公司的清潔姐姐60多歲已達退休年紀，囝大囡大，返了大半世工辛勞的她，可以選擇休息享福，但她仍繼續返part time尋找工作寄託，順便繼續認識花花世界裡的人和事！嗯，所以她的思想才可以跟貼世代不落伍！說話如智慧大師！做事也靈活，又會出走香港搭飛機去旅行，我覺得還會出國的老人家是超「時尚」的。 我很愛跟她說心事，什麼都可以說：單身中的煩惱、適應不到殘酷現實的執著、追求理想中會遇到的迷茫等等……雖然我跟她有很大的年齡差距，但因為她一直都有上班接觸社會，非常了解現世代年輕一輩的尷尬處境。她經歷過不少艱澀的時刻，性格依然很開通，又明白世事，講的話簡單，卻有智慧！煩惱青年如我，每次聽完她講話整個人會豁然開朗一點。至少讓我明白到現實的殘酷是客觀的事實，人人在成長中都要面對，也能克服、能跨過。客觀的環境不因個人而變，但心境能克服現實…… －無子彈點發炮 我(一舊一舊)：「以前太浪漫，以為人工唔需要多，足夠能生活就得，但依家發現如果你唔夠多錢，無足夠可以令你心安唔需要憂柴憂米的一批儲蓄……點講好呢……」 清潔姐姐(一針見血)：「足夠既彈藥！」 我(一舊一舊)：「係呀！足夠既彈藥！無錯！形容得好好！如果無足夠既彈藥安定左個人！又點追求精神層次的理想……唉……點講好呢…」 清潔姐姐(淡定)：「無子彈又點發炮，無子彈發唔到炮。」 我(忽然好high)：「係呀係呀！妳形容得太好啦實在！要儲彈藥先可發炮！」 －正職同副業 我：「我想以寫作維生，但依家只係興趣階段，未達到可以換取收入的境界，仲要每日繼續返工……我唔知我每日返工為咩……」 清潔姐姐：「理想條路好難行！唔容易，要睇家境許唔許可，如果唔需要擔心生計，無金錢負擔，就可以全情投入只做你想做既興趣，再等成果。唔係就要分薄時間去搵正職返工，賺錢生活。你可以兩邊一齊行，正職同副業咁樣，好多人都係咁。」 我：「T-T我想快D成功」 清潔姐姐（堅定）：「正職同副業！分兩邊！係社會追求理想好艱難，但唔緊要既，暫時過住呢種生活先，好正常。」 －無得揀？ 我（又係到沮喪）：「我最近又係到諗，做人好似咩都無得揀，樣呀，際遇呀，家庭呀，都無得揀。我可以主動搵機會，但最後成唔成功我都係無得決定，要等命運安排，好似好被動咁。」 清潔姐姐：「係無得揀，但可以克服。係社會生存，人就係要克服好多野，個人就會成長。係成長。」 －生存的意義 我（又忽然感性，係到問題多多）：「你覺得人生存係為左d咩？每日辛苦返工去賺錢食飯、去交租為左有床訓，我地每日咁克苦去掙扎求存去維持生命，但維持到生命既同時，又會係到問番呢個問題：究竟人生存係為左d咩……」 清潔姐姐：「享受生活！咁你可以去旅行，去玩，去認識世界，享受架嘛。」 我（鑽牛角尖）：「我知妳講緊咩，但……即係做人生存為咩呀？」 清潔姐姐：「享受！享受囉。係個過程入面你可以享受人生。咁你點都係要過日子架啦，唔好抓住D錢係袋到唔放，要識享受。你放下假去玩啦。」
