!!!! 當場倒咗8-9成, 之後每日都倒, 返來香港後又再倒咗幾個月, 都不時仲有餘黨出沒, 幸好d沙真係超超超超超幼滑, 基本上感覺唔到佢嘅存在... 難怪隻隻海獅係沙灘上面都瞓到死獅咁啦... 返到香港執相, 先發現Honey影咗張"02照", 有位紅衣女子係矮樹叢中扮海獅, 驚嚇度80!!! 遊客中心外擺放了世界上最大嘅齒鯨--抺香鯨(Sperm whale)的上顎, So Big... 咁珍貴的物品, 就咁掉係地下, 無遮無掩, 日曬雨淋, 那怕你被侵蝕, 大把貨, 澳洲人, 受到上天的厚待, 的確豪得起... ♫ 太陽出來了 ♪ 雪人溶化了♫ 溫度開始上升, 薄羽絨外套可以收埋... 又再開始30分鐘巴士旅程, 下一站, Vivonne Bay Bistro!!!1:00PM 肚仔餓, 唔使怕... 自助餐, 任飲任食, 正!!! 不過話實, d路咁崎嶇不平, 架巴士全程顛簸行駛, 都驚食得太飽再拋幾拋真係會嘔出o黎, 所以只係食少少就算喇... 沙律全部勁勁勁新鮮, 西瓜甜甜甜到暈, 乾蕃茄Pasta都Very Nice.. 坐完長途機, 住完1晚酒店, 個人Dry到爆, 食到咁鮮甜多汁的蔬菜, 猶如久旱逢甘露, 即時成個人醒晒... 擦掉美味沙律, 咬一啖腸仔, 由天堂掉落地獄, 藥散味, Two Two Two... 烤雞肉質鞋鞋地, 但味道OK的, 應該係話泰式雞醬的酸甜味道OK... 蘋果批味道真係Very Nice, 出自一位最憎食Apple Pie的人的口, 應該非常有說服力, 佢唔同平時笠黐黐腍Pat Pat的傳統蘋果批, 酥香鬆軟, I'm loving it~ 由於要繼續趕路, Lunch只有30分鐘時間... 團費只包午餐, 晚餐就要自己係船上搞掂... 係Vivonne Bay食飽飽... 吖, 應該係食半飽至啱... 又再坐30分鐘旅遊巴去Hanson Bay Wildlife Sanctuary... 漢森灣野生動物保護區佔地3845公頃, 位於Kelly Hill Caves Conservation Park 與 Flinders Chase National Park之間, 前身為耕種及放牧的農地, 擁有質量好的桉樹林(Mallee Eucalyptus, 又名尤加利樹)和牧 場, 非常適合成為澳洲本土哺乳動物棲息的自然環境, 包括樹熊(Koalas)、袋鼠(Kangaroos)、尤金袋鼠(Tammar Wallabies)、負鼠(Possums)和針鼴(Echidnas), 以保護澳洲本土原生動物免於滅絕... 現在保護區的主要收入來自旅遊業, 除了日間的Koala Walk, 還有夜間的Nocturnal wildlife tours, 遊客更可租住海濱度假小屋... www.hansonbay.com.au 2:00PM 歡迎大家來到無遮無掩的漢森灣野生動物保護區!!! 巴士停泊係荒野上, 突然... 司機兼導遊Robert叫大家落車, 向前行入樹林, 無圍欄, 無入口, 無指示牌... 成團人懷著戰戰兢兢的心情, 向著Robert所指示的方向行, 行行下, 見到有團啡色刷頭係地下震動... 停一停, 影一影... 佢突然抬起頭... WoW... Echidna!!! 好可愛呀!!! 咔嚓))) 咔嚓))) 咔嚓))) 相機的快門聲此起彼落, 各團友忙中有序地逐一與針鼴來個合照, 呢一刻心情非常興奮, 因為冇諗過係Koala Walk會見到其他澳洲本土原生動物... 可惜時間緊迫, 懷著不捨的心情, 要同Echidnas講Bye Bye喇... 行咗入Eucalyptus樹林之後, 見前面d遊客個個都頭顎顎, 我地又顎埋一份... 