27-10-2018 台東我o黎啦!!~ 又過咗一個大專最忙嘅時候 — 10月midterm 成個人溫書溫到懵懵地 所以考完嘅第二朝就即刻離開香港.....um...走堂去旅行 香港好似冇飛機直去台東，最方便嘅方法就係飛高雄再轉台鐵去台東。 前排參加咗個比賽贏咗1000蚊旅遊coupon 所以補咗4嚿水就出咗張華航最平嘅高雄機票 10點飛機 朝早早咗去機場，同check in counter嘅姐姐傾計，佢幫我轉咗個闊嘅位 台鐵高雄去台東 香港去台灣真係眨下眼就到，前一晚因為冇乜點瞓過覺，所以喺飛機上面都冇影過相 我好欣賞華航有提供熱食...但就真係世界級難食...好彩係機場食o左個翠華 落機過完關之後就搭捷運去咗高雄車站買咗火車飛先... 下一架去台東o既車次係2點半..我要係車站附近hea多2個鐘 題外話...今年高雄車站搬咗新站，比起舊站靚好多!!(網上圖片) 10月尾嘅高雄依然熱到黐咗線 叫我喺條街度拖住個喼hea 2個鐘真係impossible 身為肥仔o既我就緊係周圍搵嘢食...順便嘆冷氣haha 求其入咗間餐廳食咗碗滷肉飯係8蚊港幣o既飯!! 我都唔知呢間餐廳叫乜名 反正幾好食...老闆娘又好傾 食完就搖3個鐘火車去台東啦! 過咗屏東之後...就一直貼住個海岸線行...好靚 屏東之前...就係山景 5點半到達台東...天都黑了 尼日搭嘅車次係自強號，一般去台東其實淨係搭2個鐘火車 但係呢個班次停好多站，所以要坐成3個鐘呀!! 同埋我唔知自強號係冇枱...帶咗部ipad都冇心情做功課 我係火車到又食o左個便當...即係6個鐘食o左4餐 台東車站 大約4個月前去咗花蓮...嗰次係花蓮得啲好矮嘅樓 冇諗過台東荒蕪到一出車站樓都無幾棟.... 往hostel的途中 之前係Booking.XXX到搵hostel，見到有間叫做K2 hostel評分同評價好高 而且同火車站剩係相距10 mins路程，所以就book o左尼間 行行下天都黑埋 1間房8張床連廁 check-in個陣老闆娘不在，咁啱有2個台仔嚟check in，佢就幫手打電話比老闆娘 因為老闆娘去o左食飯，所以畀咗門口密碼我哋，叫我地放低行李去食飯先 條街黑到有D恐怖 頹食 由火車站行到hostel途中淨係見到一間7仔同全家 加上搭咗成日車都已經攰到就想死 所以都冇特別去搵嘢食，求其喺7仔度食過冷麵算 後尾從hostel老闆娘口中得知 原來台東車站並唔係台東市區 所以附近係冇嘢食架!!~ 我張床 食完o野 check完in 同老闆娘吹o左陣水 沖埋涼都已經差唔多10點 搭咗成日車加埋前一晚冇瞓真係攰到唔想行啦 一上床...頭都未乾就瞓死咗 DAY 1嘅行程就係搭飛機搭火車 期待day2的行程吧!!~
