01 May 2013 (Wed) 今次係坐泰航 07:45 機,因為唔想三四點起身,於是 30 Apr 出席完試食活動之後,回家梳洗同執多次行李,大約一點幾就出發。由於我搭唔到平時搭開嘅 A 系列機場巴士,於是要先坐巴士去上環再轉 E 系列巴士,E 車要行紅隧,遊走香港九龍新界,去到機場要一個鐘。下車後與朋友匯合,我們去 Terminal 2 尋找可以小睡嘅地方,不過靚位已經有人瞓緊,最後只係坐住嚟休息,可能已經過咗眼瞓時間,都無咩點瞓。差唔多 05:45,櫃檯開始有人排隊,於是我哋就去 Check In 了,嘩!竟然無晒窗口位,不過沒有所謂,我們應該都係上機瞓覺多嘅。 今次一拖四出發,好震撼,哈哈!之前提過嘅 Delsey Helium 旅行箱同我至愛嘅 Chocolate Rain 旅行帶好襯,嘻嘻!再加埋陪我旅遊多次嘅 PC Dog 旅行鎖,已經準備上輸送帶了,一陣見! 轉眼又到咗登機時間,今次係我第二次坐泰航,第一次係 N 年前大學 Year 1 去歐遊時坐過,所以都無咩印象。只係覺得有我鍾意嘅紫色,好靚呀!最有趣嘅係之前我只係將我自己台灣之旅 (即係講緊玩遊戲獲得單人來回台灣機票) 嘅準備篇放上 Facebook,所以好多人都以為我去台灣,嘻嘻!所以我覺得用 '奸笑' 公仔登機特別貼切,哈哈哈哈。 係時候上機喇!泰航給我嘅印象真係唔錯,一系列嘅紫色真係討我歡心!最開心係竟然有 USB 可以叉電,真係太好了!仲有就係我可以睇之前好想睇嘅寒戰,不過由於太遲先開始睇,未睇完就要落機了,唯有回程時再看啦! 跟住就要講吓我嘅飛機餐喇,唔記得由幾時開始,我鍾意點海鮮餐食。一來特別餐係早啲派嘅,唔驚係 Chicken or Beef 嘅時候,話派晒其中一款。 嘩!呢個海鮮餐真係幾好食,海鮮串燒係三文魚,大蝦同帶子,真係太開心!蕃茄汁濃度適中,伴食嘅係磨菇和蕃茄,都不過不失。另外仲有牛油小圓包,我喜愛嘅桃味乳酪,而生果係新鮮西瓜,木瓜同菠蘿!雖然一向對鮮餐都唔敢有期望,不過呢個海鮮餐又真係令幾滿意! 差不多兩小時嘅旅程,又到咗落機嘅時間,機師技術不錯,平穩順暢著地,完成沒有震動感!泰國新機場環境都唔錯,我哋就等待領取行李,等了幾個圈,終於見到自己個行李,新喼第一次出埠,安然到達! 攞完行李,我哋就去坐機鐵,因為唔趕時間,選擇了 City Line,即係中途有停站嗰條線。不過價錢就好抵 THB 45,售票機操作容易,個 '票' 係圓形嘅。沿途都有風景睇,不過唔知係咪出面太熱,冷氣唔夠大,我哋兩個都好有睡意。 我哋由機場站搭去 Phaya Thai,再行少少路去 BTS Phaya Thai,坐車去 BTS National Stadium (中途要係 BTS Siam 轉車),要 THB 20。不過 BTS 好多下樓梯嘅地方都係無電梯,好彩我哋都係小型行李,所以都無咩難度,相比歐遊時上上落落,真係小兒科,哈哈。 BTS 張票後面有公仔同路線,都幾方便。 之後就到咗 BTS National Stadium,酒店就係隔離,落樓梯就見到酒店。ibis Bangkok Siam 係 2012 年新裝嘅酒店,一座大廈兩酒店,另外高層數嘅係 Mercure Hotel。 由於時間尚早,未有房間,我哋就寄存行李先,之後就去附近行吓同搵食。 行咗一陣,已經去咗 Naraya 買咗個袋 (THB 395),哈哈。之後就去咗 MBK 地下餐廳食午餐喇!先叫一杯木瓜汁 (THB 70),真係好新鮮,好味道。