日本擁有有豐富嘅溫泉同錢湯文化,全日本各地都可以享受泡湯樂趣。喺日本有一種稱為「湯治 」嘅民間療法,藉由溫泉嘅功效,治療虛冷體質及風濕等病痛。無論溫泉定錢湯都係裸體坦誠相見,展現「敞開心扉=講真心話」嘅價值觀。因此泡湯被為一種溝通同聯絡感情嘅活動,所以日本人非常重視泡湯禮儀。如果能夠遵守基本禮儀,除了讓你泡湯時可以盡情享受外,亦會令同你一齊泡湯嘅人感到舒適愉快。 江戶時代,溫泉沿東海道逐漸繁榮,「箱根七湯」廣為人知。箱根七湯係指湯本、塔之澤、堂島、宮之下、底倉、木賀、蘆之湯,再加上姥子之湯,稱作「箱根八湯」。明治以後,箱根作為保養地、觀光地開發急速發展。為咗吸引更多觀光客,開發更多新溫泉,至今有箱根二十湯。 嚟得日本當然要浸溫泉放鬆下,咁先係真正嘅休息渡假。好多人都覺得浸溫泉好似係年長嘅人先鍾意嘅活動,但其實只要有真正好好咁浸過溫泉,相信大家都會同我一樣,完全愛上浸溫泉。今次嚟到溫泉勝地箱根,我揀咗入住位於塔ノ沢(塔之澤)嘅山の茶屋呢間溫泉旅館。 日本溫泉旅館嘅優質服務,女將同工作人員嘅貼心,相信有住過嘅朋友一定會俾佢哋嘅待客之道所感動。當然除咗硬件(旅館)、軟件(工作人員)外,使用者(客人)亦非常重要,所以要做一個人見人愛嘅好顧客,入住溫泉旅館一定要留意下面嘅規矩。 1、睇清楚旅館規定先好訂房 好多人都會直接喺各大酒店網度訂房,咁做當然係冇問題。不過住溫泉旅館,我就建議大家先上旅館官網睇清楚細則先訂房,例如日本有溫泉旅館係唔招待兒童,想一家大細入住可以 (每間旅館有自己規定),但唔可以帶兒童浸大浴場。 2、做個守時有品嘅旅客 絕大部分日本溫泉旅館嘅自家網頁都可以預約訂房,而且唔會即刻喺網上收費,而係到check out先俾錢。因為日本人覺得咁係互相尊重同信任嘅做法,特別係溫泉旅館呢種用貼心服務同口碑吸引客人再次光臨嘅行業,所以大家緊記即使唔可以成行,都一定要要打電話或以電郵告知旅館取消預訂,絕對唔可以做無尾飛砣失蹤。 大家要知道有部分溫泉旅館只有好少房,再加上要準備客人嘅兩餐,如果俾客人放飛機真係幾大損失。其實大家只要喺超過1星期通知取消預約,大部份唔會收取任何費用,所以冇必要為嗰少少錢做到咁衰格冇品。咁樣仲會影響到香港同本港遊客嘅形象! 宜家好多溫泉旅館為咗吸引客人,加入咗好多唔同嘅服務,務求令客源更多更廣。好似山の茶屋咁就有一個小酒吧俾大家小酌一番,亦有租借浴衣服務。宜家日本愈嚟愈多兩個女仔一齊旅行,未必想着旅館嘅浴衣(多數係深藍色),租借浴衣可以俾各位女仔着得靚靚影相,而且費用唔貴,一套收費大概500-1000円。 3、浴衣着法要正確 入住溫泉旅館,一入房就會見到浴衣會放喺床上或者放喺衣櫃,大家換上浴衣就可以去浸溫泉喇 (記住唔好着自己衫去浸溫泉)。如果只是日歸(專程泡湯唔住宿),都可以向旅館租借浴衣。假如唔識着浴衣,可以先請女將幫忙,但大家都係要自己學下,因為浸完溫泉你係要自己着番件浴衣。 浴衣嘅正確着法其實唔難,只要記住右下左上 (右襟在下, 左襟在上),男女都係。有個好簡單嘅測試方法,着完浴衣問下朋友,如果見到衣襟係一個細楷「y」,即係你着啱咗喇! 千歧咪着錯,左右交換咗,咁件浴衣就變成咗壽衣,日本咁多怪談,着成咁分分鐘嚇親人㗎! 