作為一個女仔，其實對好多事物都係難以抗拒嘅情意結～其中之一就係燈塔。唔知係咪俾日韓劇洗腦，對純白色燈塔有種迷戀。無論係沖繩殘波岬燈塔、濟州島涉地岬燈塔、台灣鵝鑾鼻燈塔定係澳門東望洋燈塔，我都超級鍾意。 最近睇《藍色海洋的傳說》，見到位於西班牙嘅埃庫萊斯塔（Torre de Hércules），加上蔚藍色嘅大海，咁嘅景色真係贏晒！一直唔明白香港作為一個港口城市點會連座白色燈塔都冇，請原諒本人孤陋寡聞，原來香港係有㗎！就係鶴咀燈塔喇！所以心動梗係馬上行動啦！ 鶴咀之所以咁吸引，因為一次過可以滿足晒N個要求，啱晒貪心嘅我。鶴咀除咗被稱為「秘境」、「禁地」之外，仲有齊海灣、懸崖、海蝕洞、星空；有廢碉堡、炮台，有怪狀天線、有香港最古老嘅燈塔、鯨魚骨標本等等。更重要就係鶴咀並唔難去，亦唔難行，即使得半日時間都已經足夠。由於去鶴咀前有做足功課，發現網上有唔少資料都有小錯漏，希望呢篇可以幫到大家。 由於我上一站係去咗石澳、大頭洲先，所以我係由石澳總站搭嚟鶴咀嘅～ 有興趣「石澳、鶴咀天涯海角遊」可以參考Part1: 回憶中的海角－懸浮在石澳上的夢幻藍橋 雖然鶴咀海岸保護區係港島上一個唔對外開放嘅地方，但其實並唔難去。大家可以先到筲箕灣巴士總站乘搭9號巴士到鶴咀落車就得（上圖大風坳迴旋處）。有朋友誤以為只有假日，部份巴士班次先會停喺呢個站。其實啱啱相反，為咗方便村民同喺度番工嘅人士出入，9號巴士所有班次喺星期一至星期六都會停喺鶴咀。而假日筲箕灣同石澳總站每個鐘各開兩班車停喺鶴咀（正點、半點）。 1430我從石澳總站出發，5分鐘就到達鶴咀（站），想去鶴咀尋幽探秘嘅朋友，宜家先係起點！一下車沿著鶴咀道開始走，沿途秋風送爽、風景怡人，令人心曠神怡。整條路線都係平坦大路，基本上係零難度！ 鶴咀半島位於香港島東南端。而鶴咀係鶴咀半島上嘅一個海角，位於香港島南區赤柱及石澳地區的鶴咀半島南端。 鶴咀有個充滿外國風情嘅英文名－ Cape D'Aguilar，係以香港第一任副總督德己立爵士(Sir George Charles D'Aguilar) 命名。 沿著鶴咀道行，右手邊見到對岸風景！大家估下嗰度係邊？ 其實上面都有講，對岸就赤柱半島。而右下方就係石澳石礦場，係一個已停用嘅石礦場，亦係香港島最後一個石礦場，佔地45公頃。近年有關當局建議用作鐵路海底隧道沉管工場，唔知係咪咁，所以就我所見石礦場係有運作嘅！ 前往鶴咀海岸保護區嘅部分道路屬於發射站禁區範圍，因此一般公眾唔可以隨意前往。由於當局並唔鼓勵市民自行到鶴咀海岸保護區參觀，所以鶴咀海岸保護區範圍內並冇提供任何公共衛生設施好似垃圾桶及廁所等。整個行程中，我唯一見過嘅廁所就只有喺鶴咀道開始行咗5分鐘後出現嘅兩個流動廁所。如果大家真係好想去廁所，一係就用流動廁所，一係就一陣入村借用（P.S.我自己冇用過亦冇試過）。 繼續前行會望到遠方海角上有座建築物－當年英軍嘅機槍堡。位於鶴咀西南岸嘅機槍堡，築於稍為凸出海岸平台上，面向大潭灣。 