琴晚落機，call左uber去酒店，check in完喺酒店附近搵間餐廳食少少野，然後去超市買左d野飲水果同牙膏，就番左酒店休息啦。 呢個gnocchi好好食 今日既第一站係去布拉格城堡，出左地鐵後跟住人群行冇幾耐會見到一條斜路，沿住斜路行上去就係布拉格城堡，條斜路唔係好長，不過可能因為沿途又斜路又石級，行到我地好攰，行到一半見到有個位影相好靚，睇真d，原來係間cafe黎架，我地未食早餐，又行到餓餓地，就坐低食d野啦。 望住呢個view食野好正 食完個早餐都11點幾啦，快快趣上去城堡啦。上到去，第一眼見到聖維特主座教堂，佢唔係一座好華麗既教堂，係一座好平實好工整好莊嚴既教堂，有好多細緻位，會令你望完呢到望果到，睇極都睇唔哂。 排左一陣隊，入到去教堂，個天花好高，三四層樓咁高，d窗全部都係彩色玻璃，好靚。 之後喺城堡範圍行左一陣就落番去食lunch啦，揀左間餐廳叫Luka Lu，我喺Google map見到佢評分咁高就決定試下，經過室內座位黎到餐廳最入位置既露天座位，好有樹屋feel好靚（成個trip去過最靚最舒服既餐廳），叫左個煎三文魚同chicken salad，兩樣野都好好味。 點擊圖片放大 食完個lunch，心情大好，就想食d甜品，就去左Luka Lu附近一間賣gelato既鋪頭，嗌左開心果味同榛子味。 食住雪糕，一路向住下一個景點進發，the Lennon Wall，牆上面畫左好多關於John Lennon同埋Beatles既畫同graffiti，五顏六色，好ig-able。不過d人多到，想影相都難，如果朝早黎應該會少d人既。 離開Lennon Wall，我地就行去the Charles Bridge，之前網上睇過，話最多小偷喺呢條橋到搵食，經過琴晚喺超市俾人界袋之後（話說我地喺鮮奶櫃揀緊yogurt，好專心研究緊d味道果陣，忽然覺得有d野，一望，有個豬肉佬咁既大叔無聲無息咁企喺隔離，佢企得好近我一擰個頭過去佢企正喺我面前，我第一個反應就係睇下有冇被佢偷到野，因為我咁啱反轉左個袋孭，暗格向外，可能佢以為果個位有錢瓜，佢冇偷到野不過個袋就有條劃痕，我覺得佢頭先係界緊我個袋既），我地都係穩陣d，將個袋孭番去前面，同伴話佢喺網上睇過避開小偷既方法，唔好永遠靠左/右行同用同一個步速，所以我地一手㩒住個袋，一手鏈實部電話，時快時慢S型咁行完條橋，行完我地都覺得好好笑，根本都冇人咁行，d人有講有笑輕輕鬆鬆咁，我地咁反而更礙眼xdd 過左橋之後黎到舊城區，好熱鬧，好多souvenir shop，好多賣捲捲麵包既鋪頭（黎之前睇左一個叫honest guide既YouTube channel，佢有介紹捷克食野唱錢搭車既資訊，有一樣野佢（話佢地捷克人）勁憎，就係捲捲麵包，佢話好難食根本就唔係捷克野，但係周街都賣緊，佢好多條片都有提到，次次講親都勁嬲）我地本來諗住聽日先行舊城區，但係都黎到咯，咪行下睇下d野大概幾多錢，聽日先買。今日行左咁多路，喺呢到行個零鐘後都攰啦，見到間cake shop，入去買左兩件cake番酒店食，食完就瞓啦。 傳統蜂蜜蛋糕好好味 朱古力拿破崙都好好味
