大町溫泉鄉／酒の博物館－立山黑部「阿爾卑斯山脈」回程路線 第二日起身，喺旅館大浴場同房內露天風呂浸飽溫泉，先去食早餐。日本人習慣每日浸三次溫泉，一早起身、晚飯前同臨睡前。 溫泉旅館 綠翠亭 景水食早餐嘅地方喺lobby嘅コンベンションホール 光雅（こうが）。 由朝早0630-0900會供應早餐，早餐以自助餐形式進行（朝食バイキング），提供超過40種食物。 我一入到去即刻笑咗，因為實在太似舊式屋邨酒樓。講開又講，食早餐先知道原來旅館住咗咁多客人，但除咗尋晚喺餐廳同聽到男湯係有人之外，我都見唔都其他客人。 對旅館提供嘅早餐有D失望，我冇預計住係食自助餐式早餐。個人嚟講唔鍾意！雖然我平時係唔食早餐，但就好鍾意食日式早餐，再加上尋晚嘅晚餐實在太正太好味，所以特別感到失望。我淨係飲咗2杯咖啡，好友就有食早餐，佢話味道都ok嘅！ 旅館係喺check out先俾錢嘅，而唯一一樣要等嘅服務竟然係俾錢check out！由於要處理前面嘅客人先，櫃檯人員請我哋坐低等陣，佢就入去office print張結算單俾我哋。坐低冇耐，負責我哋間房嘅管家同女將婆婆就嚟到lobby向我哋道別兼歡送我哋，婆婆捉住我隻手話唔捨得我哋，叫我哋有機會再去玩。 大家都應該知道日本溫泉旅館嘅工作人員係一定要目送客人離開視線範圍先會離開。當知道我哋要去車站等車，仲想幫我哋拖行李去車站。我婉拒咗佢哋，請佢哋唔使送喇。所以佢哋就喺大門口向我哋揮手道別。跟住我哋想喺門口影相留念，點知俾女將婆婆同管家見到咗，佢哋又即刻衝出嚟話幫我哋影相，搞到我勁唔好意思，因為我以為佢哋已經走咗。 跟住我哋影完一輪再目送我哋離開。 喺大町溫泉鄉車站旁邊有個「酒の博物館」，由於我哋提早咗出嚟等車，所以去咗參觀一下。 參觀「酒の博物館」係要收費嘅，大人（中學生以上）400円，兒童免費。 收費原因係參觀完畢又試飲環節，大家可以試飲5款指定酒款。 博物館除咗介紹酒嘅歷史，清酒嘅分類，仲展示咗長野（信州）縣內91間釀酒廠出產嘅酒。 最勁就係展出咗日本全國約1500款清酒，真係大開眼界～ 除咗清酒之外，由於信州盛產葡萄，所以亦有展示日本出產嘅葡萄酒。 博物館又點少得介紹造酒嘅過程。館內有展覽廳展示咗大約500件造酒嘅器具。 之前一晚食晚餐時飲咗3支清酒，分別係「辛口」、「中辛」、「甘口」。試過就知道味道上嘅分別，「甘口」就係甜D，「辛口」就係dry D 。但究竟詳細資料係點，嚟到「酒の博物館」竟然有詳細解說關於「日本酒度」、「甘口」、「辛口」等等，完全滿足晒我呢個小酒鬼嘅好奇心。 除咗有展板介紹「日本酒度」、「甘口」、「辛口」等清酒知識外，仲有常設 地酒試飲コーナー （常設地酒試飲Corner）。地酒即係地方酒，喺呢個試飲corner會提供5款立山黑部北阿爾卑斯山脈出產嘅地方酒，等大家可以一邊試飲，一邊了解清酒知識。 想了解日本清酒，可以先睇清楚清酒酒標，好似大吟釀、純米大吟釀等酒款背標都會標示「日本酒度」，「＋」加號代表辛口，「－」負號代表甘口。但如果只係純米酒、純米吟釀、本釀造等中價酒款，背標就未必會標示日本酒度等資訊。 日本酒度嘅測量方式 其實日本酒度嘅標示，一開始係俾清酒業者參考用嘅數值，用嚟測量清酒內含有糖分嘅比例，作為判斷甘辛度嘅器具，外型好似浮秤，稱為「日本酒度計」。 測量方式很簡單，先將清酒倒入量桶中，再將「日本酒度計」輕輕放入溫度約15℃嘅清酒入面，觀察沉喺酒中嘅「日本酒度計」對應水平面嘅數據，就可以知道係「＋」／「－」。 甘辛度嘅調整 對於清酒嘅甘口、辛口，杜氏 （喺日本，釀酒者被稱為「藏人」，而「杜氏」就係領導酒廠內最高地位嘅釀酒師） 係可以自行調整嘅。清酒喺釀造時期，如果乳酸比例高D，「酸度」變高就會變得偏辛口。相反選擇酵母時，卻用香氣華麗度高嘅酵母，酒會變得偏甘口。 釀製清酒至到醪（もろみ）呢個步驟，就會將釀造用水、酒母、麴、蒸米投入酒桶內釀製醪。呢D原料唔使我多講，大家都知道一開始會係甘口，隨著發酵日數變長，酒精自然產生，酒體會從甘口慢慢變成辛口。