04 May 2013 (Sat) 今日係星期六,特別多人食早餐,我哋要坐係靠邊嘅位置。今日大部份食物同昨天一樣,有炒蛋、腸仔、煙肉、可可米、生果、乳酪、橙汁,不過多咗粥,中式炒麵同炒飯,味道都唔錯,嘻嘻! 食飽之後回酒店房準備一下就出發,今日要去 Chatuchak 呀,要避開最熱嘅時候,只好早一點出發。我哋由 BTS National Stadium 去 BTS Mo Chit (THB 35),落車之後我哋反方向行去公園入口,因為我哋唔想同人迫。公園環境都唔錯,我哋好快就行到去 Chattuchak market 嘅範圍。 可能時間尚早,人流未算太多,不過已經感到有點熱!第一次嚟都係想見識吓,環境比想像中好,乾淨和整齊。可能真係越行越熱,其實都沒有太多心機行,哈哈。 行到咁上下,要去過冷河,想去 JJ Mall,不過發現 JJ Outlet,因為遠望見到係啲傢俱店,於是我哋就無繼續行天橋過去。 行下行下,終於找到 JJ Mall,入面環境好寬敞,雖然店舖不太多,不過因為地下嗰層都有啲名牌檔做緊減價,都好多人睇緊,特別是 Wacoal,哈哈。 過完冷河之後,我哋差唔多時間去搵食喇!我哋先行去 MRT Kampheang Phet 站,內裡有個地下商場,邊行邊睇,又有冷氣,嘻嘻。 行完之後就到咗我哋今日午餐嘅地方,Or Tor Kor MOF Market!呢度係街市,好大又有好多野食,不過只有風扇,有點熱。參觀完之後,我哋就去搵位坐,然後自己再睇下想食咩。 可能真係太熱,攪到無咩胃口,最後叫咗碗魚蛋粉 (THB 50),魚蛋又真係幾彈牙,抵食又好食!另外係飲品店叫咗杯青檸冰,味道甜中帶甘,消暑一流。不過真係好熱,食完又要去番地下商場過冷河。 之後我哋就行番去 Chattuchak market,一邊行去 BTS 站,同時一邊睇下,不過真係越晏越多人,我哋行咗好耐先出到係 BTS。BTS 站隔離勁多車,好壯觀呀!之後我哋又由 BTS Mo Chit 去 BTS National Stadium (THB 35) 回酒店休息,哈哈。 午睡完之後,我哋又出發喇!下一個目標係 China Town,我哋由 BTS National Stadium 去 BTS Sala Daeng (THB 20),之後行去 MRT Silom 坐去 MRT Hua Lam Phong (THB 18)。 到咗 Hua Lam Phong,見到好有特式嘅火車站,之後我哋就開始行去 China Town。 原本大概 10 分鐘嘅路程,我哋行錯咗方向,唔知點解睇住自製地圖都行錯,哈哈。加上路上遇到另一對外國人都係行去 China Town,佢哋引領下,我哋行了一個大圈,終於去到 China Town。 China Town 真係幾多人,我哋行咗一陣就去 T & K Sea Food 食晚餐。餐廳以綠色為主,職員都係綠色衫,已經有好多人,我哋要上二樓食。 我飲椰青 (THB 40),大大個,又清甜,好抵呀!係 China Town 要食魚翅,我哋叫咗個細嘅紅燉魚翅 (THB 300),芽菜,蔥另上,魚翅比較爽口,而且份量都唔少。 叫咗香美蟹蓋盅 (每隻 THB 50),香脆炸蟹肉配一條條 glass noodle,很香口。而通菜都係 THB 50,有少少辣,非常惹味! 跟住就到咗檯檯必食嘅生燒活蝦,叫咗一盤細嘅,有 5 隻 (THB 150)。大大隻燒蝦,好吸引!蝦肉彈牙爽口,真係唔錯。另外都叫咗一盤細嘅生燒蛤 (THB 50),好鮮味,正呀! 食飽之後,見到成條街都好多人。 然後去林真香買手信,真係好多人係度,我自己就買得唔多,反而朋友買了好多,林真香嘅免費速遞服務,可以幫你 Pack 箱送去酒店。 之後我哋就行出去 MRT 站搭車,行咗唔夠 10 分鐘,就已經見到 MRT 站入口,真係勁近,真係唔知點解今早會行錯,哈哈。 我哋又係由 MRT Hua Lam Phong 去 MRT Silom (THB 18),之後由 BTS Sala Daeng 去 BTS Siam (BTS 20),因為我哋打算再去 Big C,嘻嘻! 今日我又買咗兩對鞋,哈哈,一對就係對上次買同款但係唔同顏色嘅膠鞋,成個場剩番一對,仲要全我嘅碼。講番上次因為對紫色鞋無咗價錢牌,所以店員用咗我朋友買嗰對去收我 THB 129,今次對鞋都係無咗價錢牌,點知店員今次就叫咪,搵另一個店員查價,原來呢對要 THB 229!哈哈,上次只係收我 THB 129,今次係 THB 229,兩對平均 THB 179。而另一對就係布鞋 (THB 299),又係剩番一對啱我 Size 嘅紅色,哈哈。 去完 Big C 我哋都係行番去酒店,真係好方便,當然係可以搭一個 BTS 站。返到酒店就食係 Big C 買嘅芒果 (THB 49),真係又香又甜! 今晚要執拾行李了,因為明晚要回香港了...... 今日支出 (THB 計算) BTS:35 + 35 + 20 + 20 午餐:90 MRT:18 + 18 晚餐:720 (2人) 林真香:470 Big C 鞋:528 芒果:49 (2人) 支出合共: THB:1618.5 港元:約 $434