然後左邊出現咗一大堆大石凌亂咁堆砌住，呢度就係鶴咀石河嘅入口，鍾意攀岩嘅朋友可以嚟挑戰一下。 機槍堡位於鶴咀下村嘅海邊，地圖上只係簡略標誌咗一塊大石，其實就係機槍堡所在。由於鶴咀半島西面與赤柱半島相望，位置非常獨特，所以喺二戰日軍侵略香港前夕，英軍喺度建有一座機槍堡，扼守大潭灣 。後來英軍奉命炸毀此堡，撤退到赤柱固守另一防線。宜家喺鶴咀道上一路行，不時見到路邊有掩蔽體和觀測台。 機槍堡近年曾被修葺，修復咗屋頂、移走咗倒冧嘅磚石，並加咗解說牌。所以即使要離開大路，穿過密林，落陡坡，仲要經過大量蟲蟻蜘蛛嘅屋企，我都計劃跑到海邊睇下呢座飽經風霜卻依然嚴肅深沈地鎮守住鶴咀半島嘅機槍堡。 不過仲要繼續行先，然後會見到兩個方向牌。究竟向左定係向右行？ 大家記得無論想去燈塔、海岸保護區都請向右邊嘅大路繼續直行。不過即使已經開始見到指示牌，但離目的地仲有一段距離。 行前少少就見到芽菜坑村，座落村口嘅芽菜坑村信箱真係好得意！芽菜坑村喺大路嘅右邊，再行前10步，馬路左邊就係一個梅菜園（下圖）。聽聞呢度嘅石澳梅菜好出名！而梅菜園對面馬路右邊就有一條小路通落荒廢咗嘅鶴咀下村同機槍堡。 正當我想行落去機槍堡時，有個住喺芽菜坑村嘅大叔叫住我，問我想去邊度。於是我就話佢知我要去機槍堡。然後大叔話得我一個女仔太危險，而且條小路唔好行，所以唔好去。佢仲提醒我一定要行大路，其他景點只要沿著大路就去得到。（雖然我外貌呃得吓人，但其實我係好大膽，加上日光日白，有咩好驚呢？） 不過見大叔咁擔心我，唯有放棄，唔去機槍堡。向好心大叔道謝完，我繼續向前行。當行經過咗通落機槍堡條小路，我回頭一望，竟然見到大叔依然企喺村口望住我，好似驚我會偷偷走落去機槍堡。 再行前少少就見到鶴咀村個路牌，直至見到我行入鶴咀村，大叔先肯離開番入芽菜坑村。 喺鶴咀村口見到呢部外形好可愛嘅車～ 港島南面的最東端的鶴咀半島，原本有三個客家村落，其中鶴咀下村已遭政府清拆，現今僅存只有芽菜坑村同鶴咀村。 鶴咀村至今已有二百多年的歷史，村落裡全民皆是朱姓。據歷史記載，於乾隆年間有一批廣東五華客籍朱姓族人，從長樂遷至鶴咀定居而建立村落。 鶴咀村是香港其中一條古老嘅村落，內有鶴咀村學校遺址。學校面積細小，校名由商紳鄧肇堅爵士題名。雖然學校已經停用但仍然狀況良好。 鶴咀村仲有一座非常值得參觀嘅更樓。經過舊校舍，繼續走向村內，就會見到一座19世紀落成、具百年歷史嘅二級歷史建築物 － 鶴咀村更樓。 鶴咀村更樓，又稱碉樓瞭望台，建於20年代。更樓座落村嘅中部，全座都係採用花崗岩築成，闊約 4 米，高約 9 米，兩層樓高並設有槍洞及天台城牆，以收藏村民嘅貴重財物及藏身抗敵之用。 更樓嘅出現，反映出十九世紀至二十世紀初香港海盜猖獗及居民缺乏安全感。據村民指出，朱氏先祖百多年前由西環石塘咀遷來，由於不斷進行墾殖，生活日漸富裕，被當時嘅盜賊所垂涎，更屢次受到海盜滋擾。