歐洲之旅總共15日 Day 1：芬蘭赫爾辛基 Day 2-4：捷克布拉格及Cesky Krumlov Day 5-6：奥地利Hallstatt及薩爾斯堡 Day 7-13：意大利威尼斯，佛羅倫斯，比薩，五漁村，羅馬 Day 14-15：芬蘭赫爾辛基 籌備左大半年，終於到左出發果日。 香港直飛helsinki坐芬蘭航空AY100，搭左10個零鐘，黎到helsinki機場，落機後海關前要過一過安檢，安檢人員問我地會喺芬蘭stay幾耐，我地話我地晏d會飛去prague，佢再問我地係咪轉機，我地話唔係搭finnair，係晏就搭另一間airline去prague，佢即刻stop左條安檢帶，叫我地show去prague張ticket俾佢睇，當時我未換simcard，又連唔到機場wifi，搞左好耐都開唔到email show張ticket俾佢睇，後面又一大班人等緊，真係緊張到出哂汗。靈機一觸醒起出發前我有cap低個email，即刻摷番個screen cap俾佢睇，指埋俾佢睇from helsinki to prague（其實我驚佢發現我俾screen cap佢睇唔係email，一陣又要我摷過個email，我真係要換simcard先整到），佢睇左一眼之後就笑哂口咁話welcome to finland，我都未回過神佢轉身就check下一個啦。咁嚇一嚇法，我當堂醒哂，準備好去玩啦。 過完海關，攞完行李，就行去domestic果邊搭火車出巿區，搭車前去左搵locker放行李（6歐可以擺一日），之後就去搭車啦（車費5歐），一落車，第一眼見到既就係中央火車站。 嘩，係歐洲呀（第一次去歐洲，係有d興奮），太早既關係，條街靜鷹鷹。 行左大約10分鐘黎到market square，有d檔仔準備緊開檔，有野食，有紀念品檔，好似幾正，等佢開左一陣黎行。 於是我地決定去個景點先，Uspenskin Katedraali，呢間東正教教堂要行少少樓梯先上到黎，無遮無擋既情況下望到哂成座教堂係真係幾靚（之後會見到好多唔係維修，就係俾幾十棵樹遮住，或者係大座到入唔哂鏡） 教堂內部 參觀完覺得有d肚餓，就落番去頭先個巿集再行遠少少既Old Market Hall，入到去係一個好乾淨既街市，有菜檔，有雜貨鋪，有賣三文魚的，有coffee shop……我地去左Soppakeittio，台灣blogger力推賣湯既一間餐廳，叫左個海鮮湯同蔬菜忌廉湯，海鮮湯味道一般，冇“沒吃到會後悔“ “不誇張超好喝“ “沒有喝過等於沒來過赫爾辛基“既感覺，係勝在夠平夠大碗又有好多海鮮，每啖湯都食到海鮮呢個係真。 食飽後喺頭先個巿集行左一陣就搭番火車入機場，飛去布拉格正式展開我地既旅程啦。 世界各地既機場都係，入左禁區d野就賣得貴，但係竟然俾我搵到1歐500ml既Goodwill Water，好搞笑，唔知同聖誕老人有咩關係。
