一個不建議大家去遊覽的地方，尤其暑假peak season…之前公司派去英國做嘢都好一段日子，而家終於都可以鬆一鬆，講返出差嘅日子，中間都有一段日子有假期，大家都知道神根國之間嘅機票係幾咁平，幾百蚊一張就有，所以我就決定飛咗去西班牙同埋葡萄牙，遊覽下呢兩個好多古城睇嘅國家，不過體驗就認真好麻麻啦……葡萄牙人嘅禮貌真係欠奉……另外，懶散亦係其中一個最突出嘅特徵，話說有一日去咗古鎮Sinatra，嗰度真係超級多遊客，排隊已浪費超過一半時間，而且巴士路線亂龍，冇寫清楚喺邊度搭車，指示牌非常唔清晰，巴士司機又遲大到開車，幾經辛苦先至去到皇宮參觀… 大家可以睇吓，舊時葡萄牙皇宮就係咁嘅樣㗎啦！一磚一瓦都真係好靚嘅，好戲在後頭，我梗係要參觀souvenirshop 㗎喇，難得去到咁遠仲唔買下啲手信咩… 最後我就決定買咗支皇宮原子筆，真係靚既…不過，首先價錢就冇寫清楚，係四歐羅，然後旁邊嗰支幾乎同款既鉛筆就寫住3.5歐羅，令人覺得價錢係一樣，算啦，嗰度好少錢，比完錢之後，係真係比完錢之後，我話想試吓支筆寫唔寫到，因為係買緊原子筆，我唔想買完返嚟寫唔到嘢……點知店員話：我哋呢度賣嘅筆全部都好好寫㗎喎！（當然係加埋佢個西西臉….）我心諗，其實我錢都已經俾埋，你咁都要比說話我聽？ 離開呢個鬼地方之後，去到葡國梗係要食葡撻，點知都唔係想像中咁好，口味同香港人食緊KFC嘅葡撻真係爭好遠，真心覺得KFC葡撻真係幾好食㗎，但係葡國嘅葡撻就好甜，我去咗呢間超出名嘅舖頭食葡撻，喺貝倫區附近，算係最好食㗎啦，甜度喺葡國來講算係好淡，不過就啱香港人口味，睇下，超多人排隊，梗係冇位坐啦，去咗隔離Starbucks買杯嘢飲，chill下.. 坐飛機走嗰日仲正，我叫酒店職員幫手叫Taxi，點知等左15分鐘，心急如焚之際，佢原來叫咗㗎 Uber，價錢貴一倍……（無言），大家如果去葡國嘅話，真係自己截的士好過啦，自己截的士一啲都唔難㗎，而且嗰啲的士司機自己識得打你少少斧頭㗎喇。總括來講，葡萄牙食、住、人嘅質素真心麻麻。嘢食真係好唔啱香港人口味，偏咸偏甜，難怪香港叫做美食之都，飲食質素真係高好多……（續）
