2017年四月以睇富士山同櫻花做主要目的, 走訪靜岡縣沿海城市, 包括三島, 富士, 富士宮, 靜岡, 濱松, 用唔同角度欣賞富士山景色。利用JR東海推出既富士山靜岡三日週遊券, 用鐵道接巴士既方式週遊。其中想推介既係位於靜岡縣三島市既三島大吊橋Mishima Skywalk, 位於箱根西麓, 即係箱根既另一面, 但實際屬於靜岡縣既範圍。 特點係當天氣好既時候可以清楚望得見富士山以及日本最深既駿河灣, 宜呢條吊橋亦係全日本最長既人行吊橋,長400米高70.6米, 比九州大分縣既九重夢大吊橋更長。 從展望台呢個角度, 橋後面理應見到富士山, 但因為天氣唔好, 冇辦法! 呢一日亦係8日旅程之中天氣最好既一日, 之後都一路開始變差。但係當天氣好既時候仍然值得去, 因此推介比大家。 Mishima Skywalk位於山上, 係展望台睇另一邊就係駿河灣同三島市街。 影相技術有待改善! 當日風都好大下, 但係橋身其實都相當穩定, 有輕微咁搖, 行到橋既另一面有小食店同土產等等售賣。 而我就買左呢個, 200円抽一次既小木牌, 職員解釋係橋上面許個願然後做左後面寫既野, 願望就會成真。 後面!其實睇唔明,不過據職員教路, 係橋上面掉落去就係了。不過其他地方冇得賣既我當然唔會咁浪費, 一於帶番屋企紀念! 另外係入口既一邊有紀念品店, 咖啡室等等, 睇完風景都不妨花時間行行。 交通方式: JR三島站南口五號候車亭乘搭東海巴士 往 [元箱根港] 方向 留意車上報站,於"三島スカイウォ－ク" 即"三島Skywalk"站落車, 需時約30分鐘至45分鐘。反方向就係同一路線往 [三島站]方向。建議出發前到東海巴士網站查詢下巴士班次, 因為班次相對較疏。 *要留意既係同一個候車亭可能有幾條路線停靠, 千奇唔好見車就上!! *巴士來回程都會途經三島市另一個著名景點"三鳩大社", 可以安排同一日前往。春天櫻花係最大賣點。 不論是否利用JR pass,上車時請抽整理券, 落車時將整理券入落司機旁既運賃箱,如果利用JR富士山,靜岡三日週遊券可以免費乘搭,將週遊券有日期一面show比司機睇就可以。付現金就請留意報站機顯示屏,對應番自己整理券上既號碼, 將現金放入運賃箱。如果唔夠散紙可以用紙幣係運賃箱兌換。 場內亦有大型停車場, 方便自鴐既朋友。 三島スカイウォーク 〒411-0012 静岡県三島市笹原新田313 TEL. 055-972-0084 門票: 大人1000円, 中學生500円, 小學生200円。未滿小學生程度免費。 Mishima Skywalk官方網站: http://mishima-skywalk.jp/ 東海巴士查詢班次: http://dia.tokaibus.jp/OrangeGuide/pc/naviSearchSet.do?busstopCode=8101&target=departure
