03 May 2013 (Fri) 一日之計在於晨,又係時候去食早餐喇!今日不用留肚,我可以開懷大吃喇,嘻嘻嘻嘻! 雖然今日都係食蛋,不過係滑蛋,正呀!仍然有食煙肉腸仔,今日多咗黑耳炒米粉,試咗少少,又幾好食,諗住添食時轉了另一盤炒米粉,剛剛炒好,配菜新鮮,米粉夠乾身,仲好食過之前嗰款。見今日有麵豉湯,又試呀啦,正常麵豉湯味。另外今日轉了飲橙汁,感覺正常過菠蘿汁。 今日食咗好健康嘅粟米片,可可米同普通味嘅米 (平時好少食,都唔知點叫,嘻嘻)。另外試咗平時唔會食嘅牛角酥同蛋糕仔。之後就要食番啲生果,今日都係食木瓜,因為又甜又多汁,必食!除咗西瓜同菠蘿之外,今日仲有哈蜜瓜同火龍果,啱晒我呀! 食飽飽之後,回酒店房 Hea 一陣,就出發去 Terminal 21 喇!今日由 BTS National Stadium 去 BTS Asok (THB 25),BTS 一出就見到,真係勁方便。 Terminal 21 以機場做主題,唔同層就有唔同地區主題。係參觀之前,記得去接待處登記攞個 Wifi Login 同 Password,嘻嘻,嗰 Account 仲要係第一次登入後有效期一年,不過 Wifi 會每 2 小時自己 Refresh 一次,不過都夠你用嘅。 我哋先去最高嗰層 Level 6 Hollywood,上電梯時已經見到大大個金像獎雕塑,而且仲見到 Woody 同巴斯光年! Level 4 & 5 係 San Francisco 以食肆為主,Level 3 Istanbul 係有好多特式飾物精品 Level 2 London 就最搶眼,因為用咗 London 巴士同地下鐵做主角 Level 1 Tokyo 有日本紙燈籠同相樸手等日式擺設 Level M 係 Paris,就仿係香榭麗舍大道,有好多時裝店。而 Level G 就係 Rome,有大型羅馬式雕塑同天花壁畫,而最底就係 Level LG Caribbean,以超市小食店為主。 每一層都各具特式,又有好多時裝店精品店,男女都啱行,我最後買咗兩件有 Line 公仔嘅 T-Shirt,兩件都只係 THB 300。 行到咁上下,又係搵食時間,雖然 Food Court 都有好多嘢食,不過最後我哋行咗去一間餐廳 'Have a seat',我又叫咗 Coconut Juice (THB 79),仲係覺得係泰國飲 Conconut 好味啲,佢將啲冰分開放,感覺係唔會因為啲冰多,令杯飲品少咗,哈哈!Coconut Juice 清甜解渴,正! 叫咗個生蝦 (竟然影漏咗價錢,真係失策),Best Seller 之一嘅烤雞 (THB 220),Chicken Soup in Lime Juice Coconut Milk (THB 150)。椰汁雞湯,椰奶味香濃,唔會太酸同太辣,我好鍾意飲!烤雞真係幾大碟,應該都有半隻,外面烤到金黃色,雞肉都幾嫩滑,幾好味! 今餐食咗 THB 746。 食飽飽又繼續行,唔知係咪行得太多,真係有啲累,於是想搵啲地方坐吓。不過商場嘅公家櫈都俾人坐晒晒,於是我哋又去咗去食 Tea 喇,哈哈哈哈!今次係 Desserie Sweet Cafe,我叫咗件芝士餅 (THB 110),味道唔錯,最重要係可以坐下。 之後我哋就離開商場打算去搵的士,因為要去 Chocolate Ville 影吓相同食晚餐。好多的士都有客,有啲就話 Outbound 唔去。於是我哋路過一個好似的士站,於是就攞晒地圖同地址俾司機睇,佢哋幾個研究完一輪之後,就開價 THB 500,不過我哋照上啦! 路程其實都幾遠,都有少少塞車,又有行高速,見到司機要問路費,加上又熱又累,我哋兩個都係度釣緊魚,應該大概 45 分鐘至一小時就到咗門口。 Chocolate Ville 其實係一間餐廳,不過入面有好靚嘅景,風車,河流,燈塔,歐式建築等,完完全全唔覺自己係泰國。我哋第一時間去搵餐廳接待留位,同職員講幾多點食,之後就開始影相。因為想影日景,黃昏景同夜景,所以我哋都影咗好多。 點擊圖片放大 +3 呢度大部分都係戶外嘅地方,真係幾熱,不過見到泰國大學生著晒畢業袍影相,都唔多流汗先犀利。 洗手間有好得意嘅公仔,同埋係嗰度唯一有冷氣我哋又可以入嘅地方,哈哈! 最正係行上個塔頂望番落去,塔頂好涼爽,不過可以企嘅位太少,影多兩影就要落番地下,不過留意喇,係要行樓梯上去嘅,對於行慣樓梯嘅我當然無問題啦! 黃昏景真係幾靚架! 差唔多時間就去攞位,全場座位都有八九成滿,我哋被安排係河邊,環境都幾好,不過真係幾熱,好彩有啲風。 今晚個肚有啲唔舒服,所以叫嘅嘢唔多,不過例牌都叫咗杯椰子汁 (THB 80),嘩!個杯好高身,不過又好 '瘦' 身,杯底嘅椰子好難整出嚟食,同埋無加冰,唔係幾夠凍。另外就叫咗個唔知咩嘢,不過原來今日無,於是叫咗冬陰功湯,有好多蝦,不過都幾辣。 食完之後又影吓相,就行去門口搵的士搭,俾咗酒店地址司機,佢開價 THB 400,我哋梗係即上,因為平過我哋嚟。回程開頭都唔算太塞,去到酒店附近就塞啲,不過的士直到酒店門口嘅感覺好好,哈哈。 回到酒店休息一下,就要影得今日嘅戰利品,哈哈,Line 公仔同 Line 公仔衫合照! 今日支出 (THB 計算) BTS:25 Terminal 21 衫:300 (2 件) 午餐:746 (2人) Tea:110 Taxi:500 (2人) 晚餐:270 Taxi:400 (2人) 支出合共: THB:1528 港元:約 $410