男友為左補返份情人節禮物俾我，就帶左我去觀塘DIY 銀戒指。 自己製作戒指，諗就好簡單，整原來好難！ 1. 首先搵自己的戒指size，因為燒個陣會縮水，所以在度SIZE要做大三個碼，唔係就會戴唔落啦! 2.將銀黏土開封，先將銀黏土搓圓，再用卡片座搓成條狀；將銀黏土放在兩塊膠片中間（以固定戒指既厚度），用卡片座將條狀的銀黏土壓成塊狀 3.選擇鍾意既符號及字母，輕輕印上銀黏土度；印完就可以捏成自己喜歡的樣式。 4.放入焗爐約20分鐘，焗乾銀黏土 5.焗乾後用搓刀及砂紙磨到平滑，依個過程要好小心，千奇唔好整裂個戒指； 6.放入去燒，燒約15分鐘待戒指收縮，燒完就放入凍水裡冷卻； 左面個隻就未燒既，燒完就好似右面個隻咁； 7.燒完用短毛鋼刷、砂紙用力刷戒指，將戒指拋光 前後三個幾鐘，終於獲得專屬於我們的銀戒指啦！（因為材料有多，所以整多兩塊細牌仔，遲Ｄ可以將戒指同牌仔一齊穿上鏈度） 親手打造獨一無二的戒指，係一份充滿心意的禮物，成個過程及製成品都令我地覺得非常值得同滿意！希望下次有機會再整下其他野啦！！