為咗保障村民安全，防止土匪及海盜入侵，於是斥資興建更樓，用作保存族中貴重財產，直至1942年日治時期才停止使用。近年修葺後加設了金屬格窗及鐵門鎖。 睇完鶴咀村更樓，步出村時，聽到其中一戶大叫話有車出筲箕灣，跟住村裏面有幾個人都行出村口等車。突然有種離香港同市區好遠嘅錯覺。呢個時候竟然聽到電台嘅整點time bit，然後又有種返回現實嘅感覺。 繼續前行又會再出現指示牌！上面顯示距離鶴咀電台禁區只係500m！喺附近一帶位置會有狗仔出沒，但牠們都好乖 （又或者根本懶得理你）。 轉咗呢個彎，見到有幾座電塔，代表鶴咀電台就係前面喇！ 我從巴士站行到入嚟鶴咀電台禁區，用咗35mins～ 鶴咀建有由PCCW（前大東電報局及香港電訊）管理嘅無線電通訊設施、地面衛星接收站及海底電纜。 前往鶴咀海岸保護區嘅部分道路屬於發射站禁區範圍，因此一般公眾不能隨意前往。 到達電訊公司發射站嘅閘門，大家都見到－「私人地方，不可擅進」﹗鶴咀電台禁區屬於私人地方，但各位唔需要硬闖嘅！閘門旁邊草地有一條清晰小路可以繞過禁地，大家只要沿著呢條路行就可以喇！近年愈嚟愈多人嚟鶴咀，個人反而覺得另一個告示牌「自己垃圾，自己帶走」必須遵守，絕度唔可以亂拋垃圾，破壞環境，造成附近居民同工作人員不便。 藍天、碧波、小白屋、綠草地、野菊花，完全唔似置身香港一般～ 即使唔可以經電台進入鶴咀海岸保護區，但電台出面並冇限制。不過記住唔好掛住睇風景唔睇路啊！ 小徑只係夠一個人通過，記得互相禮讓啊！當我行到一半時，見到有個伯伯行出嚟，於是即刻想讓佢過先，點知佢堅持俾我行先，話lady first wor～仲額外附送勁燦爛嘅笑容添！ 草地上開滿小花，吸引咗好多蝴蝶、蜜蜂採花粉、花蜜，充滿大自然氣息。點知咁清新舒服嘅環境俾兩母女打擾晒！個女一見到蜜蜂就尖叫，仲話驚蜜蜂會針佢。兩母女不停係度擾攘。兩位大姐！呢度好似係蝴蝶、蜜蜂嘅屋企，你兩位唔該細聲D啦！唔知自己帶嚟噪音污染㗎？！仲有兩位肥屍大隻，蜜蜂驚你攻擊佢，多過佢會攻擊你哋囉！郊外好危險！咁驚就唔好嚟郊外，多謝合作！ 跟住見到一個清澈見底嘅小海灣，呢度就係垃圾灣喇！可能大家同我都有相同嘅疑惑，點解咁靚咁藍嘅海灣會被叫做垃圾灣呢？跟住我再行前少少就明白喇！原來近岸位置嘅海面上真係漂浮住唔少垃圾。 「垃圾灣」係地圖上嘅官方名字，可見呢個海灣一直都係垃圾嘅領土。由於水流風向關係，垃圾隨浪捲到呢度，積聚喺灣內，難以沖走，就變成咗垃圾灣。其實垃圾灣與鶴咀海岸保護區，只係隔住一個海岬嘅距離，希望大家都可以關注海洋垃圾問題。 繞過電台後會見到好多電訊設施，大家要小心，千歧唔好觸碰。走完草地，跟住會見到電台後門有兩條路，請靠右繼續向前行！ 行咗一陣就會見到幾座被荒廢嘅倉庫。 呢一個個重門深鎖嘅倉庫係以前打仗時嘅掩蔽體。 再行前幾步就會出現一左一右嘅分叉路，左邊係去燈塔，右邊係進入鶴咀海岸保護區。我選擇左邊條路，先去睇鶴咀燈塔。 沿途見到好多電塔，好似呢個電塔，就係位於鶴咀燈塔附近，見到就即係冇行錯路喇！ 