見到喇!!! 見到喇!!! 樹熊(Koala) 呀!!! 同毛公仔一模一樣, 好得意呀!!! Honey支長鏡真係好利害, 隻樹熊係20呎高嘅樹上面, 背晒光咁都影得咁清, 仲要捕捉到個「展望將來」嘅表情, 勁!!! 我地曾經內心掙扎過, 支單反咁重, 換部換鏡DC都係一樣啫, 好彩最後都有帶單反去, 否則就影唔到咁珍貴嘅照片... 由於Koala所食用的尤加利樹葉營養價值低, 而且係有毒的, 所以佢地一日要瞓18-20小時, 要見到佢地咁精靈的一面係非常難... Koalas又稱無尾熊, 澳洲原住民嘅方言解作「唔飲水」咁解, 全世界只有澳洲東部嘅昆士蘭州、新南威爾斯同維多利亞省地區低海拔、唔密集嘅尤加利樹林中搵到, 因為外型似熊, 所以大家都叫佢做Koala Bear, 但佢絕對唔係1隻Bear... 再往前走, 居然見到有2隻尤金袋鼠(Tammar Wallabies)係樹叢下, 嘩嘩嘩!!! 好得意呀!!! 好似迷你版袋鼠呀!!! 所以又稱小袋鼠... Tammar Wallaby有幾迷你?!! 咪就係迷你到"好似"可以放係手掌上面咁迷你囉... Tammar Wallaby係Wallaby之中體型最少的, 體型與兔子相若, 骨骼與其他種類的Wallaby有差異, 只會係袋鼠島搵到... Wallabies好識撈, 靜心等各團友瘋狂拍下珍貴照片後, Wallabies先收工走人, 跳... 跳... 跳... 眨眼就唔見了... 一次過見晒3種澳洲本土原生動物, 樹熊(Koalas)、尤金袋鼠(Tammar Wallabies)、針鼴(Echidnas), 真人示範咩叫做開心到飛起!!! 人人都話, 去到澳洲, 經常都會見到袋鼠, 不過我地今次就冇咩機會近距離見到, 幾次都係旅遊巴上面先見到, 都有少少掃興, 真係好想親眼睇住佢地打Boxing... 傾開先發現, 原來好多人同我一樣, 對袋鼠嘅印象都係帶住紅色拳頭, 彈下彈下, 出完左鈎拳就出右鈎拳... wakakaka... 我以前仲以為自己呢個諗法係超低能勁搞笑嘅添... Honey嘅攝影技術真係利害喇, 咁都影到, 估計係係我瞓著咗時影的... (繼續吹噓, wakakaka) 離開了Hanson Bay Wildlife Sanctuary, 又再坐30分鐘旅遊巴去Flinders Chase National Park睇Remarkable Rocks... 弗林德斯蔡司國家公園 (Flinders Chase National Park) 創建於1919年, 是瀕危物種的避難所和家, 係公園內仲有發現好多地質奇觀, 包括由巨型花崗岩石堆積而成的Remarkable Rocks 岩石, 及由海水沖刷形成的神奇的Admirals Arch 拱門, 是遊客必到的 3:00PM 歡迎大家來到神奇巨石(Remarkable Rocks), 相中呢位無牌導遊會帶大家從多角度去探索大自然的鬼斧神工... 藍天+白雲+芝士狀Remarkable Rocks=開心到飛起again... 係海邊的岩石上亂跑亂跳係非常之危險的事情, 係螢光幕前面嘅家庭觀眾切勿模仿... 獨家消息 : 貞子已經從日本轉咗去澳洲發展, 拍緊新一輯電影, 唔再係4腳膽機電視度爬出o黎, 今次, 貞子要係舊石入面爆出o黎!!! 嗚... 我要做拯救Remarkable Rocks的英雄, 我頂!!!!!! (實情係... 請看下圖分解) Remarkable Rocks是大自然的雕塑, 在過去的200億年, 花崗岩圓頂受到不斷的侵蝕... 加熱和冷卻交替、潮濕與乾燥交替... 浪花進入裂縫和罅隙 - 晶鹽擴展, 破壞岩石...潮漲時海浪的沖刷... 