香港的初夏,非常適合行山郊遊!邊個講郊遊一定要去到新界,想舒服容易行下山,影文青相呃like,在港島區已經可以滿足各位行山初哥。由灣仔出發,灣仔峽道沿香港仔水塘道到香港仔水塘。 路線: 灣仔囍帖街秘密空中花園--- Tea@Vive Cake Boutique---灣仔峽公園童話小屋---香港仔水塘---鴨脷洲遊船河睇日落 以前的「囍帖街」是灣仔區內富有本土特色嘅街道,被容不下本土同殖民色彩嘅政府同地產商搞成同普通商埸無分別,失去原來嘅面貌特色。 一直都知道利東街有個「秘密空中花園」,由「囍帖街」重建而成的灣仔利東街項目,按地契要求需要提供公共休憩空間,於是發展商就興建一個好隱秘嘅空中花園。 「秘密空中花園」入口靠近皇后大道東,喺Vivienne Tam隔離有專用升降機可以到達位於5/F 「秘密花園」。 整個空中花園呈長方形,面積唔算大,分為2個部分。 花園貫徹成條街嘅歐陸式風格設計,仲有類似風力加太陽能發電嘅設施。 花園內有一片小草地、心形雕塑、綠葉拱門外,更有少女們夢寐以求嘅南瓜車、小天使噴水池同天鵝雕像。 好友覺得好靚好夢幻,好啱小情侶靜靜談心,拍攝甜蜜合照都係唔錯嘅地點。 不過,並唔係整個 5/F 都屬於公共空間嘅範圍。呢條橋就唔屬於公眾空間範圍,屬於私家屋苑範圍。 如果你有男/女朋友,唔知你會唔會帶另一半嚟呢度拍拖呢? 囍匯空中花園 地址:灣仔利東街5樓平台 開放時間:上午8時至晚上9時 跟住就到商場basement嘅Vive Cake Boutique享受嘅美好午茶時光! 近年,韓國和台灣都有唔少好有特色嘅Cafe。除了甜品精緻,靚靚嘅裝潢更加係呢d Café嘅一大賣點!假日想與閨蜜Chill下,其實香港都有唔少選擇。 走進Vive Cake Boutique,相信每個女生都會著迷!整間店以女生至愛嘅粉紅色及白色雲石設計,仲有好多鮮花裝飾點綴,夢幻到暈~店內座位唔多,只有4張檯,但唔會令人覺得擠逼。 咁夢幻嘅環境中食件cake、喝杯茶或咖啡,感覺超正!Mini cake造型非常精緻,亦有唔少飲品選擇,每件蛋糕或飲品價錢大約$40-$50。 我地兩個人點3件mini cake同2杯飲品!由於我地係當日頭50名客人,所以其中1杯飲品半價,不設加一,埋單$200有找。 Mini cake有青蘋果味嘅Ever Green、白桃&荔枝味嘅Summer Flourish同Berry Almond Tart~我地2人都好鍾意Berry Almond Tart; Summer Flourish有陣人工香精味,但味道可以接受; 而Ever Green味道怪怪地,果然青蘋果味都係雷硬,有中伏嘅感覺! 反而飲品令我地好滿意~好友點杯最愛嘅紫薯飲品Sweet Potato Latte,我就揀最愛嘅Peach Tea !Vive Cake Boutique嘅茶包係選用有300年歷史嘅英國王室御用茶品牌Fortnum & Mason,我好鍾意呢個品牌嘅茶葉,真係超好飲~ Vive Cake Boutique 地址 :灣仔皇后大道東200號利東街地庫B05-B06 灣仔給人感覺像石屎森林,原來都可以郊遊行山!享用完甜品,當然要行下減肥啦! 於是我由廈門街(皇后大道東方向)乘搭前往山頂嘅15號巴士於灣仔峽道落車,直接抵達灣仔峽遊樂場。又或者大家可以由舊灣仔郵政局旁嘅灣仔峽道起步,由繁忙的市區走入清靜山徑,行大約40分鐘到達灣仔峽遊樂場。(灣仔峽道好斜,斜度達11度,大家量力而為!) 灣仔峽遊樂場內有飲水機、廁所、涼亭、小賣部等設施。 經過右邊嘅甘道兒童遊樂場,就係警隊博物館。