29-3-2018 30-3-2018 Day 1 上年復活節嘅時候 趁學校放假所以就去左轉旅行 每年總有一個旅行去玩水 上年其他朋友唔得閒 所以決定一個人去菲律賓 菲律賓係一個島國 所以好多地方都適合玩水 例如最出名嘅長灘島 亦都有近年愈來愈熱門嘅宿霧同埋巴拉望 而我呢次旅行就揀咗去5日宿霧 去宿霧一般都係搭宿霧太平洋航空 香港每日都有宿霧嘅直航機 本來我去程都係直航 而且係玩6日 但學校臨時有啲嘢要做所以就改咗機票 變咗要經馬尼拉轉機 而且玩少日 第一次去菲律賓 宿霧太平洋航空同一般嘅廉航唔同 飛馬尼拉航線唔會採用A320 同AirAsia X一樣都係333座位 所以坐落都幾舒服 加上菲律賓消費低 連飛機上買野食都好平 例如我買一罐可樂飲 竟然只係用咗8蚊港幣 對比起其他航空公司真係好平 香港飛馬尼拉只係兩個鐘左右 眨下眼就到咗馬尼拉 因為國際線轉內陸線 所以要進行多一次清關手續 加上我有接近4個鐘轉機 當然把握機會參觀下馬尼拉國際機場 來到馬尼拉機場第一件事就係去咗買電話卡先 第二件事就係拎啲美金去唱錢 因為去到宿霧已經好夜 所以就把握時間處理好先 搞掂完呢兩件事之後 就去咗快樂蜂食個下午茶 尼邊食一個意粉餐大約12蚊港幣 足足比香港平三倍!!! 食完嘢冇嘢做就索性入禁區等飛機 等到差唔多夜晚六點 終於開始登機 準備搭1.5個鐘去宿霧 其實我留意到 每日有好多班機由馬尼拉去宿霧 但係我改機票嘅時候佢只係畀我呢一班 白白浪費咗幾個鐘轉機 再見馬尼拉 由天光搭到天黑 夜晚8點到達宿霧機場 落咗機之後就去咗拎行李 拎完行李第一件事就係返酒店 同其他東南亞國家一樣 的士司機劏客都係好嚴重 所以同去馬來西亞、泰國一樣 可以用Grab taxi 安全而且價格有保證 第一晚住嘅酒店係東南亞嘅連鎖酒店 間房唔大但係好乾淨 最重要係每晚只係二百幾蚊港幣 一個人去住都唔覺得貴 (網上圖片) 酒店位於宿霧市中心 所以我一放低啲行李就去咗搵嘢食 但係我9點幾出街已經關曬門 行咗一圈都搵唔到有嘢食 迫於無奈淨食咗個麥當勞 同埋喺7仔補充返啲日用品 第二朝要好早搭船所以就早啲瞓啦 Day 2 房間景色 第二日起身食咗個杯麵就check out 因為我要六點半去到碼頭 搭七點正嘅船去薄荷島 由酒店去碼頭嘅交通都係用Grab 去到碼頭首先係去咗買飛先 然後再去做安檢 同搭飛機一樣 有大型行李一定要寄倉 因為我淨係咩個背囊 所以我就冇去寄倉啦 我架船係七點開 開船前十五分鐘就會有廣播叫人登船 點擊圖片放大 乘客一定要對號入座 咁啱我嗰日有一團韓國人唔跟座位坐 擾攘差唔多半個鐘頭先開船 由宿霧搭船去薄荷島船程大約兩個鐘 座位好逼唔算舒服 勝在中間部大電視會播外國電影 我去程就係播住哈利波特 睇住電影嘅話啲時間都過得幾快 兩個鐘後終於抵達薄荷島 薄荷島係冇任何公共交通 唯一嘅方法就係要包車 一般幾個人咪嘅話包架車唔貴 大約四百蚊港幣一日 但我自己一個女就唔化算 所以我冇預先喺網上包車 出到碼頭好多人圍住你問你使唔使坐車 我發現佢哋幾乎係同一間公司甚至乎係大家合謀定價 