我今次選擇既航空公司係卡塔爾航空 Qatar Airway,，由香港飛多哈(9小時55分鐘)再轉機去倫敦(7小時25分鐘),，前前後後坐咗17小時20分鐘機＋2小時15分鐘轉機等候時間。 以下係我既搭後感： HKG -> DOH - 準時6:30pm起飛，係等上機時候俾我見到一大班北韓人同我坐同一班機，唔知佢地去多哈做咩呢。 - 由香港飛多哈要9小時55分鐘，機種係A330-300，呢個機種坐位比較窄，架飛機又唔太定，唔係太訓到覺。 - In-flight entertainment幾好，有好多種唔同語言電影／音樂俾你揀，以我所見係有超過30套英語電影，有寶來塢，有港產片(逃學威龍第一集)，有韓文電影，有台灣既綜藝節目(康熙來了)等等。 - 飛機餐質素係我意料之外，仲以為每一份餐都離唔開中東香料，原來都幾國際化(我意思係道道菜都無中東香料啫)。 - 第一餐係我揀咗vegetarian meal，menu上面就係寫蘑菇醬油汁炒面條和蔬菜配香炸油豆腐小白菜和胡蘿卜，個醬汁唔太咸，面條有d似上海粗炒。 - 第二餐我唔記得影個menu，大約係黃豆醬炸魚柳配白飯。個醬係我第一次食，感覺唔差，唔似印度醬汁，幾岩香港人口味。 DOH - 去到哈馬德國際機場(新多哈機場)己經係香港時間凌晨3點，多哈時間為夜晚11點，一落機發現停機坪全部都係卡塔爾航空飛機，見唔到其它航空公司飛機。因為轉機關係我地要跟住指示去做一次過X-ray機檢查，剩係排隊都排咗半個鐘。 - 機場入面超級多人，人山人海，人多到以為自已星期日去左d shopping mall。行去閘口等上機既時候發現有唔少亞州人面孔做ground staff。有好多商舖同埋food court，不過價錢就略費。洗手間好乾淨，廁格好寬敞無異味。整體黎講成個多哈機場設備唔錯，好新淨同埋大。 DOH -> LTH - 由多哈飛倫敦坐7小時25分鐘，機種係A380-800，呢個機種座位比A330闊落得多，成程機好定，我終於有覺好訓 ;-) - In-flight entertainment不變，大家都係用同一個system，餐飲方面就有個中東特式既包（唔記得影）同堆早餐，早餐係豬肉腸炒蛋配脆皮薯仔粒，幾西式呀。 LTH - 班機係係Heathrow Airport terminal 4降落，由落機到辦入境手續拎行李大約45分鐘到，不過不失啦。
