大家可能都會諗吓，我去西班牙葡萄牙，究竟講咩語言呢？ 西班牙人講英文好差，只係識得基本嘅英文，勉強溝通到，就算指住份Menu嚟點菜，都試過俾錯菜式。但葡萄牙相對來講，英文就真係好流利，溝通上可以話冇乜問題，不過，如果兩個國家嘅人之中，我會覺得西班牙好少少，因為葡萄牙人嘅工作態度真係超差，好似做又36 ，唔做又36 ，作為一個遊客，體驗真係好差，我呢一世都唔會再去㗎啦……西班牙都麻麻哋，不過對比葡萄牙來講，都稍為好少少 今次主題係西班牙，先唔講食嘢啦，因為食物質素普遍嚟講都比起葡萄牙好，不過話想Walk in就食到一間好食嘅餐廳，其實比較難…當然我成個去西班牙休息嘅旅程之中，都食到一兩餐係好好食嘅！ 不過今次想講嘅係去咗西班牙巴塞隆拿睇波！咁就梗係睇勁旅巴塞啦，呢場係睇開幕戰，巴塞隆拿主場，華歷簡奴作客，呢場就犀利啦，全場有超過八萬幾人嚟睇波，散場時間八萬幾人一齊走喎！其實巴塞隆拿真係一個幾雜嘅地方，所以去睇波，等入場嘅時候我都有少少驚，例如會有好多似童黨嘅人喺度周圍問人買唔買黃牛飛、水、紀念品等等。之前朋友已經提醒我要小心扒手，最終我梗係好小心，冇財物損失啦。 至於波迷嘅質素當然都好差㗎，佢哋會踩住你張凳大叫，可能太投入啦，不過我見到張凳都唔係太乾淨，所以冇坐到好入，影響唔算好大嘅…至於氣氛梗係相當一流啦，最正係都冇人入到波，全場係失望之作零比零，但係嗰啲鐵粉都可以叫到失聲，由開場唱歌唱到完場。睇返張波飛千幾蚊，入去感受下氣氛，都值回票價嘅！