所以幾乎不存在殺價空間 就係我幾乎崩潰到要準備一個人包架四人車嘅時候 畀我發現咗呢個tuk tuk 包一日嘅價錢大約200蚊港幣 其實呢架嘢唔算貴 因為可以坐到兩個人 但我一個人嚟就冇計啦 薄荷島係一個好出名嘅旅遊島嶼 幾乎去宿霧旅行必定要嚟 佢嘅景點不外乎嗰幾個 所以司機都已經準備好帶你遊覽經典嘅路線 我玩完呢幾個景點之後 並唔會返宿霧 我會一直落埋去連住薄荷島嘅邦勞島 只要一早同司機講定 加少少錢就得啦 好耐未做過三輪車 其實我對薄荷島嘅景點興趣不大 不過叫做遊下車河都幾舒服 因為呢度嘅空氣好清新 沿途都係一啲好落後嘅鄉村 落後到連信號都收唔到 點擊圖片放大 +2 第一站去咗個昆蟲動物園 喺嗰度都係睇下啲昆蟲同埋兩棲類動物 入場費只係十幾蚊港幣 仲有得免費抱住條大蟒蛇影相 飲咗個椰青就走人 點擊圖片放大 遊車河嗰陣經過咗個竹林幾靚 所以我就捉住咗個司機影相xd 第二站去咗Bohol Tarsier 即係菲律賓眼鏡猴保護區 眼鏡猴係薄荷島嘅特別動物 亦都係全世界最細隻嘅馬騮 因為佢哋天生玻璃心好容易受嚇 所以數目越來越少 真係好細隻 要放大起格先見到 參觀完眼鏡猴保護區之後 就準備去埋最後一個景點 亦都係我對薄荷島最有興趣嘅景點 — 朱古力山 點擊圖片放大 因為佢嘅形狀起伏好似一粒朱古力 所以就得到呢個名稱 亦都成為咗薄荷島嘅地標 打完卡之後就朝著邦勞島嘅方向前進 其實薄荷島仲有好多嘢玩 本來我係諗住去Adventure Park玩bungy jump 但係撞正咗休息日 另一個活動就係喺河船到食住下午茶 睇原住民表演 但係因為菲律賓係天主教國家 適逢復活節 所以好多活動都取消咗 Dormitels.ph Bohol 下午三點幾已經嚟到邦勞島 我住嘅地方係Alona Beach附近 因為呢邊算係邦勞島嘅市中心 有酒吧、旅行社、住宿等 喺成個邦勞島最熱鬧嘅地方 我住嘅呢間hostel有雙人房連獨立廁所 每晚大約200蚊 只不過係位置偏僻少少 但係性價比好高 Day1搭飛機同Day2薄荷島都唔係呢個旅程嘅重點 因為我講過來菲律賓嘅目的係玩水 所以Day3同Day4先係重頭戲 來到邦勞島首先要去報local tour 極度推薦大家來呢間旅行社 因為由外國人管理 價錢公道亦都有安全保證 後來聽到有台灣人分享報咗一間有中文服務嘅agent 玩完之後掉低佢哋喺碼頭足足兩個鐘先有車接佢哋返去 比人係菲律賓掉係街頭 嚇到嚇死 我總共報咗兩個tour 一個係去浮潛跳島 另一個係同鯨鯊游水 再加多一個接送服務 回程由邦勞島送返我去薄荷島碼頭 總共淨係洗咗大約400港幣 如果你唔係一個人嚟玩嘅話 相信個價錢會更加平 報完local tour之後 就去咗附近嘅海灘度hea下 原本島嘅沙灘都咁清 之後嗰兩日出海真係不得了 點擊圖片放大 +2 喺個沙灘到聽下歌曬下太陽 就已經入黑 海島嘅國家不外乎都係食海鮮 而菲律賓嘅海鮮係更加平 見到有間餐廳比較多遊客 就點咗少少燒海鮮加個飯食 食完就返去休息啦 第二日好早集合!! Day 3待續
