睇場停不了，今日又去左ClubOne其中一個新場到睇，呢個位於尖東安達中心嘅新場開咗10日8日左右。 地點好唔錯，因為喺正尖東噴水池附近，即係話無論係紅磡站、尖沙咀站，抑或尖東站都可以行到嚟。 尖東薈就喺安達中心嘅B1層，左手邊可以行樓梯落，或者喺右邊搭扶手電梯都得~ 我地去呢日係開放日嚟嘅，ClubOne Block咗午市冇開，等新人們可以靜靜地慢慢睇。 入門口之後嘅右邊就可以望到下層嘅場，由上層望落去有啲似睇歌劇嘅設計，上面一個一個露台位就好似啲富貴人家睇Opera時坐嘅包廂咁~ 我有幻想過啲賓客一入門口就可以望到下層嘅人係幾咁熱鬧的一件事XD 搭扶手電梯落下一層睇，Reception位置有一個大Screen，再行入少少就係一個好闊落嘅梳化位，用嚟補斟茶應該都grand，影出嚟嘅相唔駛擔心會大紅大紫會老土。 呢個A廳睇介紹話可以擺到28圍，而家就係set咗十幾圍檯，所以有好多空間，我諗如果擺20-22圍應該啱啱好，檯同檯之間鬆動得嚟又唔會擔心太冷清。 個台用咗我最鍾意嘅草原系，呢個backdrop已經好靚，有草有花花但唔會俗氣，佈置果part可以慳返。 行過右邊少少就去到B廳喇，呢個細場如果打算擺十幾圍嘅人就適合喇，個台好闊，而且設計得簡單高貴，右手邊仲放咗部白色鋼琴，Big Day有現場音樂伴奏個浪漫氣氛就upgrade晒。 最後就睇到我最關心嘅新娘房，兩間房都夠光猛四正，如果兩個廳一次過包晒就可以將新娘同其他奶奶姨媽姑姐分開用房，唔駛爭！ 不過經理話2019年嘅優惠通勝仲未出，大概要等多幾個月先至有，咁呢段時間我就可以同仔仔去睇多D場，唔駛咁快決定住~