4. 泡湯記得帶毛巾等用品 溫泉旅館嘅房間內,除咗浴衣外,仲有大小毛巾、浴帽等。大家去浸溫泉記得帶一條大浴巾、一條小毛巾,好似山の茶屋嘅風呂內有提供就唔使帶。貴重物品記得放入房內保險箱,唔相關嘅物品唔好帶去浸溫泉,因為基本上可以帶入溫泉池就只有小毛巾、浴帽、locker鑰匙等。 5、身上有紋身的請多加注意 唔少日本人對紋身很敏感,老一輩會直接聯想同黑社會有關,所以唔少公眾浴場、溫泉旅館都禁止紋身人士泡湯。雖然最近日本政府為咗旅遊業,正式決定唔限制紋身人士進入浴場及溫泉,方便有紋身嘅遊客浸溫泉不過呢個決定並冇法律效力。 咁到底係咪禁止紋身人士,都係由店方做決定。不妨進去之前,先問清楚店家有沒有相關嘅禁止規定。如果真係有紋身又想泡湯,可以預約貸切風呂或者有私人風呂嘅房間。 山之茶屋只有15間房間,11間房內都有私人風呂,所以旅館本身嘅5個風呂唔多人浸。雖然我哋間房有私人露天風呂,但住客可以預約1次無料(免費)嘅貸切溫泉(45分鐘),所以就預約體驗一下。貸切風呂最啱想浸大浴場, 但又唔想同其他住客共用溫泉嘅朋友。 我哋著住浴衣,拎住小籐籃,穿過充滿日式風情嘅廊道,嚟到貸切風呂-溪谷の野天風呂。貸切中會喺門口放上小木牌,將拖鞋放喺風呂門外,鎖埋門就可以防止有人誤闖。 一入去係更衣室,大家可以喺度打理儀容。呢度放置咗各式各樣嘅用品之外,仲準備咗冰茶俾大家泡完湯補充水份,仲可以到梳妝台前搽化妝水及乳液,然後搽身體乳液、吹頭髮,著番衫取回個人物品離開。 6、隨身物品放入置物籃 將浴衣同隨身物品一齊放入置物籃,最上面放大浴巾。大家可以用小毛巾遮住重點部位,前往淋浴區,小毛巾用嚟擦背。 7、泡湯前先去洗手間 相信大家都唔想浸喺有人哋尿液嘅溫泉掛?!進入溫泉前,一定會先經過洗手間同更衣室,要去廁所就最好宜家解決! 咁做仲有個好處,就係可以避免浸入溫泉身體變暖後,又要光脫脫衝去廁所。 一推開更衣室玻璃門見到一整排沐浴設備,石造嘅牆面與石櫈,好日式好天然嘅感覺。但我想講得嗰幾度,當pat pat直接坐喺石櫈,真係好凍囉! 喺日本浸溫泉規矩多多,大家第1次泡湯之前,要好好備課,以免失禮人前。跟住落嚟等我講解下大家一定要遵守嘅泡湯禮儀 (適用於溫泉同錢湯),等你都可以做個泡湯達人! 1、泡湯前要先沖澡 所謂「沖澡」,係指進入溫泉前用熱水沖洗身體。對好多朋友嚟講,第一次坐喺張櫈仔度沖涼真係有d手足無措! 其實「沖澡」嘅順序基本上由雙腳開始、到雙手同身體,再洗頭,最後沖洗乾淨全身嘅泡泡,搞掂! 咁點解要先沖澡嘅原因有兩個: 一. 洗乾淨身上污垢,以免整污糟溫泉; 二. 令身體變暖,適應溫泉嘅溫度。 2、清洗身體時唔好將水潑到旁人 沖澡時一定要坐喺櫈仔度,唔好企起身,以防噴到隔離或者溫泉裏面。大家亦要小心花灑水唔好噴到人,尤其當對方喺你身後經過,又或者正喺你隔離沖澡。有d沖澡嘅空間唔大,所以盡可能將花灑由頭淋到腳比較穩陣。 3、用完嘅用具要放回原位 大家使用嘅清洗用具,例如櫈仔、小盆等,用完請清潔乾淨,放番喺原位。 4、泡湯前一定要紥好頭髮 無論你係中長髮又好,定係長頭髮都好,記得一定要紥成髮髻(唔好紥馬尾)或者戴好浴帽,先好浸入溫泉,因為溫泉係會損害髮質。