因而形成怪異的形狀, 展現出各種不穩定的平衡美態, 讓世人驚嘆... 袋鼠島的天然金字塔... 係Remarkable Rocks發生了小插曲... 我地遲到了, Sorry呀!!! 因為落車時聽唔清楚Robert講幾點要上返車, 但影影吓相Feel到d團友唔見晒人, 我地即時開行Turbo跑返去旅遊巴度, 好似遲咗幾分鐘左右, 超唔好意思, 不過好彩我地唔係最遲, 原來有一群亞洲人仲遲, 佢地遲咗十幾分鐘... 3:30PM 歡迎大家來到旗艦拱門(Admirals Arch), 繼續探索大自然的鬼斧神工... 好美的燈塔哦!!! 多麼的詩情畫意哦!!! 身處汪洋中浪子, 你知道我在"照"你嗎?!! 我地好傻, 以為行程就係來睇呢片岩石上面的海狗 (Fur Seal)... 呢度住咗超過 7 千隻紐西蘭海狗... 見到Fur Seal就發狂咁影, Zoom呀!!! 再Zoom近d... 咔嚓))) 咔嚓))) 傻仔程度連Robert都睇唔過眼, 並無記怪我剛才遲了幾分鐘, 指住下面堆岩石, 叫我行落去, 最後不忙指一指佢隻手錶... 我心諗, 得果咁少時間, 仲要我行落去, 等陣又遲到點算, d海狗Zoom埋去影都一樣啫, 落到下面咪只係影得大隻d咋嘛... 但係Robert個樣真係好想我落去, 咁... 我唯有落啦... Oh!!!!!! 原來旗艦拱門(Admirals Arch)係下面!!! 旗艦拱門見證了驚人的自然力量, 從懸崖面的木板路拾級而下到達觀景台, 帶領遊客探索壯觀的天然岩石拱門, 經過幾千年的風化和海洋侵蝕的雕塑... 我超低能囉, 好彩Robert係咁叫我落o黎, 如果Miss咗呢個咁靚嘅景點, 肯定後悔死... 放眼將來, 只要穿越黑暗, 就能直達海天一色的蔚藍海岸, 波光粼粼, 美不勝收... 沉思中的海鳥... 難道你同我地一樣, 都唔想離開呢個世外桃源?!! 4:30PM 最後1站, Flinders Chase Visitor Centre... 大家可以盡情購買紀念品, 亦可補充一下身體所需要的能源, 當然不要忘記放低幾兩, 因為之後2個鐘頭都要旅遊巴上渡過... 遊客中心除了展示咗一d動物的皮毛, 仲將一d動物的骸骨堆放係沙堆中, 讓小朋友嘗試到發掘的樂趣... 好有意思的親子活動... 我的補給品... 夏威夷果仁芒果雪糕Bar, 超超超超超好味呀!!! 不過... 勁貴囉!!! 承為AU$4 (約HK$32)... 芒果雪糕果味濃郁, 香軟柔滑, 每一口都咬到充滿香味的脆脆原粒夏威夷果仁, 物有所值... 回程時, Echidna要過馬路, 旅遊巴停低等佢慢慢過, Echidna的一舉手一投足都太Cutie啦, Good Bye, Echidna!!! 全車人靜心等候, 直到Echidna消失於樹叢中, 旅遊巴再次向Penneshaw邁進... 前文提要, Kangaroo Island Highlights Day Tour 團費貴得驚人!!! 大人坐Cruise來回要AU$258 (約HK$2050) , 如果Cruise往飛機返, 大人要AU$424 (約HK$3400), 貴HK$1350, 我滿以為邊有人會咁奢侈為咗早果2-3個鐘返到Adelaide而付出HK$1350, 估唔到, 我地果團竟然有咁豪華的旅客, 失敬失敬... 6:30PM 到達Penneshaw的North Terrace, 等待上船... 小朋友將自己帶來的麵包與海鳥分享, 引來數十隻海鳥排排坐食粉果... 多得小朋友餵咗好耐, 我地可以極近距離捕捉海鳥多種神態... 點擊圖片放大 7:00PM 回程了... 好充實的一天, 好興奮呀!!! 