之後我們揀咗一個 Set (180 THB),嗰名係 SOMTAM-KAIYANG-KAO-NIEOW (Spicy Green Papaya Salad Plane Type. Roasted chicken and sticky rice),青木瓜沙律都幾辣,而且伴碟嘅材料都好生,唔係咁啱食,不過燒雞又唔錯,個皮好脆,而個 Sticky rice 就有啲硬。另外再叫咗一個 SUKI NAM RUE HENG (Seafood soup SUKI) THB 110,越食越惹味。呢餐合共 THB 473。 食完之後我哋就回酒店正式 Check In,佢會即時俾個 Wifi Login Name 同Password 紙仔你,每人一張,佢會跟據你入住嘅天數而設定 Login 嘅有效期,點知我一試就話過期,佢就換另一張紙仔俾我。 由於我哋昨晚係無咩點瞓過,於是我哋決定係酒店午睡,哈哈,真係第一次咁 Hea!張床真係幾舒服,哈哈!起身之後我哋就出發去 SuperRich 兌錢,我哋係 BTS National Statium 一直行天橋,行到去 Big C 嗰邊,再行去 SuperRich,時間真係有啲趕,哈哈,去到剛剛六點前,排隊嘅人唔算太多。我哋出發前嘅匯率低咗,今日兌到 3.73。 兌完錢就去下一站,去食水門雞喇!人哋話要食就揀桃紅色衫嗰間,因為正宗啲,咁我哋都係去桃紅色衫嗰間。我哋叫咗兩支汽水,一個油飯,半隻水門雞,合共 THB 260。水門雞肉有胸位和脾位,脾位放在係底,所以睇得唔太清楚,最底就有青瓜。水門雞最好味係連個醬一齊食,食脾位就當然嫩滑,食雞胸肉又唔會好似平時食嗰啲咁 '鞋',咁我第一次嚟當然要去試吓。 食完之後,我哋就去行街街,遇到黃昏景色,不過仍然有 36 度,真係好熱呀,快啲入商場先得!去咗 Central World,Boots,Naraya。我哋係 Boots 申請埋張會員卡,本身有折,如果再買 Boots 牌子可以再有折,最後我都買咗啲 Hand Cream,洗面,磨沙等 (THB 784.5)。 之後係 Swensen's 食飯後甜品,我叫咗 Golden Sundae (THB 85),忌廉又幾軟滑,不過原來黃色嘅生果係大樹菠蘿,我仲以為係芒果添,哈哈! 食完之後,又繼續行!第一次嚟 Big C,真係大開眼界,哈哈,真係咩都有!仲俾我哋見到 Wacoal 減價,25 % off 只限 30 Apr 至 01 May,即係最後今天!於是我哋就揀一個 Size 即買即試,之後就再掃多幾個。 因為我對零食無興趣,都無買食嘅!只係買咗盒大果汁放係酒店雪,方便我哋有凍果汁飲。 不過睇中咗對紫色膠鞋,最攪笑係我試鞋嘅時候,價錢牌都無架,收銀姐姐見我哋兩個都買一對紫色,就用咗我嗰朋友對鞋嘅價錢牌去 'Do',最後我對鞋係 THB 129!勁抵! 行完之後,我哋就係 Big C 又行番酒店,之後路經樓下七仔,於是買咗支果汁 (THB 18) 番到酒店休息一會就洗白白,酒店提供毛巾,Shower & Bath Gel,浴帽,風筒,不過就沒有牙刷牙膏。房內除咗有兩腳插,亦都有兩個三腳插,真係好方便。 今日支出 (THB 計算) 機鐵:45 BTS:20 午餐:473 (2人) Naraya:395 晚餐:260 (2人) Boots:784.5 (4支潤手,1支洗面,1支洗面磨沙,1支身體磨沙,1 支止汗) 甜品:85 Big C Wacoal:1740 (4 個) Big C 鞋:129 Big C 飲品:54.5 (2人) 7-11 飲品:18 支出合共: THB:3610.25 港元:約 $968