呢次想同大家分享下位於日本青森縣南津輕郡田舍館村既景點, 聽個名好似唔係太熟悉, 其實田舍館村係位於大家相對比較聽得多既弘前市東北面, 約23分鐘火車車程既一個村。 呢個稻田藝術日文叫 "田んぼアート", 係利用插秧方式做出一褔大圖案, 詳細係咩原理其實都唔太清楚, 但係從過去有好多台灣旅行者去青森都特地去田舍館村睇, 而旅遊書亦都冇介紹, 於是2017暑假我既東北之行就預留左半日時間去呢度。 田んぼアート每年既作品都唔同, 亦都分左兩個唔同既展望位置, 分別展示兩片唔同既作品。 先欣賞下2017年既作品 位於彌生之里展望所既第2田んぼアート(下面簡稱第二展望) 位於田舍館村役場既第1田んぼアート(下面簡稱第一展望) 講講交通, 其實第二展望係比較容易去。如果前一晚住係青森市區, 就先要去弘前市。 係青森站搭奧羽本線到弘前站, 普通列車約45分鐘, 特急30分鐘。要特別注意時間表, 因為青森去秋田方向(會停弘前站)既列車一個鐘可能只得一班兩班, 特急列車只有一日三班。 奧羽本線列車主力, JR東日本701系 亦都好建議大家連埋弘前市既景點都放埋係睇稻田藝術既同一日。 去到弘前站就按住指示落電梯去轉乘弘南鐵道弘南線, 因為JR同弘南鐵道其實係共用弘前站既。 如果由弘前市出發都係由弘前站出發, 因為弘前市內另有一個由弘南鐵道經營既中央弘前站, 果一條路線就去唔到稻田藝術既田舍館村既。 至於弘南線, 弘前係終點站, 所以得一個方向既列車, 就係黑石方向。列車係購自東急既二手車, 車入面係冇冷氣既,但係以東北咁涼爽既天氣其實冷氣又未必需要。 值得一提因為列車係一人控制, 而且沿途都係無人車站, 所以上落車都係係車頭最前既一度車門上落車, 並且由司機負責睇住乘客入錢落"運賃箱"。直至係終點站列車所有車門都會開啟, 由車站人員負責驗票。當然係弘前站上車就係車站買飛, 落車入飛。 要注意弘南鐵道係唔接受任何IC Card (Suica, Icoca等等)既。 完完全全係鄉村鐵路, 人不係太多, 行經既兩邊都係田野。 經過九個站, 黎到"田んぼアート" 車站, 呢個車站亦都係夏季當有稻田藝術既時候, 列車先會停靠。一落車基本上已經見到第二展望既展望塔。 落左火車行一分鐘就到 前面呢一座就係第二展望既展望台 未上展望台之前, 係地面望一望, 其實唔係好睇到係d咩, 所以就花一d錢上展望台睇啦。 展望台其實唔太高, 不過裡面都有電梯, 上可以搭電梯, 落黎就一定要行樓梯喇。但係係要入場費既: 大人(中学生以上): 300円 小人(小学生): 100円 小学生以下: 免費 上到展望台就好似上面一開始既第一張圖, 但都只係一部分, 其實個稻田係好大, 所以比張全景圖大家睇睇。 至於第一展望, 同第二展望係相距2.4km, 對於唔係自鴐既朋友行路去絕對唔可能, 所以田舍館村有一架往來兩個展望台既接駁車方便遊客。係唔需要錢既, 日文叫"たさあべ号" 時間表係官方網站可以睇到。 2018年既就暫時未有 http://www.vill.inakadate.lg.jp/docs/2013050200014/ 亦好貼心咁對應弘南鐵道既列車班次時間。 其實呢度附近都係一片一望無際既稻田。展望台回望番"田んぼアート"站, 只係一個好簡單既無人車站, 紅圈既位置就係たさあべ号 接駁車既車站。 たさあべ号係一部豐田Hiace既小型改裝客車, 可以載9人, 平日黎講基本上唔成問題。 第一展望既位置就係係田舍館村村役場, 搭たさあべ号 接駁車大約十幾分鐘就到。 就係下面呢一部車, 係免費乘搭既。 落車既地點就係正村役場門口, 展望台就位於村役場既頂樓。 一個天守閣既外觀, 其實展望台分兩種, 一種係矮D既係村役場四樓, 露天展望台, 另一個就係高D天守閣六樓既頂樓。 因為後面向西, 所以天守閣既倒影就遮住左一部分。 所以分開影,其實係有字既 另一邊可以見到有津輕富士之稱既岩木山, 不過比雲遮得好梗要。 離開展望台, 村役場既禮堂亦都展示過往咁多年既作品。 至於入場費, 分開兩種票, 四樓露天展望台: 大人(中学生以上): 300円 小人(小学生): 100円 小学生以下: 免費 六樓天守閣展望台: 大人(中学生以上): 300+200円 小人(小学生): 100+100円 小学生以下: 免費 如果想直接上最高既六樓, 都係要先買四樓既飛, 去到四樓再加多200円上六樓。 個人就認為高多兩層其實景觀既分別唔太大。 最後就建議最佳既觀賞日期係每年既七月尾到十月頭, 稻田既顏色先會比較鮮豔。而2017年黎講, 9/10已經係最後既觀賞日, 再睇就要等到2018年既六月, 靚D既就係七月中, 因為六月先插秧冇耐。 另外就係最好係平日避開日本假期既日子去, 因為有可能要等好耐先上到去, 根據其他旅行者既經歷。 最尾就係記得睇番たさあべ号 接駁車既時間, 番番去第二展望果度轉火車。 要注意既係兩個展望台都一律禁止吸煙同飲食!! http://www.vill.inakadate.lg.jp/docs/2013050200014/ 多謝收睇, 有問題歡迎你地留言, 交流下心得都可以!!