大家仔細留意下就會發現，原來每一座電塔都係獨一無二㗎！型過巴黎人個塔啦！（其實我有靠呢d電塔辨別位置。） 繼續向前行又會見到分叉路，如果想去燈塔就要往右邊行。之後大家會再向見到一排紅頂白色小屋。點解仲未見到燈塔？ 因為燈塔俾樹叢遮住咗，所以先未見到。轉埋個彎位就會見到燈塔出現啦！ 鶴咀燈塔完全係我最鍾意嘅嗰種風格！比起新式嘅高聳修長嘅燈塔，我更喜歡矮小粗身嘅舊式燈塔，更有感覺！ 沿著樓梯上去，就會見到鶴咀燈塔。 鶴咀燈塔又稱德忌立角燈塔 (Cape D'Aguilar Lighthouse)，鶴咀燈塔喺1875年啟用，係香港第一座燈塔，亦係本港現存五座戰前燈塔之一，更加係香港現存最古老嘅燈塔。鶴咀燈塔宜家嘅編號係158。由於極具歷史價值，並喺香港海事史上佔有重要地位，所以2006年被列入香港法定古蹟。 鶴咀燈塔比我想像中更靚，經歷過歲月洗禮感覺好浪漫！ 鶴咀燈塔係一座高9.7米嘅白色圓形石塔，燈塔嘅底座、拱形的門口及裏面嘅螺旋形樓梯都嘅以石塊砌成，入口嘅鐵門頂上有幾何花紋圖案，充滿濃厚嘅新古典主義色彩，完全可以見到燈塔嘅細緻工藝。燈塔嘅照明儀器係固定一級屈光鏡，射出嘅白色燈光可以遠至23海里之外嘅水域。 當年香港啱啱成為英國殖民地，貨物來往開始增加。尤其喺1869年蘇彝士運河開通之後，海上交通變得繁忙，1867年，港英政府就已經決定喺香港島東南嘅一個海角興建燈塔，英國海軍派員選址，最後喺1873年3月選取咗鶴咀、青洲和黑角頭呢三個地方。於是興建燈塔的工程隨即展開，鶴咀燈塔亦於1875年4月16日落成啟用。 1893年，橫瀾島燈塔落成啟用，鶴咀燈塔嘅功能畀橫瀾島燈塔取代，因而失去使用價值，最後於1896年停止運作。期間喺1905年曾有計劃拆去照明設移到青洲燈塔，用作提升效能，點知發現部件太大而放棄，改為喺隔離另建一座新嘅青洲燈塔。1975年，鶴咀燈塔改為自動化操作後，重新投入服務一直至今。 燈塔旁邊已經係懸崖，所以建有石磚矮牆作為保護之用。 睇完燈塔後，好多人會直接行落去海岸保護區，但我會先去埋懸崖上嘅博加拉炮台。除咗鶴咀燈塔係法定古蹟外，喺雙四門懸崖較高位置嘅天文設施旁邊仲有一座被列為二級歷史建築嘅博加拉炮台。（提提大家，由於小路比較窄，而且臨近懸崖邊沿，旁邊並冇任何欄杆，前往一定要小心。如果落雨就唔好去，以免發生意外。） 雙四門軍事廢墟位於崖頂密林處，有廢置多時的炮台及瞭望台。二次大戰前夕，港英政府為咗防止日軍喺南面海岸線登陸，於是短時間內加建三個臨時炮台及十多個防禦陣地及機槍堡。當中包括上世紀三十年代興建嘅博加拉炮台，戰後9.2吋嘅炮床被改建為無線電站。宜家喺鶴咀半島及赤柱半島一帶仍存有被閒置嘅軍事遺址，大家嚟到記得要小心保護呢d見證香港歷史、咁有價值嘅建築。 當年需派駐人手負責管理燈塔，塔旁築有幾座紅屋頂房子，其中十個房間就係前燈塔看守員嘅宿舍。昔日水陸交通不便，看守員一住就一個月，每當大霧籠罩海面，燈塔看守員要鳴起號角聲，以防船隻觸礁。 