18-5-2018 Day 3 本身諗住早啲起身去睇下高知城 但係瞓晏咗 唯有淨係食個早餐就走 高知電車 高知嘅早餐多數都係一啲咖啡店食多士 大部分最受歡迎的早餐都係洋食 所以我就搵咗一間Tripadvisor評分好高嘅餐廳 點擊圖片放大 其實都係一間咖啡室 夜晚有得食鐵板燒 因為係平日嘅關係所以呢間舖冇乜人 早餐其實都淨係得三四款 我嘅餐有牛油多士、烚蛋、洋蔥湯、咖啡同沙律 總括嚟講都幾好食咁豐富 食完個靚早餐之後就出發啦 今日要去嘅地方係四萬十川 係四個好出名嘅景點 由於佢同高松係一頭一尾 所以琴日玩完祖谷之後 我選擇咗喺中間嘅高知留一晚 準備搭個半鐘火車落去中村站 其實後半段火車唔係屬於JR 係屬於土佐黑潮鐵道 但後來為咗方便遊客 JR同土鐵合作 JR Pass都可以搭埋後半段嘅鐵路 出發之前搵咗好耐有冇一個站叫做四萬十川 後來先發現要係中村站落車 要遊覽四萬十川 一定要租單車 亦都有觀光鐵路 不過係季節性營運 一出車站寄存完個行李就可以轉左行幾步去觀光社 得觀光案內所可以租單車 單車都分咗做幾種類型 因為踩太遠 所以建議租電力輔助單車 除咗租單車之外 職員仲會比埋地圖你 同你講邊啲路唔踩得 一定要聽 因為可能會被警察檢控 仲會俾埋一部導航器你 有好多種語言 比你一路踩一路聽啲景點介紹 但係我覺得唔舒服 所以我就冇帶到喇 離開咗市區之後就會穿過一座鐵橋 個景真係好靚好舒服 過完橋之後就沿住條路一直踩 佐田沉下橋 由案內所到到第一條橋大約用咗45分鐘 呢條叫做佐田沈下橋 大部分人都係踩到嚟呢度影完相就算 因為再踩落去之後嗰兩條橋大約要再用多一至兩個鐘 本身四國已經好少遊客 加上我淡季平日 成個景點得嗰幾個人 真係好清幽好舒服 因為冇乜時間食午餐 所以我就揀咗嚟到呢度野餐算 踩過嚟嗰陣經過咗一間好大嘅超市 入面有齊飯糰、便當...所有日本嘅嘢食 非常之推薦呢度野餐!!! 逗留咗大半個鐘之後 就準備踩去第二條橋 本身諗住自己踩電力輔助單車應該好容易 後尾炒咗勁耐都仲未去到 而且之後嘅路都係一啲大車行嘅山路 加上中途喺路有幾條蛇 所以我都係驚到番轉頭算 回程嘅時候行對岸嘅路 又再遇返呢條鐵橋 加埋有幾個日本人喺度行草地 成個動漫feel出曬嚟 好有多啦a夢嘅感覺xd 高松吉野家 今日嘅行程淨係去四萬十川 因為唔夠時間所以我就直接搭4個鐘火車返高松 返到高松已經夜晚八點 食完個吉野家就返咗去之前間旅館瞓覺 btw日本吉野家真係好正 拎支火槍係客人面前燒肥牛 DAY 4待續
