布拉格既第二日，去左Cafe Imperial食早餐，嗌左一個英式一個美式早餐，個早餐熱辣辣好正，平時自己喺屋企整會煎完隻蛋再煎煙肉呀腸仔呀，條腸又煎得耐，煎完隻蛋都涷哂咯，佢樣樣都熱辣辣真係令我好有good morning既感覺。 飲飽食醉就行去布拉格廣場，首先經過舊城區既入口，火藥塔，黑炆炆都幾有火藥味，側邊d老爺車好靚呀，想坐就要俾錢啦。 去到布拉格廣場，嘩，天氣勁好，有d馬車喺到等緊客，好搞笑，d馬既身型都幾唔統一，腳粗同腳幼擺埋一齊，中碼同大碼又擺埋一齊，哈哈 黎之前知道天文台鐘維修，仲要3年先修得完，但都去睇下啦，可能網上個消息係假既呢，唉真係諗多左，佢真係維修緊，d棚架遮住哂，隱約見到少少天文台鐘個輪廓。 之後就去左琴日經過過既哈維爾巿集，巿集不算大，兩行攤檔主要賣水果，朱古力，溫泉餅（兩塊薄威化夾住忌廉既餅），溫泉杯，磁石，指甲挫，畫，鬼叫公仔（有條繩吊住會發出奸笑聲果d萬聖節嚇人公仔）etc……同事話呢隻指甲挫夠硬身好好用，我就買左4把同1舊磁石。 Lunch去左Grand Café Orient，係一間風格有d老派既餐廳，門口有個蛋糕櫃，有十幾款，款款都好大件好飽肚咁樣xdd因為琴晚食左cake今日唔想食，所以嗌左兩個crepe，鹹甜都好好味，喺捷克食過咁多餐都好好食唔伏，唔知係我地揀啱餐廳，定係真係捷克d野食好啱我地口味。 點擊圖片放大 如果上網打捷克必買，你會見到10個台灣blog有10個都會推介Botanicus同Manufuktura呢兩個護膚品牌子，佢地仲買到代購咁款，睇到你都覺得非買不可。我地首先去左Manufaktura，入到去有個sales sell緊兩個韓國女仔，我地就周圍睇下，見到中間有個位擺哂佢top 10既產品係到俾你試，咪埋去試下，試完一輪serum, face cream, hand cream之後，心諗點解d人會覺得呢d野好用？講香味，佢地一d都唔香仲有d臭，好似d好假既香味加埋d噏味，搽上面我怕會有攻心既感覺。講滋潤程度，我覺得好唔潤，我果時8月尾都覺得佢乾，如果冬天用就更加唔夠滋潤啦。 見到Manufaktura係咁既情況，我地都唔想去Botanicus啦，於是喺Google map搵下附近有冇d local d既pharmacy，就俾我搵到Mucha Museum附近有間叫Ziaja既鋪頭，評分有成4.7分，一於試試佢。入到去間鋪頭唔係好大，有個sales sell緊個本地人，另外有兩個韓國女仔揀緊野，見到佢地買到個籃就黎滿，其中有隻羊奶cream佢地每人買左4盒，一試，好似澳洲果隻emu cream，淡淡地既香味，個質地幾潤幾舒服，咁啱又有box set（day, night, hand cream），就買左盒試下，另外仲買左止汗劑，髮膜，hand cream同anti-wrinkle cream俾媽媽，枝hand cream 100ml都係45czk咋（16hkd），又平又好用，同埋我覺得佢d產品都幾天然，好似枝止汗劑咁，平時香港見到果d好多時都係漿狀，會阻塞毛孔用到敏感，但係佢呢隻係水狀，搽落皮膚傷害性會冇咁大。買野期間又有一pair韓國情侶同兩個韓國女仔入黎買野，我諗呢個牌子喺韓國旅遊圈都出名，因為我見佢地俾錢都有show電話，然後就有discount同有野送，不過我地都有枝卸妝係送架。 大滿足，跟住就去食晚飯啦，咁早食晚飯係因為聽朝一早要去ck呀，食完早d番去執野。呢餐終於食捷克菜啦，Restaurace U Provaznice，又係喺honest guide個YouTube channel到睇到架，嗌左兩杯啤酒，兩個傳統捷克菜（侍應介紹的，一個豬一個牛），兩個主菜都係配bread dumplings，食落好似銀絲卷，honest guide話佢見過好多人成舊拎起用手食，佢話咁係錯架，係用刀叉切細佢再點好多汁黎食，我地成碟食哂好飽（可能點得太多汁），但都想食多個甜品，apple strudel，係蜂蜜蛋糕以外另一樣好出名既捷克甜品，食完真係超飽，飽到我地捧住肚皮蟻 '欄' 咁 '欄' 番酒店。 點擊圖片放大 +2 待續……（聽日ck啦）