另外,喺溫泉入面見到浮住頭髮已經夠核突,相信冇人想喺溫泉入面俾頭髮纏身,嗰種感覺超嘔心! 5、全裸入浴泡湯 日本絕大部份都係浸「裸湯」,所以任何衣物或毛巾都絕對唔可以入池。(除咗極小部份混浴嘅溫泉可以俾人包住毛巾入浴外)。毛巾睇落乾淨,但實際上含有好多細菌,而細菌會污染溫泉水。所以將細毛巾摺好放喺頭上或者放喺池邊,唔好俾毛巾浸到溫泉水。 かじかの湯 (內風呂) 呢個內風呂喺我間房隔離,但冇見到或聽到有人浸,除本人以外。 6、入池時記得同溫泉中嘅人打招呼 相信唔使我多講,大家都知日本係個多禮嘅民族,正所謂禮多人不怪,輕輕打聲招呼,再唔係簡單點點頭都可以。 7、泡湯唔好一下就浸到肩膀 記得唔好一開始就全身浸晒入溫泉裏面。因為一下就浸全身會令體溫突然上升,血壓亦都急劇上升,增加心臟負擔,帶嚟反效果影響身體。大家應該先浸半身浴,等到上半身都開始暖之後,再慢慢浸到肩膀為止。 山の茶屋有兩個小小嘅露天風呂,兩個都喺竹の湯裏面。竹の湯位於旅館後山嘅竹林中,要去泡湯首先要穿過竹の小路。 塔之澤溫泉嘅泉質係單純泉・塩性單純泉,對神經痛・關節痛・冷性體質有療效 另外有美肌、疲勞恢復、治療腸胃病等功效,而且無色無味,浸落非常舒服。 8、唔好喺溫泉入面游水濺起水花 大家要知道溫泉喺俾人浸而唔係俾人游嘅,想游水唔該去泳池。喺溫泉度濺起水花係令人好討厭嘅行為,所以千歧唔好咁做。如果好似睇電視d人咁又撥水又玩水,可能會遭人白眼,因為實在太失禮喇! 9、唔可以喺溫泉入面洗刷身體 有d人浸溫泉專門揀泉水出水位,等水直接流到自己身上。溫泉係俾大家共同,唔可以咁自私整污糟晒溫泉水。大家更唔可以係溫泉入面沖涼擦背,不過可以喺溫泉入面輕輕按摩皮膚。 10、泡湯時保持安靜 大家去浸溫泉都係想身心得到休息放鬆。唔係唔俾講嘢,而係要大家注意聲量,唔好騷擾到其他人。細細聲傾計當然冇問題,但記得唔好興奮過度而騷擾到其他人!假如旁邊不斷有人吵鬧喧嘩,好心情一定會受到影響,令人覺得好厭惡! 11、唔好喺溫泉內佔好多空間 浸溫泉真係好舒服,舒服到令人想打直瞓晒喺溫泉入面? 請大家千歧唔好咁做,因為溫泉係公共設施,大家都可以享用,唔好一個人佔太多空間,所以最好嘅姿勢係坐姿。 \ 12、唔可以獨霸溫泉 有d溫泉提供一個個嘅個人風呂,大家使用時不可以久佔。其實任何風呂都係一樣,當多人使用時,都唔可以長時間霸佔位置。 13、30分鐘為限免浸過龍 第一次浸溫泉應該先浸5分鐘後起身淋凍水,如果適應可再浸5-10分鐘。每次浸溫泉最多只可以浸30分鐘,唔好以為浸得多、浸得長時間就係好。因長時間泡湯會引致頭暈,亦會沖走皮膚嘅天然油脂,令肌膚變乾。 14、離開泡湯區前要把身體印乾 泡湯後要印乾身體先可以返回更衣室。一般浸完溫泉後唔使沖身,直接可以用毛巾印乾,等身體自然吸收依附喺皮膚上嘅溫泉成份。但如果浸嘅係強酸性溫泉或者硫化氫溫泉等刺激性強嘅溫泉,浸完後最好沖身 (記得唔好落梘液沖身!!!),因為唔過水好容易會皮膚敏感,嚴重嘅可能引致潰爛。 竹の湯-露天風呂 月 呢個露天風呂可以話係人氣之湯,好受歡迎,幾難先搵到機會影相!呢個溫泉池有少少似去做spa嗰種按摩浴池,池中裝咗會變色嘅燈,夜晚嚟浸充滿神祕感,令人感到致身中東嗰種異國情調。