山林道出名多好野食，喺呢條街你唔駛擔心會見到連鎖餐廳嘅蹤影，因為間間都別具一格用心製作。 之但係我無諗過原來喺山林道嘅最深深深處係有間裝修得相當靚嘅餐廳，多得Google Map帶路啦~ Season Plus無論店外定店內都幾有格調同空間感，設計似一間所費不菲嘅西餐廳，但睇Menu又覺得收費合理，仲有某啲items係做緊優惠添。 沙律拼盤 $148 平時食得煎炸食物多，見到Menu有沙律拼盤就二話不說叫咗先，擺盤就幾靚喇五光十色咁，不過我覺得最正就係parma ham落得好足本，食極都仲有，又唔駛驚食菜會好齋XD 鮮蝦隻隻都爽口彈牙，但我經常性都皮膚敏感，男朋友只係俾我食一隻…其餘果啲佢食晒… 蒜蓉牛油焗翡翠螺 $99 呢個係優惠價嚟，正價要$148的。翡翠螺在我眼中一向都係無咩味嘅食材，通常都係得口感，而用蒜蓉牛油去焗就正正彌補咗翡翠螺自身嘅不足，但兩個人每人食5隻係有啲多嘅XD 慢煮西班牙厚切黑毛豬 $378 $378價錢係可以揀加一樣side dish，如果唔加嘅話就只係需要$328。雖然話係慢煮，Menu上亦寫明製作需時最少60分鐘，但原來當你等個幾鐘先有得食嘅時候係會覺得相當眼訓嘅XD 三百幾蚊一件黑毛豬其實唔算平，不過個擺盤我就覺得流左少少，同Menu張相亦爭得幾遠吓，不過味道係唔錯的。 豬鞍顏色尚算粉嫩，食落亦有肉汁，而邊邊位嘅小量肥膏真係好好味，驚唔驚增肥係一件事，但入口果股脂肪膏香味係抗拒不了的~ 另外出色嘅就係旁邊黃色嘅醬汁，少少蜜糖味用嚟點厚切豬扒真係perfect！反而D蘋果食落覺得太油... Side dish揀咗芝士黑松露焗大啡菇，相機食先嘅時候已經聞到好香黑松露味。 切開之後可以見到啡菇厚肉又多汁，面頭芝士味道淡淡地唔怕會掩蓋啡菇自身味道~ Sangaria $28杯又幾抵飲，如果當中加返少少生果切粒點綴吓就更加好~ 呢晚嘅出品都無咩出錯，唯獨係個黑毛豬賣相如果用心啲會加返更多分~ Season Plus 地址：尖沙咀山林道52號環海大廈一期地下A及E舖 Openrice：https://www.openrice.com/zh/gourmet/reviews.htm?userid=63705209