喺雙四門懸崖之巔，眺望大海，萬里無雲嘅藍天，白色燈塔加上紅頂小屋屹立海邊山丘上，完全置身外國一般，天涯海角盡現於眼底。 去完雙四門嘅博加拉炮台後， 行返落嚟呢個分叉路口，向右進入鶴咀海岸保護區。 去海岸保護區途中嘅風景，好有油畫feel～ 然後就會見到前面有狗髀洲，之前以為叫狗髀洲係因為似隻狗髀，但原來唔係！（原因一陣先講！） （上圖）狗髀洲右上角螺洲，前方係蒲台島。 狗髀洲右上角係有「香港南極」之稱嘅蒲台島，左邊有宋崗與橫瀾島。 終於嚟到鶴咀海角，見到鶴咀海洋研究所啦！ 香港一共有4個海岸公園，但只有1個海岸保護區－鶴咀海岸保護區。海岸保護區所佔海域面積大約約20公頃，由岸上嘅香港大學太古海洋科學研究所協助管理。鶴咀海岸保護區範圍包括鶴咀半島嘅北部、東部及南部水域，亦包括狗髀洲。 鶴咀海岸保護區以保育海洋資源及科學研究為主，保護區內有各種魚類，以及石珊瑚、軟珊瑚、柳珊瑚等海洋無脊椎動物，海洋科學研究所更加係多種海洋生物嘅繁殖基地。 喺鶴咀海岸保護區有各式各樣嘅岩石，其中4種主要岩石：最古老係由火山爆發而形成嘅凝灰岩、然後依次為花崗閃長岩、流紋斑岩及玄武岩。唔同嘅岩石受到唔同嘅風化海蝕而形成獨特嘅地貌景觀，好似跟住落嚟要睇嘅雷音洞、蟹洞咁。 雷音洞位於尚未右轉落科學研究所嘅路上，左手邊會見到一個入口，並且有個黃色箭嘴標記。亮綠茂盛嘅草海桐幾乎將入口完全擋住，而且要向下行，一個唔留意可能會錯過咗！嚟到時正好見到一對情侶，兩個人企咗喺度猶豫入唔入去。我唔理咁多就衝咗入去。 通往雷音洞嘅呢條小路長滿各種植物，又要行落樓梯，仲要必須彎低身先可以過到。見我自己一個都咁走落嚟，嗰對情侶亦跟喺我後面，個女仔一路行仲大叫好似愛麗絲夢遊仙境咁～ 雷音洞其實係一個海蝕洞，洶湧澎湃嘅海浪浪湧入狹窄嘅洞內，發出打雷一般嘅巨響，氣勢迫人，所以得到雷音洞呢個名。 雷音洞其實一條好大嘅裂縫，可以直接望到海。如果海浪夠大，每次海浪沖擊洞壁都會發出巨響。當日天氣晴朗，風平浪靜，所以冇聽到如雷巨響。不過大家要注意，如果水漲時有機會整個雷音洞被浸沒，一定要特別留意水深。 大家真係要注意海上清潔，雷音洞內有好多隨水飄嚟嘅垃圾！睇完雷音洞，沿返啱啱條小路出番去。 向著海洋科學研究所進發，鶴咀呢個海灣叫鶴咀灣，但以前曾經叫龍蝦灣，所以英文名仲係叫Lobster Bay，唔知以前係咪真係有好多龍蝦呢？ 不過係都好，都唔關大家事。因為海岸保護區內，任何人都唔可以進行釣魚、採集生物、破壞岩石等活動。另外，海岸保護區亦係禁止任何人喺區內游泳或潛水。宜家有好多遠足人士喺海岸上行走同撿起岸邊小動物，其實已經對鶴咀嘅潮間帶環境帶嚟負面影響！ 提提大家，唔好以為冇落水就可以喺海邊玩水！！！相信大部份人出嚟玩都一定會搽防曬，絕大部分嘅防曬用品都含有氧苯酮 (Oxybenzone)，只要1滴防曬產品已經會危害珊瑚礁，導致周邊海水病毒濃度增加，提高了其他珊瑚體內共生藻嘅感染率，更嚴重就係令到珊瑚礁白化。