而朝早嚟泡湯就係一片翠綠景象,感覺好清新。 注意! 泡湯小貼士~ 男性專用風呂及女性專用風呂會喺唔同時段交替。前往使用風呂前,最好先確認時間。 啱啱食飽或者空腹都唔適宜浸溫泉,飲咗酒就更加唔可以浸溫泉。 孕婦、心臟病、皮膚有問題者,必須得到醫生許可先好浸溫泉。 硫磺含量較高嘅溫泉會令銀器變黑(散發著爛雞蛋味)。如果身上有任何銀製飾物,記得除咗先浸入溫泉。 去得公衆風呂泡湯,相信冇人想自己嘅裸體被攝入鏡頭。如果大家想影相,記得要等冇人先影! 第一次去大浴埸浸溫泉,入去嗰一剎那,可能會被一整排裸體震撼到 (因為我識揀冇人嘅時間先去浸, 所以未經歷過咁嘅場面)!!! 但對日本人嚟講早已習以為常,所以唔會望實你,大家可以放心。 為了尊重自己以及其他人,請大家亦唔好窺看他人身體,又或者故意露出呢d都係猥褻行為。當然更唔可以隨意纏擾他人。 竹の湯-露天風呂 兔 兩個露天風呂係分開嘅,中間隔住一個小庭園,各自擁有更衣室同淋浴區,私隱度好高。露天風呂 兔係山の茶屋中我最鍾意嘅溫泉池,一嚟好少人浸,二嚟呢個溫泉嘅水溫比較高,非常適合我。而且風呂嘅設計同環境都非常日式,一邊泡湯一邊聽住風吹過竹林發出嘅沙沙聲,真係令人好relax!!! 前排見到有日本網站向全國500名女性做咗問卷調查,選出5大「溫泉討厭行為」: 第5位:披頭散髮浸入溫泉 長髮人士記得紮起頭髮先泡湯! 呢個溫泉討厭行為很容易被外國遊客忽略。 第4位:在浴場內大聲喧嘩 跟親朋好友輕聲聊天當然冇問題,應盡量避免高談闊論、大叫大笑。 第3位:淋浴嘅水花四濺 未必所有溫泉旅館都會將淋浴嘅空間分隔開,小心沖涼時水花濺到其他客人。 第2位:冇沖涼就泡湯 「先沖涼後泡湯」係浸溫泉最基本嘅常識之一,但如果打算1晚泡幾次湯,就算第1次時已經洗淨全身,之後每次浸都要先沖身。 第1位:身上仲有泡泡就去浸溫泉 有過半數人都覺得不能接受! 原來比起唔沖身,大家更討厭帶着沖涼時殘留嘅泡泡進入溫泉!一定要記住沖乾淨全身先好泡湯! 浸完竹の湯,離開時從另一邊樓梯行番落旅館去到全館最特別、人氣no.1嘅岩戸の野天風呂。 仲記得當日有個外國女士喺岩戸の野天風呂入面逗留咗個幾鐘,佢浸咗咁耐都好,見到我哋想浸都唔肯出嚟,真係有D無奈,所以大家真係唔可以太過自私。好友原本好想浸吓呢個風呂,但又唔想同陌生人一齊浸,於是番咗房等,但最後都唯有放棄。好彩我喺再之前趁住佢喺房浸私人風呂時嚟咗浸,唔係就連我都冇得浸。 岩戸の野天風呂 呢個岩戸風呂特別到連旅館都專登喺風呂內設咗簡介。一入推開更衣室門,就見到溫泉中有塊大岩石,之後從另一個角度睇先知道係由兩塊大岩石(花崗岩)組成嘅,其中一塊仲好似個大鼻! 呢兩塊大岩石並唔係人工設計,而係當初旅館購入地皮時已經喺呢個位置。大岩石喺遠古時代嘅箱根大涌谷火山爆發時所形成(約40萬年前),然後經過長年嘅地殼變動等因素,成為宜家所見到嘅面貌,並落戶喺度。所以山の茶屋決定留低呢對原住民,完整保留之餘,仲變成咗岩戸の野天風呂。 呢晚嘅箱根只有1-2度,雖然天空飄住細細雨絲,溫泉依然升起裊裊蒸氣。野天風呂係半露天式,溫泉上面有竹棚遮雨,即使落大雨都可以享受泡湯之樂。 