警隊博物館外面嘅大炮,係1830年期間由東印度公司設計嘅18磅重炮彈火炮。 警隊博物館前身是警察歷史紀錄委員會,搜集唔少警隊歷史有關嘅文物。館內分為歷史展覽廳、三合會及毒品展覽廳、警隊今昔展覽廳等3個部分,有過往嘅制服、 裝備、槍械等,仲有三合會入會儀式嘅模擬祭壇,以及「上水之虎」頭顱標本等。 呢款係1960年代使用嘅交通指揮亭。相信大家小學時一定都有嚟過參觀警隊博物館,所以想重遊嘅意欲應該唔大! 灣仔峽公園童話花園小木屋 灣仔峽公園有個亮點,公園入口附近有間隱秘童話花園小木屋,門前長滿矮樹和花草,就好似隱身森林中嘅童話小屋一樣。大家記得細心尋找,唔好錯過呢間童話小屋啊! 花園小屋設計細緻,完全唔一般香港嘅公園裝飾。屋前木門嘅雕刻及裝飾都好精緻,超有童話屋feel! 花園小屋有張貼告示提醒大家唔可以行入花園小屋,但見到有新人明知唔可以,都硬係要行入花園小屋影相。以為影婚紗相就可以大晒,毫無公德心,不知所謂,極度冇品,同強國蝗蟲無異! 公園左邊就係香港仔水塘道,沿路一直往下行,就可以到達香港仔水塘。 香港仔水塘係位於香港仔郊野公園內香港仔谷嘅水塘。嚴格來說,香港仔郊野公園內有兩個「香港仔水塘」:香港仔上水塘同香港仔下水塘。 出發前,睇清楚地圖同路線係常識吧! 廢棄小屋嘅藍色木門好吸睛~ 遊人可以從灣仔峽遊樂場香港仔水塘道下望遠眺香港仔水塘。 沿路環境清幽寧靜,遇到好多友善嘅行山之友,有d會主動打招呼,感覺很窩心。 沿香港仔水塘道前行,之後嘅路程都係落斜,加上沿路都有山風樹蔭,大家可以邊傾邊行,20分鐘左右就可以到達香港仔上水塘。 由於沿途樹木蔭蔽,景色怡人,有好多紅膠木、大頭茶、錫葉藤及其他藤本植物,所以設有香港仔自然教育徑。 是日係公眾假期,唔少人都嚟行山,搞到我由睇風景變成睇眾生百態,食花生食到滯 !有位港爸不斷問個仔記唔記得American Captain,阿仔完全唔明佢老豆噏咩! 港爸唯有講返廣東話美國隊長,小朋友先聽得明! (老老豆豆,聽到Captain America變成American Captain,搞到本人忍笑忍得好辛苦! 齋同小朋友講英文單詞係唔會令英文變好,而且仲要係錯嘅,真係唔知想點!!!) 傾斜的_ _??? 繼續一直往下行,途中會經過松鶴亭,再行大約3分鐘,就會見到香港仔上水塘。 水塘附近除了設有多個燒烤地點,還有松鶴亭及主壩旁邊太極台。 經過燒烤場後,見到呢個分叉路口,靠左邊直行就會到達香港仔上水塘同水壩。 香港仔水塘多座建築已被古物古蹟辦事處評級,其中更有4項設施被列為法定古蹟,包括:上水塘水壩、水掣房、石橋以及下水塘水壩。 香港仔上水塘 上水塘建於1931年, 水壩、水掣房及石橋都被列為法定古蹟。香港仔上水塘水壩由當時水務局嘅Mr. R.M.Henderson設計,用花崗岩所建成。 香港開埠之初唔單單係漁村,亦擁有天然資源-大量花崗岩石,本港採石與打石工藝喺當時相當著名,大家可以由水壩嘅手工可見一斑。另外,香港建築物嘅花崗岩顏色原來可以反映開採年份,越早期岩石顏色愈紅,到舊立法會大樓興建時 (1900s) 已經「白淨」好多。50年代興建舊政府總部時,由於摩利臣山開採嘅花崗岩石會起鏽漬,所以最後採用鑽石山開採嘅花崗岩石。 水壩另一面係被環山懷抱嘅水塘,睇住平靜嘅水面,感受陣陣涼風,好舒服!當日無論上水塘定係下水塘都見到有人垂釣~ 平靜嘅水面和藍天白雲,隨便影都係文青靚相。站在山水之間,身心完全放鬆晒。 香港仔上水塘水掣房同樣係法定古蹟,屬於實用主義建築,受到意大利文藝復興風格影響。 上水塘最特別嘅地方係大壩下有條小石橋,想試試近距離睇上水塘水壩,可以去睇下! 