落到黎山腳，土耳其朋友就帶我地去最著名既旅遊景點，藍色清真寺。土耳其既清真寺有好多，全部都係藍色，但係岀名果個係Faith，有六條柱，先係The Blue Mosque。 我地搭電車去Eminönü，會見到個碼頭，有好多一檔檔係到賣fish burger，佢地叫做Balik Ekmek，Balik即係fish，Ekmek即係bread。 入面既魚其實係鯖魚，個包係法包，夾啲生菜同洋蔥，平時我係唔怕腥架，但係呢個可以因為冇乜點醃，好原汁原味呀，我揤左1/4個檸檬落去呀。 另外呢度仲有賣一種飲品，紅色呢種，可以加生果或者唔加生果，味道好特別，鹹鹹地酸酸地，飲落去覺得好解渴，但係之後果隻鹹既回甘，又令我覺得口渴番啦，可能就係想你快啲飲完再買第二杯，哈哈。 食完野，行過對面見到個清真寺，不過唔係藍色清真寺，雖然都係藍色。再向前行就係Grand Bazaar，傳聞係入面好易迷路係真架，喂，條條路一樣樣既？呢個市集乜都有得賣，近入口位就係賣手信啦，例如藍眼睛，瓷器，茶杯茶葉，無花果，土耳其軟糖....記得講價，我未試過冇得平。另外，入面有間賣土耳其咖啡粉好岀名，叫Kurukahveci Mehmet Efendi，最少50g都有得賣，每次經過都見到有人排緊隊架。 穿過Grand Bazaar，就見到藍色清真寺Sultanahmet Camii啦，真係好宏偉，即刻成個氣氛神聖左。入去之前男士要洗手洗面洗腳，寓意以一個乾淨既身軀入去呢個咁莊嚴既清真寺。土耳其朋友第一時間行埋去洗手洗面，咁我地咪一齊洗囉，洗洗下，唔對路，點解啲呀叔係咁望住我地，土耳其朋友走埋黎: What are you doing? These are for the guys, not for females. 又唔早講== 女士入去前搵條頭巾包住啲頭髮得架啦，門口有一箱頭巾任揀，用完係岀口擺番入箱回收，怕污糟可以係外面買條，我照用，反正淨係掂到啲頭髮。 係藍色清真寺岀番去，對面就係Aya Sofya，聖蘇菲亞大教堂。好多人排隊同埋要俾入場費，所以我地冇入到去啦，有機會下次入去睇下。