浸咗落去湯船,望住呢兩塊經歷咗幾十萬年大岩石,真係覺得比起大自然,人類真係好渺小。我哋應該提醒自己要謙卑d、心胸放開d、簡單d,之後可能就會發現宜家所面對嘅不過係人生中嘅小片段,宇宙中嘅微塵。然後就會覺得自己輕鬆咗、開心咗! 記得補充水份,唔好即瞓 浸溫泉其實會令身體流失唔少水份,所以記得要好好補充水份。另外,浸完溫泉唔好即刻瞓,因為體內血液急速運行,所以最好等半個鐘先覺覺豬。 第二日,我一早就起身呼吸新鮮空氣。企喺月見台嘅竹地板上,感受到日與夜完全唔同嘅景致。黃昏時充滿日式懷舊氣氛,嚟到朝早就顯得寧靜舒服,植物朝氣蓬勃。 箱根嘅早上,當然要把握時間,好好享受多次房間內嘅露天風呂。 我們預約嘅早餐時間係8:15,女將大概7:45就會敲門,確認我們起咗身。所以想要泡湯,就要更早起喇! 女將會趁我哋打理儀容時,整理好床鋪,將張檯恢復原狀。 山之茶屋嘅日式朝食,除了各式各樣嘅冷盤小菜,當然唔少得溫熱嘅煮物,一次過放喺蒸籠入面。蒸籠內除咗有醃菜,玉子卷蛋、豆腐外,仲有上湯煮海鮮豚肉野菜,非常豐富。 食咗一陣,烤一夜干上枱喇! 除咗白飯配小菜,大家亦可以整茶泡飯食㗎! 雖然朝食味道清淡,但更啱我胃口,好適合作為第一餐,食完充滿元氣。 吃完早餐,我哋將收拾好嘅行李交俾女將幫手寄送去箱根湯本站。然後,女將會同我們再確認今天嘅行程同交通等事宜。 趁住好友俾錢同check out,我四圍行下,點知俾我發現咗旅館嘅手信店,仲喺入面發現咗嚟到箱根必買嘅紀念品-寄木細工傳統工藝品。精美嘅寄木細工令人一睇就知係made in Japan! 箱根嘅寄木細工擁有約200年歷史。製作方法係由工匠挑選各種天然有色木材,按照木材原本嘅色澤與紋路,運用精湛工藝,拼製成有幾何圖案嘅作品,所以每件作品呈現嘅花紋會依色調而異。 寄木細工有「無垢」同「ズク」2種技法: 「無垢」係用組合而成嘅木片製作成木材、嵌木,再直接削成帶有圓弧狀,等特定形狀,比較容易塑型,製作成杯或碗原型工藝品等。上面嘅鎖匙扣用「無垢」技法製作出嚟。 另一種技法「ズク」就係發源自日本箱根。「ズク」技法係將各種木材組合後,接成擁有花紋嘅「種板」,然後將種板削成薄紙。最後將薄紙貼喺木盒或者裝飾唔同產品。上圖嘅長形盤係用咗「ズク」技法製作。 奉行敗家敗到最後一秒鐘嘅本人又買到失去理智,除咗買寄木細工最出名嘅神秘機關箱俾(上面右邊嘅小盒),另外仲買「ズク」技法製作嘅書籖等木工藝品送俾朋友同事。 離開時,靚女女將向我哋道歉,因為尋日唔可以親自招待我哋。旅館員工會送大家出嚟門口。女將嘅待客之道令我非常佩服,竟然連手袋都差D幫我拎埋,多禮到令我好唔慣。 女將送到我哋落山, 與女將告別,女將仍然一路揮手鞠躬送別我哋。 我哋今次箱根山の茶屋溫泉一泊二食嘅住宿體驗終於嚟到尾聲喇! 又一出賣好友之作,明明係我帶路,但點都要行先! 穿過吊橋後, 迎送巴士落山方向嘅停站位喺吊橋出口處。根據專屬女將俾我哋嘅巴士資訊,迎送巴士會9:20抵達,9:20巴士真係出現送我哋到箱根湯本。遊日安排嘅行程好少被交通耽誤,好多都精準到令人感動! 呢個亦都係令遊客覺得日本好正嘅原因之一! 關於山の茶屋嘅住宿體驗,請看: 竹林深處有人家-箱根山の茶屋溫泉旅館