上水塘水壩入口旁邊(右邊,有指示牌指向香港仔下水塘方向)有條小路通往水壩下嘅石橋。(石橋屬私人地方,不對公眾開放。) 成條小路都係樓梯級,上面仲有呈圓拱形嘅竹樹。香港嘅水塘旁邊都會種竹樹,好似城門水塘都有好多同品種嘅竹樹。 (石橋屬私人地方,不對公眾開放。) 沿樓梯往下走,就可以見到到建在水壩下方中央嘅石橋。香港仔上水塘石橋被列為法定古蹟。石橋橋身呈平圓拱形,由花崗石礅升起,建有厚平台樓板,石橋兩旁均有古式扶欄。 暗渠入口由網狀紋砌石塊建成,並裝有鋼門和裝飾性鐵閘。水壩底仲有一個古式汲水器,非常特別。 圓拱形小石橋,好英倫風,完全就係藝術,令人可以感受到當年日不落帝國嘅氣息! 在古老橋石上慢慢行,靜靜欣賞整座水壩建築。 由壩底往上望,更顯得水壩宏偉壯觀。 完美對稱 當我欣賞水壩時,完全被隔離對情侶影響到! 有位中佬龍友打龍時不停叫中女女友做baby,仲係咁要女友轉pose影相,最後連佢baby都嫌佢煩,發脾氣鬧爆佢~ (滴汗ing) 如果覺得玩夠,可以沿路回程,但就由落斜變上斜,會有少少吃力。另一個選擇係繼續向前行,前往下水塘水壩。呢條路無舖上石屎,係普通泥地,部分路段由相間石塊砌成,但較為平坦,並唔難行。途中更可以停低,近距離欣賞水塘風光,感受一下寧靜氣息。 行大約10分鐘就到達目的地-香港仔下水塘。而下水塘水壩同上水塘水壩同樣屬於法定古蹟。 香港仔下水塘建於1890年,前身係大成紙廠私人水塘,比上水塘擁有更耐歷史。當時大成紙廠與香港政府協定,為鴨脷洲居民提供食水。直到1920年代,香港政府為左解決港島西區食水問題,花費46萬港元買下大成紙廠水塘,改建成公用水塘,並在1931年於水塘上游加建香港仔上水塘。 以為上水塘和下水塘風景應該差唔多?下水塘左面係湖綠嘅水,另一邊可遠眺香港仔嘅高樓大廈,站在窄橋上拍攝,好有文青feel !大家記得影靚相之餘,不妨好好欣賞一下呢座超過百年歷史嘅建築。 下水塘旁邊發現一小片長有紫藍色小花嘅植物。 遠眺位於黃竹坑,擁有中式建築、紅柱綠瓦嘅聖神修院同海洋公園越礦飛車軌道。越礦飛車被譽為係世界上最美的過山車(The world’s most beautiful roller coaster),因為望到非常靚嘅景色! 最後行約10分鐘就到達出口,輕輕鬆鬆完成呢趟個半鐘嘅香港仔水塘旅程。然後經過漁光邨,到達香港仔。 仲有體力嘅朋友可以好似我咁去由香港仔搭船過鴨脷洲。 海鮮舫嘅專屬碼頭,古色古香,遊客一定好鍾意! 鴨脷洲-香港仔遊船河睇日落 宜家香港用傳統舢舨載客嘅方式已經好少見,而香港仔到鴨脷洲就有得搭。 用$2.2乘搭舢舨街渡,船程約3分鐘,的確係唔錯嘅周末慢遊活動,絕對值得一試! 沿途不少船隻和舢舨,當中亦有觀光舢舨供遊客乘坐。 開頭以為停泊咁多船,街渡究竟點樣穿梭其中? 但原來係亂中有序,未搭過一定要體驗下! 鴨脷洲大街有好多茶餐廳同小食店,掃街一流,西多、炸髀、碗仔翅都係我最愛! 仲有呢間專賣傳統糕點,而且還提供超多款式嘅舊式士多,今時今日已經買少見少。砵仔糕、煎堆、燒餅、西米糕、桂花糕、月餅、馬仔、光酥餅、香蕉糕等,應有盡有,大部分係新鮮即製,賣晒就冇。當日去到,我最鍾意嘅糯米糍已經賣清。另外推介砵仔糕,紅豆夠多,咬落好軟熟,而且唔會過甜。芝麻糕亦相當唔錯。每件糕點都係幾蚊,不妨試多幾款。 當日見到有新加坡遊客特登到士多買傳統糕點。 友和士多 地址:鴨脷洲大街110號前舖 第一次搭南港島線~ 無論車站定車廂都充滿該區特色! 玩足大半日,係時候打道回府喇! 由灣仔玩到入香港仔原來咁輕鬆容易,呢條路線真係無得頂!