新麻浦BBQ 마포갈매기開了個多月 前幾天終於有機會去試啦~~~ 我6點幾去到不用等位 但有限時食個半鐘 而朋友又未放工 所以去附近行住街先 7點幾再返去時已經有好多人等啦 最後等了個幾鐘 朋友剛剛到達一會就有位啦! 等位時睇定menu 有6個set 因為我們四個對set的什錦拼盤同壽司都無咩興趣 想食多D肉 又想食水冷麵同甜品 計返散叫好似平D 散叫的肉比套餐的肉多 ~150-180g 點擊圖片放大 +2 每隻豬只有~200g護心肉 店入面好似全部都是卡位 新麻浦的前菜好豐富呀!!! 全部都好味!!! 而且可以免費refill~ 太好啦!!! 香港好多韓國餐廳都無得refill架~ 不過前菜無左之前睇食評講的麵醬青瓜>-< 呢個黑芝麻醬沙律幾特別 最初叫了三款肉 護心肉 (辣) 180g $148 秘製牛肋排 180g $145 霜降牛肉 150g $198 烤肉好唔好食除左睇肉靚唔靚 仲要睇識唔識燒 所以唔好燒太耐 靚肉燒得太老都唔好食啦~~~ 我覺得護心肉同秘製牛肋排都好味 肉味濃又唔硬 霜降牛肉都ok 不過貴$50又份量少 所以不會再散叫啦~~~ 食烤肉會送一次爐邊烤蛋 蛋入面有泡菜 烤蛋好好味呀!!!! 千萬唔好烤太耐呀!!! 好似下圖咁側邊熟了 中間仲有蛋汁再烤多一陣就OK!!! 太好食啦~~~ 加$28 refill了一次:P 好想快D再食呀~~~~ 仲叫左個水冷麵 $75 我之前去旅行在韓國food court食左個好好味的水冷麵 在香港食左幾次都覺得唔好食 今次呢個好唔錯呀!!! 湯好好飲!!! 而且有梨架!!! 好似韓國食果次咁!!!! 梨好清甜~~~ 食到咁上下叫多一碟原味護心肉 180g $138 好味~ 第一次叫的是辣味 但完全唔覺得辣喎哈哈 朋友話辣味的好食D 最後!!!!!!!!!! 是重點!!!!!!!!!!!! 超好味韓國豆粉冰沫 我之前一直想試呢隻甜品 6月去釜山時無去雪冰食 終於在新麻浦食到啦!!!! 可以揀有紅豆或無紅豆 一樣價錢 $88 個豆粉冰沫好大 一座小山咁 有黃豆粉 麻糬 杏仁片 入面係超軟錦錦的牛奶冰 撈埋一齊好好味 唔會死甜 平時食有粉的甜品會覺得成口同喉嚨都係粉唔舒服 但呢個甜品唔會有呢種感覺 牛奶冰同豆粉融埋一齊太好味啦!!! 而且冰入面都有豆粉、麻糬同杏仁片 一層一層咁 超足料!!! 食到最後一口都好滿足:D 超推介!!!! 一定要試呀!!!! 埋單每人$225 都唔算貴呀~ 我們係食到飽到上心口架~~~