大家唔好搞錯，珊瑚係一種生物嚟㗎！！！請大家遵守遠足守則並且遠離水邊，保護嘅鶴咀生態環境同地貌。 啱啱提過位於鶴咀半島以南嘅狗髀洲（或稱狗脾洲），會被叫狗髀洲唔係因為似狗髀。喺香港官方地圖中，狗髀洲嘅英文島名叫 Kau Pei Chau。原來狗髀洲本名係筊杯洲，以其形似古時占卜用嘅半月形筊杯，據聞開埠初期只係記錄咗英文地名，由於村民有口音，傳下傳下就變咗質，最後筊杯被譯作狗髀！ 研究所外有一具骸骨，雖然經過歲月洗禮，日曬雨淋，但仍亮白如新，無懼風浪浸蝕，而魚骨長約10米，頭顱，魚背及胸骨清晰可見。都市傳說大多數話牠就是殺人鯨海威，所以放喺鶴咀海岸保護區內，希望牠死後仍能眺望和守護汪洋大海。（海威曾經係海洋劇場表演嘅台柱。後來受病毒感染後死亡。） 但有學術顧問指出海威體積並冇咁大，至於大家喺鶴咀見到嘅魚骨標本，係由香港大學安放喺度，事實上屬於一條1955年喺維港擱淺嘅鬚鯨，同海威係完全不同品種。大家唔好再搞錯啦！ 經過鬚鯨魚骨會見到隔嚟左邊有一條樓梯，沿住落去之後向左邊一直行就會見到蟹洞喇。鶴咀蟹洞好似一隻有雙大鉗嘅蟹，蟹肚與地面嘅空隙形成一個洞。 大家都話喺蟹洞最高處先會清楚睇到蟹鉗及全蟹嘅形狀，既然係咁就要上蟹洞頂啦！提提大家，小心被大浪整到全身濕透，更加要小心岩石濕滑。 蟹洞嘅巨箝迎入翻滾嘅海浪，海浪將堅硬嘅岩石鑿洞，但冇將蟹身磨得圓滑光亮，蟹身依然保留堅硬而嶙峋嘅硬殼。 海岸保護區內有受風浪衝擊嘅石岸，係本港東南面海角和陸岬常見嘅地形。陡斜嘅花崗石岸崎嶇不平，呈不規則石階狀，有高至1米的垂直面，亦有狹小嘅岩棚，若海浪湧至，便會形成臨時小水池。 行上蟹洞時，望番上岸邊，又可以望到燈塔啦！鶴咀附近及對岸都沒有高密度建築物，極少受到光害影響，夜幕下係拍攝星軌及銀河嘅好地方。鶴咀亦係觀賞日出嘅不二之選，初升嘅旭日加上一望無際嘅大海，一定非常震撼。由於今次得我一個人嚟，所以唔可以留到夜晚。 離開鶴咀電台，見到有隻狗仔。狗仔超乖，一路行係我前面，陪住我行番出去。佢仲不時回頭望下我，睇下我跟唔跟到佢嘅步速。 夕陽下嘅機槍堡 出到石河，見到夕陽啱啱找住石河嘅某切面上，好得意。 當我行番出嚟時，見到有幾個人不段話被蚊針，瘋狂噴蚊怕水。由於我幾乎係蚊嘅絕緣體，所以從來唔噴蚊怕水都冇事。我唔知鶴咀算唔算多蚊，建議大家最好噴定穩陣！ 如果第一次去建議大家太陽落山前好走喇！因為入夜後鶴咀道就會漆黑一片，燈都冇多盞，要黑媽媽一路行番出巴士站。 雖然見唔到日出，但就睇到日落！整個天空、整片海面都好似鋪上一層金箔，非常震撼！果然係夕陽無限好！ 夕陽加上雲彩，天空中好似出現咗一隻浴火飛翔嘅鳳凰。 嚟到呢度，今次「石澳、鶴咀天涯海角遊」亦嚟到咗尾聲喇！一行到出鶴咀道口，啱啱巴士嚟到，於是就搭乘9號巴士返出筲箕灣。 上篇「石澳、鶴咀天涯海角遊」（Part 1）: 回憶中的海角－懸浮在石澳上的夢幻藍橋