所以杜氏亦可以用醪嘅發酵期長短，控制清酒嘅甘辛度。 釀酒嘅酒米會選用高等級嘅品種，釀出嚟酒嘅日本酒度，即使係「＋」正號嘅辛口酒，飲落都會覺得辛口中帶甘甜味。 因為酒米原本就係澱粉質，經過精米、洗米、蒸米過後，先會用嚟釀造清酒。正如吃飯時蒸煮好嘅米，會食到米飯嘅甜味，所以用酒米作原料嘅清酒，所謂「辛口」並唔係真係會好辛辣。 甘辛度嘅感覺 清酒係一種口感多變嘅酒類，如果將辛口酒款加熱後飲，口感會變得圓滑回甘，唔太感受到辛口；相反凍飲時，辛口特性會更加明顯。 另外，唔同嘅料理同清酒搭配時，大家亦可以體驗甘辛度嘅變化。即使係同一款酒，與魚生等生鮮料理搭配時，辛口感覺會較明顯；當與馬鈴薯燉肉搭配時，酒嘅甘味反而比較明顯。 酒嘅溫度與料理嘅搭配，都會影響到品酒時嘅味覺。呢個亦係清酒嘅一大特點，喺唔同溫度下嘅每一次品酒，與每種料理嘅不同搭配，都可以帶出唔同嘅味覺驚喜。 除咗啱啱嗰5款地酒試飲，仲有5種當地出產嘅推薦酒款，由於個人唔飲梅酒，所以試飲咗4款。除咗呢d，仲有售賣多款清酒，總有一款啱大家口味，我最後買咗兩支。 呢幾款就係當地非常出名嘅清酒，全部都已經試過晒喇！ 參觀酒の博物館大概20mins，又有酒飲又可以增進知識。正！ 大町温泉郷 酒の博物館 〒398-0001長野県大町市大町温泉郷2811 電話：0261-22-1942 開館時間：夏期(4/25～10/31) 9：00～18：00 （無休） ／ 冬期(11/1～4/24) 9：00～17：00 （不定休） 收費：大人（超過中學生）400日元，兒童免費 喺酒の博物館旁邊有輕食店，大家亦可以喺度食嘢。 餐廳外面仲有足湯浸添，不過我呢兩日已經浸咗好多次，所以冇再浸。 差唔多夠鐘，就行番過嚟車站搭巴士出JR站。 巴士途徑大町溫泉鄉旁邊嘅鹿島川河畔。 由大町溫泉鄉搭巴士大概15mins就嚟到JR信濃大町站。 嚟到車站，我哋梗係要睇下搭車資訊！ 首先，揾番張「立山黒部アルペンきっぷ」pass出嚟換張車飛！ 有關更多立山黑部交通資訊詳情：立山黑部「阿爾卑斯山脈路線」優惠套票點揀好？！ 換完乘車券，見仲有D時間就四圍行下，揾間便利店買嘢飲，點知車站得一間係賣農作物嘅小店。 呢個時候俾我喺候車室發現咗間食店。 食店專門賣信州名產－信州蕎麥麵（soba）。 於是我哋就決定食番個麵先搭車。喺信州一帶嘅車站都有呢種蕎麥麵店，下次去記得試下。 尋晚試咗蕎麥冷面，今日就試埋熱湯蕎麥麵。簡直就係平、靚、正！ 食完蕎麥麵，大概剩低10mins車就到站，我哋入閘先。 由於信濃大町站係立山黑部「阿爾卑斯山脈」路線另一出入口，所以站內有好多旅遊資訊。 站內有歡迎遊客嘅歡迎太鼓～ 當然唔少得遊日必儲嘅觀光印章，呢個印有晒成個立山連峰同黑部水庫洩洪，好靚！ 我哋要先從信濃大町站搭到南小谷站，一共14個站。 不過我哋會搭「特急 あずさ 3號」，所以唔會站站停，39mins就會去到南小谷站。 呢個車款好新、好快，座位都好舒服，略嫌座位與座位間窄咗少少。 列車會經過大町市、白馬等地區。 仲會經過當地其中一個露營聖地－木岐湖 ，完全係湖光山色！ 附近好多種稻米嘅農田，因為白馬地區盛產靚米，原因係水質好！ 終於嚟到南小谷站 ～喺南小谷站最知名嘅景點就係位於白馬岳嘅「白馬大池」。 不過白馬大池並唔容易去，要再轉車，仲要有登山經驗嘅朋友先好考慮去。 當然啦！呢個機會亦唔係屬於我嘅！因為是次安排唔到時間，唯有等下次喇！ 我哋喺南小谷站，要轉乘大糸線糸魚川行駛嘅列車。轉車時間只有6mins，而且兩邊月台只有長長嘅樓梯，勁趕！ 由於係普通列車，車速唔快，而且係站站停，我哋由第一個站南小谷站搭到尾站糸魚川站要55mins，勁辛苦嘅一程車。 由於係地方鐵路，車廂內全部都係老人家，所以全程都冇得坐。 沿途見到附近大部份都係農田，應該同旁邊就係好山好水呢個原因有關。 終於嚟到糸魚川站，我哋要再轉一程車，今次轉車時間多少少，有12mins！ 火車嚟啦！我哋要從糸魚川站乘搭呢架「特急 はくたか 8號」去金沢（金澤）喇！