估唔到人生係澳洲的第一天, 已經有咁多驚喜, 熱切期待餘下的旅程... 有咗今朝嘅經驗, 我地回程時不敢怠慢, 一早去排隊上船, 成功坐到船頭位置, 有Round Table, 有大梳化, 有360度旋轉座椅, 邊嘆汽水, 邊欣賞乘風破浪之景, 正到暈... 雞批 AU$4 (約HK$32) 同蔬菜芝士批 AU$4 (約HK$32) 的餡料是一樣的, 味道好一般, 但已經係最後1個, 遲少少去買真係咩都冇得食, 記得上船後第一時間去排隊, 唔係就要捱餓... Pizza AU$5 (約HK$40) 其貌不揚, 味道不錯... 10:30PM 返到酒店, 好攰, 直奔回房, 冇留係Lobby用Free WiFi... 16小時的旅程, 當中最少有12個小時係坐係交通工具上, 係辛苦, 但非常值得, 我永遠都唔會忘記今日嘅旅程!!! 袋鼠島!!! 我愛你!!! 澳洲旅遊局舉辦的「澳洲絕世筍工」, 2013年招聘六個不同職位, 成功者半年可賺AU$10萬 (約HK$80萬), 吸引全球逾三十萬人參加!!! 其中南澳的「野生動物看護員」, 職責正正是探索袋鼠島 (Kangaroo Island), 陪伴海豚和海獅海中暢游, 跟大白鯊打照面, 跟小袋鼠聊天, 跟樹熊抱抱, 及與海豹一齊曬太陽, 像夢幻中的工作, 即使冇人工我都肯做!!! ~~~ 相關網址 ~~~SeaLink - Kangaroo Island, South Australiawww.sealink.com.au 位於南澳的袋鼠島, 長155公里, 540公里的海岸線, 佔地約4500平方公里, 是澳洲的第三大島, 僅次於Tasmania and Melville Islands... 島上超過三分之一的面積是國家公園和保護區, 四處可見到天堂袋鼠, 小袋鼠, 負鼠, 蛙, 袋狸, 樹熊, 鴨嘴獸, 海獅和毛皮海豹, 在海灘、過馬路或住宿附近都會遇到野生動物, 被譽為“沒有圍欄的動物園”... 在2007年的國家地理雜誌, 被評為亞太地區最佳度假島嶼, 調查選取的全世界111個島嶼評選中, 袋鼠島名列第七位, 排名超過了歷來被認為是度假勝地的夏威夷群島, 綠島, 塔斯馬尼亞島, 馬爾代夫和費沙島... 由522名專家組成的委員會對參選島嶼的旅遊狀況和環境保護等方面進行了比較, 評委們對袋鼠島的評價是「保存著最原始質樸的環境, 未被文明腐蝕的旅遊勝地」, 當時的南澳州長Mike Rann說「就像著名的厄瓜多爾的加拉帕格斯群島, 袋鼠島一直被海外遊客認為是接近土著野生動物和深切體驗自然與生命魅力的旅遊勝地, 證明袋鼠島在發展可持續的生態旅遊方面取得了成功, 與世界級的美食和品酒相結合, 袋鼠島使遊客們能夠享受非凡的度假經歷」 [調查資料來源 http://www.aubest.com/big5/news/2007-11/07-11-2-2.html]建議最至少入住3晚, 住5-7晚就更好, 1天團實在是走走走馬看花!!! ~~~ 後記 ~~~ 回港後玩了South Australian Tourism Commission (Hong Kong) 南澳州旅遊局在Facebook專頁(www.facebook.com/AdelaideSouthAustralia.HK)的遊戲--“投選「最喜愛的南澳一刻」照片”, 我竟然有幸成為10位幸運兒之1, 贏得可愛限量海獅公仔!!!WoW, 超興奮!!! 時間剛好係呢篇Blog成為Yahoo!今日人氣話題的2天前, 簡直雙囍臨門, 今日急不及待去拎, 再影埋合成照同大家分享!!! 澳洲「野生探索」2013 の 總匯 http://www.kenmerry.com/2014/07/2013.html
