02 May 2013 (Thu) 今日九點幾食早餐,早餐選擇唔算太多,不過都夠食,最重要有生果同乳酪,哈哈。因為今日係朋友嘅生日,我一早預訂咗 Mandarin Oriental Bangkok 嘅法國餐廳 Le Normandie 食午餐,所以今日早餐只係輕食。 熟食我只攞咗腸仔,蛋和煙肉,牛油麵包就係我嘅指定項目,生果有西瓜,木瓜,菠蘿同一種好爽口嘅生果。乳酪係 meiji 嘅雜果,有木瓜,菠蘿同椰果,幾好食架,我之後日日都要食,嘻嘻!而飲品就揀咗菠蘿汁,有啲似罐頭菠蘿水,下次要試飲橙汁先得。 食完之後返酒店房 Hea 一陣,準備好我哋今日嘅 Dress Code (Ladies: Elegant attire with appropriate footwear, Gentlemen: Smart shirt, long trousers, closed shoes, no sports shoes or trainers),我哋就出發去 Mandarin Oriental Bangkok。我嘅係 BTS National Stadium坐去 BTS Saphan Taskin (THB 30),之後就行落去個碼頭搭船免費接駁船,只要你係話去 Mandarin Oriental Bangkok,碼頭上嘅工作人員就會指示你係邊個位等。 等咗一陣 Mandarin Oriental Bangkok 接駁船就埋岸,隻船好古典呀!今日天氣好好呀!係船上又有風,未到酒店已經好開心。 好快我哋就落船,見時間尚早,我哋周圍影吓相,河景 Mandarin Oriental Bangkok 感覺果然唔同,室內擺設有好多花花,好靚呀! 不過原來餐廳不是係大堂附近,我們 '參觀' 完洗手間後,就行去另一邊,先會見到好出名嘅 High Tea 聖地,即係 Authors' Lounge,真係好英式嘅佈置。之前都有諗過食 High Tea,不過覺得食法國菜開心啲,仲有蛋糕送,嘻嘻。 差不多十二點我哋就搭升降機上去,可能太早,餐廳職員示意我哋坐一陣先。由於餐廳兩邊都係落地玻璃,大陽直接曬入室內,餐廳未剛開門,冷氣似乎未夠涼。餐廳以黃色為主,有別於平時見嘅法國餐廳。 餐廳職員準備好了,安排我們入座,由於預先訂位留了向河景嘅窗口位,景色係一流。餐廳職員更細心地俾一張小椅子我哋放手袋架。 之前都有上網搵資料,知道叫水好像要錢,於是我哋索性點一杯果汁,消消暑先。 跟住就係 Set Lunch 內揀選自己嘅 Starter 同 Main Course,今個月嘅 Menu: 係 Starter 嚟之前,餐廳職員先奉上麵包籃,細心地問你要邊一款,第一次我揀咗軟身嘅法包,第二次就揀咗好 Raw 嘅穀麥包,配上 Mandarin 嘅牛油,正呀!之後佢俾咗一杯小食我哋,黃色和白色嘅 mouse,不過我食唔出係咩,哈哈。 跟住我嘅 Starter 就出場喇!嘩嘩嘩!Fresh crabmeat salad, fennel, Granny Smith apple,新鮮蟹肉沙律配茴香同青蘋果,賣相別緻,以蟹蓋盛住蟹肉青瓜絲等材料嘅沙律,清新美味,再沾上青蘋果蓉,真係好好味。 而 Main Course 就係 Braised beef cheeks, carrots and coriander, garlic puree,好熟口面咁,原來就係炆牛面頰,面頰肉係勁腍,配上特製醬汁,好味道! 唔好睇主菜份量好似少咗啲,因為跟住先係今日嘅主角出場,就係甜品餐車!由於我哋係第一檯食完,可以係蛋糕未被 '毀容' 時睇到佢哋嘅靚靚樣! 真係花多眼亂,餐廳職員都會簡單介紹一下係咩蛋糕,最後我就揀咗好似 Summer Berries Mouse Cake 同 Mango Tie 喇! 當你揀完之後,就係 Show Time 時間,餐廳職員會即席切你揀咗嗰兩款蛋糕,之後就會係碟上面用朱古力同果醬畫花花喇!真係好有心思嘅服務,我哋都睇得好開心! 另外我點了熱朱古力做餐飲,哈哈,真係好滿足,而餐廳亦奉上法式杏仁餅俾我哋。同一時間,餐廳經理就走過來,話知道今日我哋係嚟慶祝生日,於是就奉上一個已點蠟燭嘅生日蛋糕出嚟,之後又幫我哋影相,佢仲等埋我哋影相,幫我哋攞走支蠟燭。佢哋似乎知道我哋都食唔晒,於是主張幫我哋包起。咁我哋就打包了生日蛋糕同法式杏仁餅,因為實在太豐富,已經食唔落。 因為攞住個蛋糕,於是我哋就回酒店,同去程一樣嘅路線,先坐酒店接駁船,再由 BTS Saphan Taskin 坐回 BTS National Stadium (THB 30)。可能出面天氣太熱,我們又決定來過午睡,哈哈,因為我哋下一站係夜市,唔駛咁早出去。 差唔多時間又起身,我哋又係 係 BTS National Stadium坐去 BTS Saphan Taskin (THB 30),之後就行咗去等免費接駁船去 Asiatique the riverfront。由於時間尚早,有好多鋪頭都未開,於是我哋又去咗冷氣充足嘅 Naraya 行吓,最後買咗幾個袋仔 (THB 275)。 之後又去咗一間賣微型黏土嘅店舖,買了幾個泰國菜微型黏土,用咗 Coupon 之後係 (THB 450),跟住就周圍搵吓母親大人想要嘅衫,終於搵到一套似樣啲 (THB 280),又係紫色,嘻嘻!最後經過一間賣袋嘅店舖,又買咗一個波點大袋 (THB 250)。轉眼又到咗黃昏時分,又要周圍影吓先。 影完之後又繼續行,順便睇吓去邊間餐廳食晚餐。因為有些店無冷氣,於是我哋放棄咗。最後去咗 YUM SAAP,餐廳好多人等位,我簡單叫了一杯椰肉攪拌冰 (THB 45),同埋 Pad Thai Seafood (THB 85)。椰肉攪拌冰清甜解渴,消暑一流。Pad Thai 嘅海鮮就 '求奇' 咗啲,係獅子狗同墨魚,蝦都好似唔多隻,不過味道都可以。 食完就係附近影多幾張夜景,行多一陣,最近買咗啲椰子糖同榴槤糖 (THB 40)。之後就去碼頭排隊坐接駁船,夜晚真係幾多人,都排咗一陣。 之後又係由 BTS Saphan Taskin 坐回 BTS National Stadium (THB 30),返酒店休息了。之後仲攞咗法式杏仁餅出嚟食,因為太攰,無幫佢哋再影相,四款味道 (如果我無記錯嘅話,應該係玫瑰,咖啡,紅莓,開心果) 都好好味,連平時唔鍾意食法式杏仁餅嘅我都愛上。 今日支出 (THB 計算) BTS:120 (4 程) 午餐:3460 (2人) Naraya:275 (5 個) 微型黏土:450 衫褲:280 袋:250 晚餐:250 (2人) 糖:40 支出合共: THB:3270 港元:約 $877